(កំពង់ចាម)៖ លោក ហ៊ុន ម៉ាណែត ប្រធានក្រុមការងារយុវជនថ្នាក់កណ្ដាល សមាជិកគណៈកម្មាធិការកណ្ដាលគណបក្សប្រជាជនកម្ពុជា នៅថ្ងៃទី២២ ខែកក្កដា ឆ្នាំ២០១៨នេះ ដឹកនាំសមាជិក សមាជិកាគណបក្សប្រជាជនកម្ពុជា ប្រមាណ១០,០០០នាក់ រួមគ្នាធ្វើយុទ្ធនាការឃោសនាទ្រង់ទ្រាយធំ ស្វែងរកសំឡេងឆ្នោត នៅក្រុងកំពង់ចាម ខេត្តកំពង់ចាម។
ក្នុងនោះក៏មានការចូលរួមពី លោក លន់ លឹមថៃ ប្រធានកម្មាធិការបក្សខេត្តកំពង់ចាម និងលោក គួច ចំរើន សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាអនុប្រធានកម្មាធិការបក្សខេត្តកំពង់ចាម ក្នុងការហែរក្បួនឃោសនាជិះម៉ូតូក្នុងក្រុងកំពង់ចាម ខេត្តកំពង់ចាម ព្រមទាំងស្រទាប់យុវជនក្នុងខេត្តកំពង់ចាម យុវជន រាជធានីភ្នំពេញ ពោធិ៍សាត់ ព្រះវិហារ និងមកពីបណ្តាប្រទេសនានា រួមមាន ប្រទេសអូស្ត្រាលី អាមេរិក កាណាដា ប៊ែលហ្សិក។
ថ្លែងក្នុងឱកាសនោះ លោក ហ៊ុន ម៉ាណែត បានលើកឡើងថា យុវជនរបស់គណបក្សប្រជាជនកម្ពុជា ជាឆ្អឹងខ្នងនៃការចូលរួមកសាងអភិវឌ្ឍប្រទេសជាតិ ររំដោះប្រទេសពីអាណានិគមបារាំង ចូលរួមវាយពួកចក្រព័ទ្ធ ចូលរួមរំដោះប្រទេសពីរបបប្រល័យ ពូជសាសន៍ ប៉ុល ពត ចូលរួមកសាងប្រទេស ឲ្យមានការអភិវឌ្ឍមកដល់សព្វថ្ងៃនេះ។
បើតាមលោក ហ៊ុន ម៉ាណែត ចំពោះយុវជនរបស់គណបក្សប្រជាជននាពេលបច្ចុប្បន្ននេះ បានទទួលឱកាសច្រើនពីយុវជនរបស់យើង ពីជំនាន់មុនត្រូវរួមគ្នាថែរក្សា សុខសន្តិភាព និងការរីកចម្រើនរបស់ប្រទេសជាតិជាបន្តទៀត ក្រោមការដឹកនាំរបស់គណបក្សប្រជាជនកម្ពុជាកន្លង។
យុវជនដែលបានចូលរួម ក្នុងការហែរក្បួនឃោសនានេះដែរ បានសម្តែងភាពសប្បាយរីករាយ ពេញចិត្ត គោរព ស្រឡាញ់ នៃការដឹកនាំរបស់ គណបក្សប្រជាជនកម្ពុជា និងបានផ្តល់នូវសុខសន្តិភាពជូនជនរួមជាតិទូទាំងប្រទេស មានការរអភិវឌ្ឍរីកចម្រើនរហូត។
ដោយឡែកចំពោះប្រជាពលរដ្ឋដែលនៅតាមគេហដ្ឋាន បានចេញមកទទួល រួមជាមួយការអបអរសាទរចំពោះ សប្បាយរីករាយ នៃការដង្ហែរយុទ្ធនាការឃោសនា បោះឆ្នោតជ្រើសរើសតំណាងរាស្ដ្រ នីតិកាលទី៦នេះ។ យុវជនសមាជិកសមាជិកា ទូទាំងខេត្តកំពង់ចាម នៃគណបក្សប្រជាជនកម្ពុជា បានបេ្តជ្ញាចិត្តទៅចូលរួមបោះឆ្នោត ជូនគណបក្សប្រជាជនកម្ពុជានៅថ្ងៃបោះឆ្នោតទី២៩ ខែកក្កដា ឆ្នាំ២០១៨ខាងមុខនេះ ដើម្បីរក្សាសុខសន្តិភាព និងការអភិវឌ្ឍជាបន្តទៀត៕
