(ភ្នំពេញ)៖ ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅថ្ងៃទី០៦ ខែសីហា ឆ្នាំ២០១៨នេះ បានទទួលជួបលោកស្រី Elizabeth McGarva ទីប្រឹក្សាជាន់ខ្ពស់គម្រោង DFID ចក្រភពអង់គ្លេស ដើម្បីពិភាក្សាការងារមួយចំនួន ពាក់ព័ន្ធការផ្តល់ថវិកាជំនួយរបស់ចក្រភពអង់គ្លេស ដល់វិស័យសកម្មភាពមីននៅកម្ពុជា។
លោកស្រី Elizabeth បានបញ្ជាក់ថា គម្រោងនឹងបន្តគាំទ្រដល់ប្រតិបត្តិករ NPA HALO និង MAG រហូតដល់ឆ្នាំ២០២០ ដោយផ្តោតទៅលើការបោសសម្អាតដី ដែលមានមីន និងសំណល់ជាតិផ្ទុះសល់ពីសង្រ្គាម ការអប់រំផ្សព្វផ្សាយយល់ដឹងអំពីមីន និងការផ្តល់នូវការអប់រំបណ្តុះបណ្តាល ដើម្បីបង្កើនសមត្ថភាពដល់ អង្គភាពពាក់ព័ន្ធនឹងវិស័យសកម្មភាពមីន ជាពិសេសការកសាងសមត្ថភាពបុគ្គលិកបម្រើការក្នុងការិយាល័យគ្រប់គ្រងទិន្ន័យ នៃអង្គភាពអាជ្ញាធរមីន។
ទេសរដ្ឋមន្ត្រី លី ធុជ បានថ្លែងអំណរគុណដល់គណៈប្រតិភូ ដែលបានបង្ហាញឆន្ទៈក្នុងការបន្តជួយដោះស្រាយបញ្ហាមីន និងសំណល់ជាតិផ្ទុះ សល់ពីសង្រ្គាមនៅកម្ពុជា។
លោកទេសរដ្ឋមន្ដ្រី បានជម្រាបដល់គណប្រតិភូអំពីការប្តេជ្ញាចិត្ត របស់រាជរដ្ឋាភិបាល ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី ក្នុងការដោះស្រាយបញ្ហាមីន និងសំណល់ជាតិផ្ទុះសល់ពីសង្រ្គាម ដែលបានធ្វើឲ្យប៉ះពាល់ដល់ការអភិវឌ្ឍសេដ្ឋកិច្ច-សង្គមយ៉ាងខ្លាំងនៅកម្ពុជា និងការងារធំៗមួយចំនួន ដែលអាជ្ញាធរមីនកំពុងតែធ្វើ ដូចជាការបង្កើតយុទ្ធសាស្ត្រគ្មានមីននៅកម្ពុជា ការបង្កើតគណៈកម្មការសម្រាប់ពិនិត្យមើលការអនុវត្ត ផែនការយុទ្ធសាស្ត្រជាតិវិស័យសកម្មភាពមីន២០១៨-២០២៥។
ជាមួយគ្នានោះ ទេសរដ្ឋមន្ត្រី លី ធុជ ក៏បានស្នើសុំឲ្យចក្រភពអង្គគ្លេសបន្តម្រោង DFID រហូតដល់ឆ្នាំ២០២៥ ឲ្យស្របតាមយុទ្ធសាស្រ្តជាតិសកម្មភាពមីន៕
