(ពោធិ៍សាត់)៖ «បើទោះបីជារាជរដ្ឋាភិបាលថ្មី មិនទាន់ត្រូវបានបង្កើត ប៉ុន្តែថ្នាក់ដឹកនាំគណបក្សប្រជាជនបានចុះជួយដោះស្រាយបញ្ហានានារបស់ពួកគាត់ជាបន្តបន្ទាប់»។ នេះជាការលើកឡើងរបស់ ប្រជាពលរដ្ឋនៅខេត្តពោធិ៍សាត់ នៅចំពោះមុខលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងក្រុមការងារ នៅថ្ងៃទី១៤ ខែសីហា ឆ្នាំ២០១៨នេះ ក្នុងឱកាសលោករដ្ឋមន្រ្តី បានចុះពិនិត្យស្ថានភាពទឹក និងការងារបង្កបង្កើនផលរបស់ប្រជាកសិករ ព្រមទាំងការដ្ឋានសាងសង់ប្រព័ន្ធធារាសាស្ត្រមួយចំនួន នៅក្នុងខេត្តពោធិ៍សាត់។
ជាមួយគ្នានេះលោករដ្ឋមន្រ្តី ក៏បានចុះទៅពិនិត្យការសាងសង់ គម្រោងអភិវឌ្ឍន៍ស្ទឹងពោធិ៍សាត់ទំនប់លេខ៣ និងទំនប់លេខ៥ ជំហានទី២ និងប្រព័ន្ធធារាសាស្ត្រដំណាក់អំពិល-វត្តលួងផងដែរ។
ក្នុងឱកាសនោះ លោករដ្ឋមន្ត្រី លឹម គាន់ហោ បានទទួលយកនូវសំណូមពររបស់ប្រជាពលរដ្ឋ ដែលមានបញ្ហាប្រឈមមួយចំនួន នោះគឺការខ្វះខាតទឹក សម្រាប់ស្រោចស្រពនៅក្នុងក្រុងពោធិ៍សាត់។ ការខ្វះខាតទឹកនេះ មូលហេតុគឺដោយសារគម្រោង កំពុងតែដំណើរការសាងសង់ ដូចនេះទើបមានការរអាក់រអួល ក្នុងការបញ្ជូនទឹកទៅកាន់ស្រែរបស់ប្រជាពលរដ្ឋ។ ដើម្បីដោះស្រាយបញ្ហានេះ លោករដ្ឋមន្ត្រី បានឧបត្ថម្ភនូវម៉ាស៊ីនបូមទឹកខ្នាតតូច ចំនួន០៦គ្រឿង ដើម្បីបូមទឹកពីប្រឡាយមេ បញ្ចូលទៅប្រឡាយរង សម្រាប់ស្រោចស្រពស្រែរបស់ប្រជាពលរដ្ឋ។
សូមបញ្ជាក់ជូនថា គម្រោងអភិវឌ្ឍន៍ស្ទឺងពោធិ៍សាត់ ទំនប់លេខ៣ និងលេខ៥ ជំហានទី២ ស្ថិតក្នុងខេត្តពោធិ៍សាត់ គ្របដណ្តប់លើស្រុកភ្នំក្រវាញ និងស្រុកបាកាន។
គម្រោងនេះមានការងារសំខាន់ៗដូចជា៖
*ប្រឡាយមេបេតុង ចំនួន០១ ខ្សែ មានប្រវែងសរុប២០.៥គីឡូម៉ែត្រ (ទទឹងមាត់លើពី២០,៥-២១,៥ម៉ែត្រ និងទទឹងបាតក្រោម១៤ម៉ែត្រ ជម្រៅពី៣-៣,៥ម៉ែត្រ)។
*ប្រឡាយរង ចំនួន០៧ខ្សែ មានប្រវែរងសរុប៥០,៨គីឡូម៉ែត្រ (ទទឹងមាត់លើពី៦-៨ម៉ែត្រ និងទទឹងបាតក្រោមពី១,៥-២,៥ម៉ែត្រ ជម្រៅ១,៥៨-២,២ម៉ែត្រ) ក្នុងនោះ ប្រឡាយរងលេខ១ ក្រាលបេតុងទាំងអស់ប្រវែង១១.០៥១ម៉ែត្រ ដោយឡែកប្រឡាយរង០៦ខ្សែទៀត ក្រាលបេតុងតែផ្នែកខ្លះ គឺលេខ១-១ប្រវែង២,០០០ម៉ែត្រ, លេខ២ ប្រវែង២៣៦ម៉ែត្រ, លេខ៣ ប្រវែង២៣៦ម៉ែត្រ, លេខ៤ ប្រវែង២៣៦ម៉ែត្រ, លេខ៥ ប្រវែង២៣៦ម៉ែត្រ និងលេខ៦ ប្រវែង២៣៦ម៉ែត្រ។
*ប្រឡាយស្រោចស្រព ចំនួន៧៧ខ្សែ មានប្រវែងសរុប១៣៨.១៩គីឡូម៉ែ (ទទឹងមាត់លើពី ៤,០៥-៤,៧៥ម៉ែត្រ និងទទឹងបាតក្រោមពី ០,៨-១ម៉ែត្រ, ជម្រៅពី១,៣-១,៥ម៉ែត្រ)។
*ប្រឡាយដោះទឹក ចំនួន០៨ខ្សែ មានប្រវែងសរុប ៤៨.៨៨គីឡូម៉ែត្រ (ទទឹងមាត់លើពី ៥,៧-៨,៥ម៉ែត្រ និងទទឹងបាតក្រោមពី១,៥-២,៥ម៉ែត្រ, ជម្រៅពី ១,៥-២ម៉ែត្រ)។
