(ប៉ៃលិន)៖ មន្រ្តីកាំកុងត្រូលខេត្តប៉ៃលិន នៅថ្ងៃទី៩ ខែសីហា ឆ្នាំ២០១៨ សហការជាមួយមន្ទីរពាណិជ្ជកម្ម បានបន្តចុះពិនិត្យ និងផ្សព្វផ្សាយអំពីគុណភាព និងសុវត្ថិភាពម្ហូបអាហារដែលដាក់តាំងលក់ នៅផ្សារ ប៉ាងរលឹម និងតាមគេហដ្ឋាន ស្ថិតនៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដែលយុទ្ធនាការនេះដឹកនាំដោយលោក ឈឹម វាសនា ប្រធានសាខា។
លោក ឈឹម វាសនា ប្រធានសាខាកាំកុងត្រូលខេត្តប៉ៃលិន បានឲ្យដឹងថា នៅក្នុងការចុះពិនិត្យរកទំនិញខូចគុណភាពនៅក្នុងផ្សារ គឺបានធ្វើតេស្តបឋមទៅលើផលិតផលមួយចំនួនដែលដាក់តាំងលក់។
បើតាមលោក ឈឹម វាសនា មន្រ្តីកាំកុងត្រូលរបស់លោកបានរកឃើញទំនិញមួយចំនួនដែលខូចគុណភាពផងដែររួមមាន៖ ទឹកក្រូចដបជ័រ, ភេសជ្ជះកំប៉ុង, ស្រាបៀរដប, ស្រាបៀរកំប៉ុង, មីកំប៉ុង, ទឹកម្ទេសដប, ស្ករគ្រាប់ដូង, ចាហ៊ួយកញ្ចប់ និងប័រប្រអប់សរុបចំនួន401.5គីឡូក្រាម។
ជាមួយគ្នានេះ លោកប្រធានសាខាក៏បានសំណូមពរ ដល់អាជីវករទាំងអស់ សូមកុំខឹងមន្រ្តីកាំកុងត្រូល ដែលចុះទៅពិនិត្យ និងដកហូតទំនិញខូចគុណភាពទាំងនោះ ព្រោះថាបើមិនដកហូតទេ មិនដឹងថា ប្រជាពលរដ្ឋ ប៉ុន្មាននាក់ដែលទទួលទាន ហើយខូចសុខភាពនោះ។
លោកក៏បានអំពាវនាវ ដល់អាជីវករ អ្នកលក់ដូរទាំងអស់ឲ្យប្រុងប្រយ័ត្ន និងយកចិត្តទុកដាក់ខ្ពស់ គឺលក់ដូរ និងចែកចាយតែទំនិញ ផលិតផលម្ហូបអាហារណាដែលមានគុណភាព មិនប៉ះពាល់ដល់ សុខមាលភាព អ្នកប្រើប្រាស់។
ជាមួយគ្នានោះដែរក្រុមការងារ បានបិទផ្សាយនូវ រូបភាព Poster និងផ្សព្វផ្សាយដល់អាជីវករអ្នកលក់ដូរ អ្នកប្រើប្រាស់ឲ្យបានយល់ ដឹងអំពីផលវិបាកដែលបណ្តាលការ បរិភោគអាហារហួសកាលបរិច្ឆេទ ប្រើប្រាស់ និងការដាក់លាយបន្ថែមសារធាតុគីមី ហាមឃាត់ចូលក្នុងម្ហូបអាហារ៕
