(ព្រៃវែង)៖ សកម្មជនគណបក្សប្រជាជនកម្ពុជា លោកគ្រូ អ្នកគ្រូខ្មែរឥស្លាម និងតំណាងសមាជិកគណបក្សទូទាំងឃុំមេសរប្រចាន់ ស្រុកពារាំង ខេត្តព្រៃវែង បានប្តេជ្ញាបំពេញសិទ្ធិជាពលរដ្ឋខ្មែរ ទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨នេះ ដើម្បីសម្រេចជ្រើសរើសមេដឹកនាំគណបក្ស ដែលផ្តល់សេចក្តីសុខសន្តិភាព សេរីភាព ប្រជាធិបតេយ្យ និងអភិវឌ្ឍន៍។
ការប្តេជ្ញានេះ ធ្វើឡើងនៅព្រឹកថ្ងៃទី២៦ ខែកក្កដា ឆ្នាំ២០១៨ នៅបរិវេណព្រះវិហារភូមិអណ្តូង ក្នុងពិធីសំណេះសំណាល និងឃោសនារកសំឡេងឆ្នោត ជូនគណបក្សប្រជាជនកម្ពុជា ដឹកនាំដោយលោក អូស្មាន ហាស្សាន់ ប្រធានគណៈចលនាសាសនិកឥស្លាមរបស់គណបក្សប្រជាជនកម្ពុជា និងលោកស្រី ដែលមានវត្តមានពី លោក លីវ សុផារិទ្ធ អនុប្រធានក្រុមការងារចុះជួយ ឃុំមេសរប្រចាន់ និងលោក លោកស្រី សមាជិក សមាជិកា គណៈចលនាសាសនិកឥស្លាម របស់គណបក្សប្រជាជនកម្ពុជា។
លោក អូស្មាន ហាស្សាន់ បានក្រើនរំលឹកដល់អ្នកគ្រប់គ្នាថា ការដោះស្រាយបញ្ហា និងសម្រេចជោគវាសនា នៃអនាគតរបស់យើង គឺគ្មានអ្វីសំខាន់ជាង ការសម្រេចចិត្តដ៏ត្រឹមត្រូវ ទៅបោះឆ្នោតជូនគណបក្សប្រជាជនកម្ពុជា ដែលឈរនៅលំដាប់លេខរៀងទី២០។
លោក អូស្មាន ហាស្សាន់ បានផ្តល់កម្លាំងចិត្ត និងជំរុញ ដល់សហគមន៍ខ្មែរឥស្លាមរបស់លោកឲ្យបន្តគាំទ្រគណបក្សប្រជាជនកម្ពុជា កាន់តែច្រើនឡើងថែមទៀត ទោះបីកន្លងមក សំឡេងគាំទ្ររបស់ខ្មែរឥស្លាម គឺបានគាំទ្រដល់គណបក្សកាន់អំណាច ក្នុងកម្រិតភាគរយយ៉ាងខ្ពស់បំផុតក្តី៕
