(ភ្នំពេញ)៖ កីឡាការិនីហែលទឹកជម្រើសជាតិ ដែលត្រូវបានមហាជនដឹងថា មានទេពកោសល្យ និងសមត្ថភាពខ្ពស់ គឺកញ្ញា ហែម ថុនវិទិនី កាលពីម្សិលមិញ នាងបានរៀបរាប់ជាច្រើន នូវរឿងរ៉ាវនានា ពាក់ព័ន្ធនឹងបច្ចេកទេស និងវិធីសាស្រ្តផ្សេងៗ ក្នុងវិស័យកីឡាហែលទឹក តាមរយៈកម្មវិធី «អាថ៌កំបាំងក្រៅឆាក របស់តារា»។ យ៉ាងណាមិញ ក្រៅពីរៀបរាប់ នូវអាថ៌កំបាំងផ្ទាល់ខ្លួននានាហើយនោះ នាងក៏បានធ្វើឲ្យអ្នកទស្សនា តាមរយៈការផ្សាយផ្ទាល់ពីទូរទស្សន៍ Fresh News និង Khmer Talking ស្ទើរតែស្រក់ទឹកភ្នែក ដោយមិនដឹងខ្លួន បន្ទាប់ពីនាងបកស្រាយនូវគោលបំណង នៃការចាក់សាក់រូបកងប្រាំ តំណាងកីឡាជាតិ នៅលើរាងកាយរបស់នាង។
ជាក់ស្តែង កញ្ញា ហែមថុន វិទិនី ក្រៅពីជាអ្នកហែលទឹកអាជីព ដែលទទួលបានមេដាយមាស ស្ទើរគ្រប់វិញ្ញាសារប្រកួត ក្នុងប្រទេសកម្ពុជាហើយនោះ នាងក៏ធ្លាប់បានចូលរួមបក្រកួត ក្នុងកម្មវិធីកីឡាអន្តរជាតិ។ ការទៅចូលរួមប្រកួតជាលក្ខណៈអន្តរជាតិនេះហើយ ជាហេតុធ្វើឲ្យ ហែមថុន វិទិនី និងមិត្តរបស់នាងសន្យាគ្នា ពីការចាក់សាក់លើខ្លួន ដែលមានរូបរាងជា កងប្រាំតំណាងឲ្យកីឡា។
ពាក់ព័ន្ធនឹងរឿងនេះ កញ្ញា ហែមថុន វិទីនី បាននិយាយក្នុងកម្មវិធី «អាថ៌កំបាំងក្រៅឆាក របស់តារា» យ៉ាងដូច្នេះថា មិត្តភក្តិរបស់នាង និងនាងបាននាំគ្នាសន្យាថា បើមានឱកាសទៅប្រកួតកីឡា ក្នុងឆាកអន្តរជាតិ នឹងនាំគ្នាសាក់រូបកងប្រាំទាំងអស់គ្នា។ ក្នុងនោះ គឺពិតជាបានសមប្រកបមែន ដោយមិត្តរបស់នាង រួមជាមួយនឹង ហែម ថុនវិទិនីផងនោះ សុទ្ធសឹងតែបានទៅប្រកួតកីឡា លក្ខណៈអន្តរជាតិដូចគ្នា ខណៈត្រឡប់មកវិញមិត្តរបស់នាង បានសាក់រួចរាល់ហើយ។ ដោយឡែកនៅតែនាងមួយប៉ុណ្ណោះ ដែលមិនទាន់បានសាក់។
