(ព្រៃវែង)៖ ក្នុងកម្មវិធីពីរដាច់ដោយឡែកពីគ្នា គឺនៅពេលព្រឹកថ្ងៃទី២៤ ខែកក្កដា ឆ្នាំ២០១៨នេះ លោក ព្រុំ សុខា ប្រធានក្រុមការងារស្រុកបាភ្នំ បានជួបសំណេះសំណាលជាមួយ ប្រជាពលរដ្ឋក្នុងឃុំរក្សជ័យទាំងមូលប្រមាណចំនួន ១៦០០នាក់ និងនៅរសៀលថ្ងៃដដែល លោកប្រធានក្រុមការងារ ក៏បានជួបប្រជុំការងារជាមួយមន្ត្រីក្រុមការងារទាំងអស់ និងមន្ត្រីមូលដ្ឋានមកពីឃុំទាំង៩ ភូមិទាំង១០៨ ក្នុងស្រុកទាំងមូលសរុបទាំងអស់ប្រមាណចំនួន ៤៥០នាក់។
ក្នុងឱកាសនោះ លោកប្រធានក្រុមការងារ ព្រុំ សុខា បានគូសបញ្ជាក់សារជាថ្មីពីសារៈសំខាន់ នៃការចូលរួមបោះឆ្នោតជ្រើសតាំងតំណាងរាស្រ្តនីតិកាលទី៦ នាថ្ងៃទី២៩ ខែកក្កដា ឆ្នាំ២០១៨ នាពេលដ៏ខ្លីខាងមុខនេះ ដោយបានសង្កត់ធ្ងន់ថែមទៀតថា លទ្ធិប្រជាធិបតេយ្យក្នុងប្រទេសទាំងអស់ នៅលើពិភពលោកសុទ្ធតែត្រូវផ្សារភ្ជាប់ជិតស្និទ្ធជាមួយនីតិរដ្ឋ បើពុំនោះសោតទេ លទ្ធិប្រជាធិបតេយ្យគ្រាន់តែជាទ្រឹស្តីទស្សនវិជ្ជាសុទ្ធសាធ ដែលឃ្លាតឆ្ងាយពីតថភាព និងមិនអាចក្លាយជាការពិតជាក់ស្តែងធានា បាននូវគុណតំលៃសម្រាប់ជាផលប្រយោជន៍ដល់ការកសាង និងអភិវឌ្ឍសង្គមជាតិបានឡើយ។
ក្នុងន័យនេះ លោក ព្រុំ សុខា ក៏បានសំណូមពរដល់ប្រជាពលរដ្ឋទាំងអស់ ឱ្យប្រើប្រាស់សិទ្ធិធ្វើម្ចាស់ឱ្យបានខ្ជាប់ខ្ជួនដូចធ្លាប់អនុវត្តតាំងពី២៥ឆ្នាំ កន្លងមកក្នុងការជ្រើសរើសតំណាងស្របច្បាប់របស់ខ្លួន តាមរយៈការបោះឆ្នោតមានលក្ខណៈប្រជាធិបតេយ្យ សេរី ត្រឹមត្រូវ និងយុត្តិធម៌ ដើម្បីចៀសវាងកុំឱ្យធ្លាក់ក្នុងឧបាយកលទុច្ចរិតទាំងឡាយ របស់អ្នកប្រជាធិបតេយ្យក្លែងក្លាយ ដែលកំពុងប្រើប្រាស់ល្បិចកលពិសពុល បោកបញ្ឆោតសាធារណៈមតិ រារាំងប្រជាពលរដ្ឋមិនឱ្យទៅចូលរួមបោះឆ្នោត សំដៅបំផ្លាញការបោះឆ្នោត បំផ្លាញលទ្ធិប្រជាធិបតេយ្យនៅកម្ពុជា។
យុទ្ធនាការ «ម្រាមដៃស្អាត» របស់ក្រុមប្រឆាំងខុសច្បាប់ កំពុងតែបានបង្ហាញច្បាស់នូវសារជាតិក្រឡិចក្រឡុច ប្រជាភិថុត អាត្មានិយម និងឱកាសនិយមរបស់ពួកគេ ជាក់ស្តែង ក្នុងការបោះឆ្នោតកន្លងទៅ ពួកនេះតែងតែមូលបង្កាច់បំផ្លើសការពិត ថ្កោលទោសថាមានការគំរាមកំហែង រារាំងប្រជាពលរដ្ឋមិនឱ្យទៅចុះឈ្មោះបោះឆ្នោត និងទៅចូលរួមបោះឆ្នោតគួបផ្សំជាមួយនឹងការប្រឌិតដទៃទៀត ធ្វើការតវ៉ាប្រឆាំងជារៀងរាល់លើកចំពោះលទ្ធផល នៃការបោះឆ្នោតក្រោមលេសនៃរបស់ដែលហៅថា «បាតុភាពមិនប្រក្រតី»។
