(ភ្នំពេញ)៖ ក្រសួងធនធានទឹក និងឧតុនិយម នៅថ្ងៃទី៣០ ខែកក្កដា ឆ្នាំ២០១៨នេះ បានបញ្ជាក់ថា សង្កាត់ចំនួន៤ ក្នុងក្រុងស្ទឹងត្រែង ត្រូវបានទឹកជំនន់ទន្លេមេគង្គ លិចចូលជាបណ្តើរៗហើយ។ នេះបើតាមការចេញផ្សាយ តាមរយៈ Facebook របស់ក្រសួងធនធានទឹក នាព្រឹកនេះ។

ក្រសួងធនធានទឹក បានបញ្ជាក់ឲ្យដឹងយ៉ាងដូច្នេះថា «មកដល់ម៉ោង១១ព្រឹក ថ្ងៃទី៣០ ខែកក្កដា ឆ្នាំ២០១៨នេះ ទឹកទន្លេមេគង្គ ក្នុងខេត្តស្ទឹងត្រែង បានបន្តកើនឡើងដល់កម្ពស់ ១០,៨០ ម៉ែត្រ (កម្ពស់ប្រកាសឲ្យប្រុងប្រយ័ត្ន ១០,៧០ ម៉ែត្រ)»។

ក្រសួងធនធានទឹក បានបន្ថែមទៀតថា «ទឹកទន្លេ បានលិចចូលតំបន់ទំនាបមួយចំនួន ក្នុងសង្កាត់ចំនួន០៤ របស់ក្រុងស្ទឹងត្រែង ជាបណ្តើរៗហើយ ក្នុងនោះ មានសង្កាត់ព្រះបាទ សង្កាត់ស្រះឫស្សី សង្កាត់ស្ទឹងត្រែង និងសង្កាត់សាមគ្គី»៕