(ភ្នំពេញ)៖ បុរសម្នាក់ដែលអះអាងថា ខ្លួនជាមន្ត្រីនគរបាលនោះ បានដកកាំភ្លើងអាមេគំរាមរកបាញ់បុរសម្នាក់ក្នុងជម្លោះពាក្យសម្តីមួយនៅវេលាម៉ោងប្រមាណ ១១យប់ថ្ងៃទី០៩ ខែសីហា ឆ្នាំ២០១៨ នៅតាមផ្លូវលេខ២៧៨ ខាងក្រោយអតីតរោងកុនគិរីរម្យ ក្នុងខណ្ឌចំការមន នាំមានការភ្ញាក់ផ្អើលជាខ្លាំងពីប្រជាពលរដ្ឋនៅកន្លែងកើតហេតុនោះ។
បុរសដែលអះអាងថា ខ្លួនជាមន្ត្រីនគរបាលហើយដកកាំភ្លើងអាមេគំរាមរកបាញ់ជនស៊ីវិលនេះ ត្រូវបានគេទម្លាយថា មានឈ្មោះ លន់ ស៊ីវធេង។ ប្រជាពលរដ្ឋនៅកន្លែងកើតហេតុគេមិនបានដឹងថា មុនឈានដល់ជម្លោះពាក្យសម្តី និងដកកាំភ្លើងគំរាមរកបាញ់គ្នា ភាគីជម្លោះមានបញ្ហាអ្វីនឹងគ្នានោះទេ។
ដោយឡែកបើតាមបុរសដែលត្រូវបានគេដកកាំភ្លើងគំរាមបាញ់នេះ បានអះអាងថា នៅមុនពេលកើតហេតុរូបគេ និងមិត្តភក្តិបានជិះម៉ូតូនៅតាមផ្លូវស្ងាត់មួយ ស្រាប់តែក្រុមបុរសអះអាងខ្លួនថាជានគរបាលនេះបានជិះម៉ូតូដេញពីក្រោយ ហើយស្រែកថាចោៗ ហើយជិះតាមពួកគេរហូត។ បុរសដែលត្រូវដកកាំភ្លើងគំរាមបាញ់នាំឲ្យព្រលឹងរត់ចេញពីខ្លួននេះ បានបន្តថា បន្ទាប់ពីឃើញដូចនោះពួកគេភ័យ ហើយក៏ជិះម៉ូតូរត់មករកកន្លែងមនុស្សច្រើន ដើម្បីការពារខ្លួនតែម្តង។
បើតាមរយៈវីដេអូដែលប្រជាពលរដ្ឋថតបាននេះ បន្ទាប់ពីបានប៉ះពាក្យសម្តី និងដកកាំភ្លើងអាមេគំរាមបាញ់គេហើយ បុរសអះអាងជាមន្ត្រីនគរបាល និងបក្ខពួកក៏បានជិះម៉ូតូចេញពីកន្លែងកើតហេតុបាត់ទៅ។
ប្រជាពលរដ្ឋដែលបានឃើញសកម្មភាពដ៏ច្រលោមខាមរបស់បុរសអះអាងខ្លួនជាមន្ត្រីនគរបាលនេះ បាននាំគ្នារិះគន់យ៉ាងចាស់ដៃចំពោះសកម្មភាពនេះ ព្រមទាំងបានអំពាវនាវឲ្យថ្នាក់ដឹកនាំកងកម្លាំងនគរបាលជាតិ មេត្តាស្រាវជ្រាវរករឿងហេតុពិត ហើយក៏សង្ឃឹមថា នឹងដាក់វិន័យទៅលើបុរសអះអាងជាមន្ត្រីនគរបាលនេះតាមវិន័យរបស់នគរបាលជាតិ៕
បុរសដែលអះអាងថាខ្លួនជាមន្រ្តីនគរបាល និងដកកាំភ្លើងគំរាមបាញ់គេ
