(ភ្នំពេញ)៖ ស្ថានីយទូរទស្សន៍ កងយោធពលខេមរភូមិន្ទ ប៉ុស្ដិ៍លេខ៥ បានរៀបពិធីក្រុងពាលី ថតភាពយន្តភាគថ្មី រឿង «កញ្ញាជើងខ្លាំង» នាថ្ងៃទី២៤ ខែកក្កដា ឆ្នាំ២០១៨នេះ នៅឯសណ្ឋាគារសូហ្វីតែភ្នំពេញ ដោយទាំងតារាសម្ដែង និងផលិតករ មានការចាប់អារម្មណ៍យ៉ាងខ្លាំង ដោយសារតែក្នុងពិធីនេះ មានការបង្ហាញខ្លួន ដោយឯកអគ្គរាជទូតថៃប្រចាំនៅកម្ពុជា លោក ប៉ានីយ៉ារ៉ាក់ ពូលធុប និងលោក Nuttavudh Photisaro អតីតឯកអគ្គរាជទូតថៃប្រចាំនៅកម្ពុជា ដែលនេះជាវត្តមានដ៏កម្រ សម្រាប់ពិធី ដែលគ្រាន់តែក្រុងពាលីរឿងសាមញ្ញៗ ធម្មតាប៉ុណ្ណោះ។
តំណាងស្ថានីយទូរទស្សន៍ ប៉ុស្ដិ៍លេខ៥ បានថ្លែងឲ្យដឹងថា លោក ប៉ានីយ៉ារ៉ាក់ ពូលធុប ឯកអគ្គរាជទូតថៃប្រចាំនៅកម្ពុជា និងឯកអគ្គរាជចាស់ Nuttavudh Photisaro ដែលបានបង្ហាញវត្តមានចូលរួមក្នុងកម្មវិធី ក្រុងពាលីថតរឿងថ្មីនៅពេលនេះ គឺលោកទាំងពីរចង់ចូលរួមលើកកម្ពស់ ការផលិតភាពយន្តខ្មែរ របស់ប៉ុស្ដិ៍លេខ៥ ឲ្យមានស្ដង់ដា និងជឿនលឿនដូចជានៅក្នុងប្រទេសថៃ ទើបសម្រេចចិត្តមកចូលរួម ហើយជួយកែលម្អចំណុចខ្វះចន្លោះ ក៏ដូចជាដើម្បីលើកទឹកចិត្ត ដល់តារាសិល្បៈខ្មែរផងដែរ។
តំណាងនៅប៉ុស្ដិ៍លេខ៥ ដដែលបានអះអាងបន្តទៀតថា ពិធីក្រុងពាលីថតរឿងលើកនេះ ប៉ុស្ដិ៍លេខបានទទួលកិត្តិយសពីទូតប្រទេសថៃ ដោយត្រូវបានឯកអគ្គរាជទូតថ្មីរបស់ថៃ ដែលទើបកាន់តំណែងបានប្រមាណ៥ខែ មកចូលរួមអបអរ ដើម្បីបានស្គាល់ពីទម្រង់នៃការផលិតរឿងភាគរបស់ខ្មែរ ប្រចាំនៅប៉ុស្ដិ៍លេខ៥។ ម្យ៉ាងទៀត ហេតុផលដែលតំណាងជាន់ខ្ពស់ របស់ស្ថានទូតថៃ មកដល់ពិធីនេះ គឺដើម្បីជំរុញឲ្យផលិតករថៃ ដែលជាអ្នកដឹកនាំ និងផលិតភាពយន្តប្រចាំប៉ុស្ដិ៍លេខ៥ ជាពិសេសគឺរឿង «កញ្ញាជើងខ្លាំង» ដែលទើបក្រុងពាលី ឲ្យប្រឹងប្រែងផលិតឲ្យបានល្អ ដើម្បីបម្រើដល់អារម្មណ៍របស់អ្នកទស្សនា ឲ្យពេញចិត្តពេញថ្លើម។
សូមបញ្ជាក់ថា រឿង «កញ្ញាជើងខ្លាំង » មានចំនួនជាង ៣០ ភាគ ដែលត្រូវចំណាយពេល វេលាថតរហូតដល់ទៅជាងបីខែ ក្នុងរឿងនេះដែរ គឺបង្កប់ទៅដោយការអប់រំ និង លើកស្ទួយនូវវប្បធម៌ខ្មែរ ជាពិសេស ខាងទូរទស្សន៍មិនខ្វល់ថា តួអង្គសម្តែងនៅក្នុងរឿងនេះជាតួអង្គថ្មី ដែលមិនសូវមានឈ្មោះល្បី អ្វីដែលសំខាន់ គឺតួឯកប្រុសស្រីទាំងពីររូបនេះ ត្រូវបានជ្រើសរើសយ៉ាងសម្រិតសម្រាំងបំផុត មុននឹងយកមកសម្តែង ពួកគេពិតជាមានទេកោសល្យសម្តែងល្អ និងធ្វើឲ្យអ្នកដឹកនាំពេញចិត្ត ស្នាដៃទាំងនេះហើយដែលយើងទុកចិត្ត ដោយសង្ឃឹមថា ស្នាដៃថ្មី នេះនឹងទទួលបានការគាំទ្រខ្លាំង នៅពេលដែលដាក់បញ្ចាំង។
សម្រាប់តួអង្គសម្តែង នៅក្នុងរឿង «កញ្ញាជើងខ្លាំង » រួមមាន កញ្ញា ស៊ិម ស្រីនិច សម្តែងជាតួស្រីកូនអ្នកក្រ ដែលមានចរិតកាចឆ្នាស់ឆ្នើម មានចិត្តរឹងមាំ និងក្លាហាន។ ចំណែកតួឯកប្រុសវិញ គឺសម្តែងដោយលោក សុខ សាន់នី ដែលមានចរិតអាក្រក់ តែចិត្តល្អ ក្រៅពីនេះមានតារាថ្មីៗជាច្រើនទៀត ចូលរួមដូចជា អ្នកនាង ឌី លីណា , កុមារី អាំង សុជាតា, លោក ឧត្តម , ចេនឡា , ប្រសិដ្ឋ និងតារាល្បីៗជាច្រើនទៀត៕