តែលើកនេះ គឺពួកគេតែម្តងដែលជាអ្នករារាំងសព្វបែបយ៉ាង មិនឱ្យប្រជាពលរដ្ឋទៅចូលរួមបោះឆ្នោត ហើយថែមទាំងបានចាត់ទុកខ្លួនឯងថា ជាអ្នកការពារលទ្ធិប្រជាធិបតេយ្យ ការពារសិទ្ធិរបស់ប្រជាពលរដ្ឋ។ ការពិតពួកគេកំពុងបំពុលបរិយាកាសសេរី ត្រឹមត្រូវ និងយុត្តិធម៌នៃការបោះឆ្នោតនៅកម្ពុជា ពួកគេកំពុងបំភ័ន្តសាធារណៈមតិជាតិ និងអន្តរជាតិជុំវិញការអនុវត្តសិទ្ធិ និងករណីយកិច្ចរបស់ប្រជាពលរដ្ឋ ក្នុងការចូលរួមបោះឆ្នោតដែលមានចែងក្នុងរដ្ឋធម្មនុញ្ញ និងច្បាប់ជាធរមានរបស់ព្រះរាជាណាចក្រកម្ពុជា។
តើវាជាការត្រឹមត្រូវ ឬទេ ដែលអ្នកវិភាគបញ្ហាសង្គមនិងអ្នកច្បាប់ខ្លះ បានបកស្រាយថាប្រជាពលរដ្ឋមានសិទ្ធិដោយមិនភ្ជាប់ជាមួយករណីយកិច្ច ឬកាតព្វកិច្ច រាប់តាំងពីសកម្មភាពនៃជីវភាពធម្មតាប្រចាំថ្ងៃរបស់ពួកគាត់ រហូតដល់សិទ្ធិ និងករណីយកិច្ចសំខាន់ៗដទៃទៀតដូចជាករណីយកិច្ចនៃការអប់រំរៀនសូត្រ (Compulsory Education) ឬកាតព្វកិច្ចយោធា (Compulsory Military) ក៏ដូចជាការបង់ពន្ធជូនរដ្ឋ ។ល។
ប្រទេសមួយចំនួនដូចជាអូស្ត្រាលី ប៊ែលហ្សិក អាហ្សង់ទីន ប្រេស៊ីល លុចសំបួរ ទូគី ប៉េរូ ស្វីស(សង្កាត់ Schaffhausen) ថៃ សិង្ហបុរី ជាដើម មានច្បាប់ចែងពីករណីយកិច្ចតម្រូវឱ្យពលរដ្ឋខ្លួនត្រូវទៅចូលរួមបោះឆ្នោត (Compulsory Voting) ថែមទៀតផង។
ការទទួលខុសត្រូវទាំងឡាយរបស់ប្រជាពលរដ្ឋ (Civil Responsibilities) ដូចបានរៀបរាប់ខាងលើនេះ ដែលគេអាចចាត់ទុកថាជា «ករណីយកិច្ចចំពោះសហគមន៍ (Duties to Communities)» ត្រូវបានទទួលស្គាល់ក្នុងសេចក្តីថ្លែងការណ៍សកលរបស់អង្គការសហប្រជាជាតិស្តីពីសិទ្ធិមនុស្ស (The United Nations Universal Declaration of Human Rights) ។
ហេតុនេះយើងទាំងអស់គ្នាដែលជាប្រជាពលរដ្ឋកម្ពុជា ត្រូវអនុវត្តសិទ្ធិនិងករណីយកិច្ចរបស់ខ្លួន ដើម្បីទៅចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៦ នាថ្ងៃទី២៩ ខែកក្កដា ឆ្នាំ២០១៨ ខាងមុខនេះកុំបីខាន។
បោះឆ្នោតជូនគណបក្សប្រជាជនកម្ពុជា ឱ្យទទួលបានជ័យជំនះដើម្បីសម្តេចអគ្គមហាសេនាបតីតេជោ ហ៊ុន សែន បន្តដឹកនាំប្រទេសជាតិក្នុងឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត្យ និងវឌ្ឍនភាពសង្គមទៅមុខទៀតជារៀងរហូត៕
