(ភ្នំពេញ)៖ ក្នុងដំណើរទៅប្រារព្ធពិធីបុណ្យហាជ្ជរបស់សាសនាឥស្លាម ដែលមានសាសនិកឥស្លាមទូទាំងពិភពលោក បានកំពុងចេញដំណើរជាបណ្តើរៗ ទៅកាន់ក្រុងម៉ាកា ប្រទេសអារ៉ាប៊ីសាអីឌីត ដើម្បីប្រារព្ធពិធីបុណ្យហាជ្ជនៅទីតាំងប្រវត្តិសាស្រ្តកកើតសាសនាឥស្លាម ដែលទទួលមនុស្សរាប់លាននាក់។

ថ្លែងប្រាប់អង្គភាព Fresh News នៅថ្ងៃទី០៩ ខែសីហា ឆ្នាំ២០១៨នេះ លោក អូស្មាន ហាស្សាន់ រដ្ឋមន្ដ្រីប្រតិភូអមនាយករដ្ឋមន្ដ្រី បានបញ្ជាក់ថា ប្រទេសកម្ពុជា ក៏មាន​សាសនិកឥស្លាមបានធ្វើដំណើរជាច្រើនកុះករទៅកាន់ទីនេះដូចគ្នា ដែលតាមការគ្រោងមាន​ចំនួន​១០០៨នាក់ ហើយតាំងពីដើមខែសីហា ឆ្នាំ២០១៨ មកដល់ថ្ងៃនេះ ភ្ញៀវដែលបានចេញដំណើរ បានជិត​៨០០នាក់ហើយ ខណៈជាង​២០០នាក់​ទៀត នឹងត្រូវចេញដំណើរនៅថ្ងៃទី​១១ ខែសីហា និងថ្ងៃទី​១៣ ខែសីហា ឆ្នាំ​២០១៨ខាងមុខ។​

ដោយឡែកលោក អូស្មាន ហាស្សាន់ ​និង​ថ្នាក់ដឹកនាំឥស្លាមមួយចំនួនទៀត បានអញ្ជើញជូនដំណើរ​ដល់ភ្ញៀវជាតិ ដែលបន្តចេញដំណើរកាលពីព្រឹកថ្ងៃទី​០៩ ខែសីហា ឆ្នាំ​២០១៨នេះ មានចំនួន​១៣០បន្ថែមទៀត។​

បើតាមលោក អូស្មាន ហាស្សាន់ ក្នុងនាមថ្នាក់ដឹកនាំឥស្លាមមួយរូបនោះ លោកសូមជូនពរឲ្យការធ្វើដំណើរទាំងទៅទាំងមក សូមទទួលបានសុខសុវត្ថិភាព និង​ទទួលបានការប្រារព្ធពិធីបុណ្យដោយជោគជ័យ៕