(ភ្នំពេញ)៖ ករណីចោទប្រកាន់ថា កូនបានប្រើអំពើហិង្សាលើឪពុកបង្កើត ដើម្បីឲ្យផ្ដិតមេដៃលើលិខិតស្នាម ឬឯកសារផ្សេងៗ ដើម្បីផ្ដល់ប្រយោជន៍ណាមួយនោះ នៅថ្ងៃទី០៩ ខែសីហា ឆ្នាំ២០១៨នេះ តំណាងកូនៗទាំង៧នាក់ សូមធ្វើការបំភ្លឺ និងបកស្រាយត្រឡប់ទៅវិញថា មិនបានប្រើប្រាស់អំពើហិង្សាលើឪពុករបស់ខ្លួន ដើម្បីតែចង់បានស្នាមមេដៃអ្វីនោះទេ ពោលគ្រាន់តែនាំឪពុកមកពិនិត្យ និងព្យាបាលជំងឺ និងដើរលេងកម្សាន្ដទៅខេត្តកោះកុងប៉ុណ្ណោះ។
ធ្វើដំណើរមកដល់ការិយាល័យព័ត៌មាន Fresh News នៅរសៀលថ្ងៃនេះ តំណាងកូនៗ បានអះអាងថា ស្នាមមេដៃដែលឪពុករបស់ខ្លួនបានផ្ដិតនោះ គឺលើកិច្ចព្រមព្រៀមបញ្ចប់វិវាទ និងសះជាជាមួយឪពុក និងកូន ព្រោះដើម្បីមើលថែឪពុកដែលកាត់តែមានវ័យចាស់ណាស់ហើយ ដោយកន្លងទៅឪពុកបានប្ដឹងទៅតុលាការ ដើម្បីកាត់កាលកូនទាំង៧នាក់។
លោក លី ឈឹមឆន អាយុ៣១ឆ្នាំ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប បានថ្លែងយ៉ាងដូច្នេះថា «នៅថ្ងៃកើតហេតុដែលពួកខ្ញុំជាកូន យកគាត់ (ឪពុក) ចេញពីផ្ទះមិនមែនចាប់ជំរិតអ្វីនោះទេ គឺយកមករាជធានីភ្នំពេញ ពិនិត្យ និងព្យាបាលជំងឺ ហើយបាននាំគាត់ទៅលេងដែលធ្វើប៉េអឹម នៅខេត្តកោះកុង។ ហើយរឿងផ្ដិតមេដៃនោះ គឺមានពិតមែន ប៉ុន្ដែជាការផ្ដិតមេដៃដើម្បីសះជារឿងកាត់កាលកូនប៉ុណ្ណោះ»។
សូមជម្រាបថា ការចេញមកបំភ្លឺយ៉ាងដូច្នេះ បានធ្វើឡើងបន្ទាប់ពីមានការចោទប្រកាន់ថា បុរសម្នាក់អាយុ៧៣ឆ្នាំ មានទីលំនៅភូមិធ្លកអណ្ដូង សង្កាត់ស្លក្រាម ក្រុងសៀមរាប ខេត្តសៀមរាប ត្រូវបានកូនៗ៧នាក់ ប្រើប្រាស់អំពើហិង្សា និងចាប់ដាក់ក្នុងរថយន្ដចេញពីខេត្តសៀមរាប ទៅខេត្តកោះកុង តែពេលមកដល់ រាជធានីភ្នំពេញ ក៏ដាក់ថ្នាំដើម្បីឲ្យផ្ដិតមេដៃនៅលើលិខិតស្នាម និងឯកសារផ្សេងៗ ជាប្រយោជន៍របស់ពួកគេទាំង៧នាក់ ខណៈជនរងគ្រោះមិនបានស្ម័គ្រចិត្ត បន្ដិចណាសោះ។
យ៉ាងណាក៏ដោយ សម្រាប់ករណីនេះលោក ជា ហៃ ជាមេធាវីរបស់ជនរងគ្រោះឈ្មោះ មិន ឡម ហៅ លី ឡម អាយុ៧៣ឆ្នាំ តាមរយៈអង្គភាព Fresh News នៅថ្ងៃទី០៧ ខែសីហា ឆ្នាំ២០១៨ បានចេញសេចក្ដីជូនដំណឹង ស្ដីអំពីការសុំមោឃភាពចោលទាំងស្រុង លើលិខិតស្នាម និងឯកសារផ្សេងៗ ដែលកូនក្ដីរបស់ខ្លួនបានផ្ដិតមេដៃដោយសារការបង្ខិតបង្ខំ៕
