(ភ្នំពេញ)៖ បច្ចុប្បន្ន សិស្សានុសិស្សភាគច្រើន សុទ្ធសឹងតែបញ្ចប់ការសិក្សានៅសាកលវិទ្យាល័យ ដោយបានប្រឡងចេញនូវចំណេះជំនាញ តាមរយៈការសរសេរសារណា ឬ និក្ខេបបទផ្សេងៗជាដើម។ មិនខុសគ្នាប៉ុន្មានឡើយ ចំពោះសាលាមធ្យមសិក្សាវិចិត្រសិល្បៈ ក៏តម្រូវឲ្យសិស្សានុសិស្ស ត្រូវប្រឡងចេញ ទៅតាមឯកទេសជំនាញរៀងៗខ្លួន ដើម្បីបញ្ចប់សញ្ញាប័ត្រ អាចបន្តការសិក្សានៅសាកលវិទ្យាល័យ ភូមិន្ទវិចិត្រសិល្បៈ បន្ថែមទៀត។ យ៉ាងណាមិញ ក្រោមការខិតខំប្រឹងប្រែងសិក្សា ក្រេបជញ្ជក់ចំណេះជំនាញ អស់រយៈពេលជាច្រើនឆ្នាំហើយនោះ សាលាមធ្យមសិក្សាវិចិត្រសិល្បៈ បានរៀបចំកម្មវិធីប្រឡងឯកទេសជំនាញ បញ្ចប់សញ្ញាបត្រសិល្បៈ និង ស្មាតកបត្រសិល្បៈឆ្នាំសិក្សា ២០១៧-២០១៨ បានចាប់ផ្ដើមដំណើរការបង្ហាញសមត្ថភាព ហើយកាលពីព្រឹកមិញនេះ ដោយមានការអញ្ជើញចូលរួមពីលោក សោម សុគន្ធ រដ្ឋលេខាធិការ តំណាងឲ្យលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ។
អ្វីដែលកាន់តែពិសេស គឺមានការសម្ដែងនូវទស្សនិយភាព ដ៏គួរឲ្យជក់ចិត្ត ជាមួយនឹងចង្វាក់រស់រវើក កាយវិការទន់ភ្លន់ នៅលើឆាក ធ្វើឲ្យទស្សនិកជនទស្សនា ស្ទើរតែមិនចង់ប្រិចភ្នែក។
កម្មវិធីប្រឡងឯកទេសជំនាញខាងលើនេះ បានធ្វើឡើងនាព្រឹកថ្ងៃព្រហស្បតិ៍ ១៣ រោច ខែទុតិយសាឍ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី៩ ខែ សីហា ឆ្នាំ ២០១៨ នៅឯភូមិបឹងបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដោយមានការអញ្ជើញចូលរួមយ៉ាងច្រើនកុះករ ពីសំណាក់មហាជនយុវវ័យ មិនថាក្មេងចាស់ ប្រុសស្រី ចូលរួមទស្សនា។
ជាមួយគ្នានេះ រដ្ឋលេខាធិការក្រសួងវប្បធម៌ លោក សោម សុគន្ធ ក៏បានថ្លែងថា ការប្រឡងឯកទេសជំនាញបញ្ចប់សញ្ញាប័ត្រសិល្បៈ និងស្មាតកបត្រសិល្បៈ នៅសាលាមធ្យមសិក្សាវិចិត្រសិល្បៈនេះ ពិតជាមានសារៈសំខាន់ខ្លាំងណាស់ សម្រាប់ប្អូនៗ ក្មួយៗ ទាំងប្រុសស្រី ដែលមានវ័យក្រោម ២០ឆ្នាំ មុនឈានទៅសិក្សាថ្នាក់មហាវិទ្យាល័យ។ បន្ថែមពីនេះលោក ក៏បានជំរុញលើកទឹកចិត្ត ដល់ក្មួយៗ ដែលជាសិស្សានុសិស្សកំពុងសិក្សា មុខជំនាញផ្នែកសិល្បៈប្រពៃណីបុរាណ ត្រូវខិតខំរៀនសូត្រឲ្យបានល្អ និង ត្រូវចេះឲ្យស្ទាត់ជំនាញ ដើម្បីមានឱកាសបង្ហាញសមត្ថភាព នៅលើឆាកជាតិ និងអន្តរជាតិ នាពេលខាងមុខ។ អ្វីដែលកាន់តែពិសេស ឱកាសដែលហុចមកឲ្យសិក្សានុសិស្សនោះ គឺជាពេលវេលាមួយ ដែលធ្វើឲ្យពិភពលោកស្គាល់កាន់តែច្បាស់ ពីវប្បធម៌ប្រពៃណីជាតិដ៏ស្រស់ផូរផង់របស់ខ្មែរ តាមរយៈវិស័យសិល្បៈ ហើយក៏ដូចជា ទំពាំងស្នងឫស្សី ចូលរួមជួយថែរក្សានូវកេរិ៍តតំណែល ពីដូនតាខ្មែរ។
ទន្ទឹមនឹងនេះ លោក វិន ឡៃជូ អគ្គនាយករងបច្ចេកទេសវប្បធម៌ និងជានាយកស្ដីទីសាលាមធ្យមសិក្សាវិចិត្រសិល្បៈ ក៏បានបន្ថែមថា ក្រោយពីសិស្សបញ្ចប់ការសិក្សាសញ្ញាប័ត្របាក់ឌុប ដែលមានចំណេះជំនាញឯកទេសរៀងៗខ្លួន អាចយកទៅប្រកបរបរចិញ្ចឹមជីវិតបាន ហើយកន្លងមក មានសិស្សមួយចំនួនក៏មានឱកាស បានចេញទៅធ្វើការនៅក្រៅប្រទេស ទៀតផង។
សូមជម្រាបថា ការប្រឡងឯកទេសជំនាញបញ្ចប់សញ្ញាប័ត្រសិល្បៈ និងស្មាតកបត្រសិល្បៈឆ្នាំសិក្សា ២០១៧-២០១៨ នេះ បេក្ខជនបានយករបាំប្រពៃណីខ្មែរ មកធ្វើការបង្ហាញជូនមានដូចជា របាំបុរាណ «ឈួយឆាយបួងសួង» , របាំប្រពៃណី«ល្បុក្កតោ» , ល្ខោនយីកេ«មាយើង», សៀក«មហិទ្ធិឫទ្ធិនាគរាជ», ល្ខោននិយាយ «កំពង់ធំជំរុំចិត្ត» និងល្ខោនបាសាក់ «មរណមាតា»។ ការប្រឡងនេះ មានរយៈពេល ៣ ថ្ងៃ គឺចាប់ពីព្រឹកថ្ងៃទី ០៩ ខែ សីហា ដល់ថ្ងៃទី ១១ ខែ សីហា ឆ្នាំ ២០១៨ ខាងមុខនេះ៕