ហែម ថុនវិទិនី បាននិយាយបន្ត ដោយបង្ហាញពីការអារម្មណ៍រំភើប ក្នុងការស្នេហាវិស័យកីឡា ខណៈគោលបំណងនៃការចាកសាក់នេះ គឺហាក់បីដូចជាខុសទាំងស្រុង នឹងអ្វីដែលនាង បានសន្យាគ្នា ជាមួយមិត្តភក្តិ និងការគិតរបស់ទស្សនិកជន ដោយក្នុងនោះនាងថា «ខ្ញុំនឹងចាក់ ប៉ុន្តែមិនទាន់ដល់ពេល ហើយការសាក់នេះទៀតសោត គឺដើម្បីបញ្ជាក់ពីអត្ថន័យមួយ ក្នុងឆាកជីវិតរបស់ខ្ញុំ ថាខ្ញុំបានចូលរួម ក្នុងកម្មវិធីអន្តរជាតិ។ មិនតែប៉ុណ្ណោះ គឺទុកស្នាមសាកនេះ សម្រាប់ឲ្យក្មេងៗ កូនចៅជំនាន់ក្រោយ ពេលដែលខ្ញុំមានគ្រួសារទៅ ថា ខ្ញុំមានស្នាមសាក់កងប្រាំ និងជាកីឡាដែលខ្ញុំស្រឡាញ់រហូត ទោះខ្ញុំចាស់ទៅក៏ដោយ»។
ជាមួយនឹងការបកស្រាយត្រង់ចំណុចនេះ គឺបានធ្វើឲ្យទស្សនិកជនមួយចំនួន ហូរទឹកភ្នែកទាំងមិនដឹងខ្លួន ជាពិសេសអ្នកស្នេហាវិស័យកីឡាដូច ហែម ថុនវិទិនី ថានាងពិតជាស្រឡាញ់កីឡាហែលទឹកខ្លាំងណាស់ ពោលគឺពេលចាស់ទៅធ្វើអ្វីមិនកើត ក៏មានស្នាមសាក់កងប្រាំ នៅជាប់នឹងខ្លួនដែរ។
យ៉ាងណាមិញ បើងាកមករករឿងរ៉ាវស្នេហា របស់កីឡាការិនីហែលទឹកជម្រើសជាតិ ដែលមានទឹកចិត្តស្រឡាញ់តែវិស័យកីឡានេះវិញ គឺទោះមិនទាន់បញ្ជាក់ថា គូស្នេហ៍ជានរណា ក៏ទស្សនិកជនអាចប៉ាន់ស្មានត្រូវ ៥០ភាគរយដែរ ព្រោះជានិច្ចកាល នាងតែងតែបង្ហោះរូបភាពស្វិតៗ ជាមួយម្ចាស់ស្នេហ៍រហូត។ ក្នុងនោះ ហែមថុន វិទិនី និយាយថា «បុរសជិះសេះស ដែលអាចយកបេះដូងរបស់នាង និងកសាងជីវិតគ្រួសារ នៅថ្ងៃអនាគតជាមួយនាងបាន គឺជាបុរសដែលមានអាជីពជាអ្នកកីឡា ពោលគឺឲ្យតែជាកីឡាករ គឺនាង ស្រឡាញ់ មិនថា ហែលទឹក បាល់ទាត់ បាល់ទះនោះទេ»។
គួរជម្រាបថា កញ្ញា ហែម ថុនវិទិនី ដោយសារទឹកចិត្តស្រឡាញ់ វិស័យកីឡាហែលទឹក ក្រៅពីមានអាជីពពិតប្រាកដ ជាអ្នកហែលទឹកហើយនោះ បច្ចុប្បន្នក៏ធ្វើជាគ្រូបង្រៀនហែលទឹក ដល់ក្មេងៗជំនាន់ក្រោយផងដែរ។ កីឡាការិនីរូបនេះ មានទឹកចិត្តយ៉ាងមុតមាំ ចង់អភិវឌ្ឍន៍វិស័យមួយនេះ ឲ្យកាន់តែរីកចម្រើននាពេលអនាគត ដោយក្នុងកម្មវិធី «អាថ៌កំបាំងក្រៅឆាក របស់តារា» នាងបានស្នើសុំរាជរដ្ឋាភិបាល និងស្ថាប័នពាក់ព័ន្ធ ជួយបង្កើតអាងហែលទឹកឲ្យបានច្រើន គ្រប់ខេត្តក្រុង ពោលគឺសាងសងនៅតាមសាលារៀនជាដើម ដោយនាងមើលឃើញថា ក្មេងៗជំនាន់ក្រោយ អាចមានទេពកោសល្យ ហែលទឹកពីកំណើត ហើយបើបង្រៀនបន្ថែមនឹងរីកចម្រើនជាមិនខាន៕
