(បន្ទាយមានជ័យ)៖ ស្ថាប័នត្រួតពិនិត្យគ្រឿងញៀនកម្ពុជា-ថៃ ដឹកនាំដោយលោកស្រីឧត្តមសេនីយ៍ ជ័យ បុប្ផា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន លោក ប៉ាស្កន វានិចស៊ីរី និងលោក អ៉ំ រាត្រី អភិបាលរងខេត្ត នៅថ្ងៃទី៨ ខែសីហា ឆ្នាំ២០១៨នេះ បានចុះទស្សនាមណ្ឌលព្យាបាល អ្នកញៀនជីវិតថ្មីភ្នំបាក់ ដែលគ្រប់គ្រងដោយមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ស្ថិតនៅសង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
ក្នុងឱកាសនោះ លោក ភា មានិត អនុប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត និងជាតំណាងគណៈគ្រប់គ្រងមណ្ឌល បានថ្លែងថា មណ្ឌលរបស់លោកមកទល់បច្ចុប្បន្នបានព្យាបាល និងស្តារនីតិសម្បទា និងសមាហរណកម្មអ្នកញៀន ដែលបានជាសះស្បើយ បានជាង៤,៧០០នាក់ ក្នុងនោះស្រ្តី៣០១នាក់ហើយ។
ក្នុងឱកាសនោះដែរ លោក អ៊ុ រាត្រី អភិបាលរង និងជាប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀន ខេត្តបានបន្ថែមថា មណ្ឌលជីវិតថ្មីភ្នំបាក់បានព្យាបាលជនរងគ្រោះដោយសារគ្រឿងញៀនតាមរយៈការធ្វើចលនាលំហាត់ប្រាណ អប់រំចិត្តសាស្រ្ត ធ្វើពលកម្ម អនាម័យ លេងកីឡា និងបណ្តុះបណ្តាលវិជ្ជាជីវៈកសិកម្ម ចិញ្ចឹមមាន់ ដាំបន្លែ ចឹញ្ចឹមត្រី កង្កែប ជ្រូក កែឆ្នៃផ្លែឈើ កាត់ដេរក្រណាត់ជូតជើង និងកម្រាលជូតជើង។
ជាមួយគ្នានេះ លោក ប៉ាស្កន វានិចស៊ីរី បានថ្លែងនូវកោតសសើរដល់គណ:គ្រប់គ្រងមណ្ឌល និងថ្នាក់ដឹកនាំខេត្តបន្ទាយមានជ័យ ដែលបានខិតខំធ្វើការអភិវឌ្ឍខ្លួនដើរទៅមុខ ក្នុងការផ្តល់សេវាព្យាបាលអ្នកញៀនគ្រឿងញៀន ឱ្យបានជាសះស្បើយ និងធ្វើសមាហរណកម្មទៅរស់នៅសហគមន៍មូលដ្ឋានវិញ ក្លាយជាពលរដ្ឋល្អចូលរួមកសាងប្រទេសជាតិ។
ក្នុងថ្ងៃដដែលនោះ គណ:ប្រតិភូស្ថាប័នត្រួតពិនិត្យគ្រឿងញៀនទាំងពីរកម្ពុជា-ថៃ បានបន្តដំណើរទៅទស្សនាប្រាសាទបន្ទាយឆ្មារ ស្ថិតនៅក្នុងឃុំបន្ទាយឆ្មារ ស្រុកថ្មពួក មានចម្ងាយ៦០គីឡូម៉ែត្រ ទីរួមខេត្តបន្ទាយមានជ័យ ដែលជាកេរដំណែលដូនតាបន្សល់ទុកជូនកូនខ្មែរ គ្រប់ជំនាន់គោរពបូជាតទៅផងដែរ៕