*ស្តារស្ទឹងប្រវែង ៥គីឡូម៉ែត្រ។
*សំណង់យកទឹក ចំនួន០១កន្លែង សំណង់សម្រួលចរន្តទឹកចំនួន៣៦កន្លែង សំណង់បង្វែរចរន្តទឹកចំនួន៨៨កន្លែង និងសំណង់ស្ទាក់ទឹក ចំនួន០២កន្លែង។
*លូក្រោមប្រឡាយទឹក ចំនួន០៣កន្លែង សំណង់ប្រឡាយបេតុងចម្លងទឹក ចំនួន០២កន្លែង និងសំណង់លូទឹក ចំនួន០៦កន្លែង។
គម្រោងអភិវឌ្ឍន៍ស្ទឹងពោធិ៍សាត់ ទំនប់លេខ៣ និងលេខ៥ ជំហានទី២ នឹងមានលទ្ធភាពផ្គត់ផ្គង់ទឹកស្រោចស្រព សម្រាប់បង្កើនផលិតផលកសិកម្ម បានទំហំប្រមាណ១៩,៧០០ហិកតា នៅរដូវវស្សា និង១០,៥០០ហិកតា នៅរដូវប្រាំង ហើយក៏រួមចំណែកផងដែរ ក្នុងការផ្គត់ផ្គង់ទឹកស្អាត និងកាត់បន្ថយទឹកជំនន់ តាមតំបន់មួយចំនួននៅផ្នែកខាងក្រោម។
ជារួមការអភិវឌ្ឍស្ទឹងពោធិ៍សាត់ ទំនប់លេខ៣ និងលេខ៥ ជំហានទី២នេះ នឹងធ្វើឲ្យរាជរដ្ឋាភិបាលសម្រេច បាននូវប្រព័ន្ធធារាសាស្ត្រពេញលេញមួយ ដែលអាចឲ្យប្រជាពលរដ្ឋ នៅស្រុកភ្នំក្រវាញ និងស្រុកបាកាន ខេត្តពោធិ៍សាត់ អាចធ្វើការដោះស្រាយបញ្ហាទឹកបានមួយកម្រិតធំ ដែលពីមុនយើងពឹងផ្អែកភាគច្រើន ទៅលើប្រភពទឹកពីភ្លៀងនៅរដូវវស្សា។
បន្ទាប់មកលោករដ្ឋមន្ត្រី និងក្រុមការងារ បានបន្តដំណើរចុះពិនិត្យការដ្ឋានសាងសង់ប្រព័ន្ធធារាសាស្ត្រដំណាក់ឈើក្រំ។ ការសាងសង់ប្រព័ន្ធធារាសាស្ត្រ ដំណាក់ឈើក្រំ ត្រូវបានបែងចែកជា០៣កញ្ចប់ រួមមាន៖
*កញ្ចប់ទី១៖ សាងសង់សំណង់មេកាត់ស្ទឹងពោធិ៍សាត់ ចំនួន០១កន្លែង ត្រង់ចំណុចភូមិដំណាក់ឈើក្រំ ឃុំសំរោង ស្រុកភ្នំក្រវាញ។
*កញ្ចប់ទី២៖ ជីកប្រឡាយមេ០១ខ្សែ ប្រវែង១៦,០០០ម៉ែត្រ និងសាងសង់សំណង់សិល្បការ សរុបចំនួន២៨កន្លែង។
*កញ្ចប់ទី៣៖ ជីកប្រឡាយរង០៤ខ្សែ សរុបប្រវែង ៦៨.៩៨១ម៉ែត្រ និងសាងសង់សំណង់សិល្បការ សរុបចំនួន២១៥កន្លែង។
នៅក្នុងការសាងសង់ជំហានដំបូង ក្រសួងបានចាប់អនុវត្តនូវកញ្ចប់ទី២ នោះគឺការជីកប្រឡាយមេ០១ខ្សែ ប្រវែង១៦គីឡូម៉ែត្រ លាតសន្ធឹងលើឃុំផ្ទះរ៉ុង ឃុំសំរោង ឃុំបាក់ចិញ្ចៀន នៃស្រុកភ្នំក្រវាញ និងឃុំតាលោ ឃុំខ្នារទទឹង នៃស្រុកបាកាន។ ប្រឡាយមេ០១ខ្សែនេះ នឹងមានបំពាក់នូវសំណង់សិល្បការតូច ធំ សរុបចំនួន២៨កន្លែង។
នៅក្នុងការពិនិត្យនោះដែរ លោករដ្ឋមន្ត្រី ក៏បានណែនាំដល់ក្រុមហ៊ុន Guangdong Foreign Construction Co.,Ltd នៃសាធារណរដ្ឋប្រជាមានិតចិន ដែលកំពុងសាងសង់គម្រោងអភិវឌ្ឍន៍ស្ទឹងពោធិ៍សាត់ ជំហានទី២ ក៏ដូចជាក្រុមហ៊ុនជប៉ុន ដែលកំពុងសាងសង់ប្រព័ន្ធធារាសាស្ត្រដំណាក់អំពិល-វត្តលួង និងក្រុមហ៊ុន ដែលកំពុងសាងសង់ប្រព័ន្ធធារាសាស្ត្រដំណាក់ឈើក្រំ ត្រូវយកចិត្តទុកដាក់ឲ្យបានខ្ពស់បំផុតលើបញ្ហាបច្ចេកទេស ដើម្បីសំណង់មានគុណភាព ធានានូវការប្រើប្រាស់យូរអង្វែង៕
