(វ៉ាស៊ីនតោន)៖ ក្រុមហ៊ុនអាកាសចរណ៍​អាមេរិក Southwest Airlines បានឲ្យដឹងថា​​ហេតុការណ៍​ដ៏អាក្រក់មួយកាលពី​ខែមេសាកន្លង​ទៅ​ ដែលបានបណ្តាល​ឲ្យស្រ្តីជាអ្នកដំណើរ​ម្នាក់បាត់បង់​ជីវិតនោះ បានធ្វើឲ្យខ្លួន​ខាតបង់ថវិកាក្នុងមុខជំនួញ​អស់​ប្រមាណ ១០០លាន​ដុល្លារ​។ នេះបើតាម​ការដកស្រង់ការផ្សាយ​ចេញពី វែបសាយ CNN Money នៅព្រឹក​ថ្ងៃ​សុក្រ ទី២៧ ខែកក្កដា ឆ្នាំ២០១៨។

ក្រុមហ៊ុនអាកាសចរណ៍​ដែលមានមូលដ្ឋាន​​នៅក្រុង Dallas នៃរដ្ឋតិចសាស់ បានចេញរបាយកាណ៍​​បង្ហាញឲ្យឃើញ​ពី ​ប្រាក់ចំណូល​​ដ៏​រឹងមាំ​នៅត្រីមាសទីពីរ ប៉ុន្តែ Southwest Airlines បានគូស​បញ្ជាក់ថា ខ្លួននៅតែ​មានអារម្មណ៍​​ថា បានទទួលរងផល​ប៉ះពាល់ពី​គ្រោះថ្នាក់​​នៃជើងហោះហើរ​ 1380 ដែល​បានធ្វើឲ្យ​អ្នកដំណើរ​ម្នាក់ស្លាប់ ក្រោយពីស្រ្តី​រូបនេះ ត្រូវកម្លាំង​ខ្យល់ទាញចេញតាមបង្អួច​ពាក់កណ្តាល​​ខ្លួន។

គួរជម្រាបថា ​​ប៉ុន្មាន​ខែកន្លងទៅនេះ​ក្រុមហ៊ុន​​អាកាសចរណ៍ Southwest បានទទួល​ការរិះ​គន់ជាខ្លាំងក្រោយ​ពី​ម៉ាស៊ីន​​ប្រភេទ CFM56-7B នៅ​ស្លាបមួយ​ចំហៀងរបស់​​​យន្តហោះ Boeing 737-700 របស់​ខ្លួន​បានផ្ទុះ នៅក្នុងជើង​ហោះហើរ​កាលពី​ថ្ងៃទី១៧ ខែមេសា ដែល​បាន​​ធ្វើ​ឲ្យ​បែក​កញ្ចក់បង្អួច​រហូតឈានធ្វើឲ្យ​អ្នកដំណើរតែម្នាក់​ប៉ុណ្ណោះឈ្មោះ ជែននីហ្វឺ រីយ៉ូដាន (Jennifer Riordan) ដែល​អង្គុយ​នៅជាប់នោះ និងស្ថិតក្នុង​ចំណោម​​មនុស្សទាំងអស់ ១៤៩នាក់ នៅលើយន្តហោះ បានបាត់​​បង់​ជីវិត៕