(កំពង់ស្ពឺ)៖ លោក ហ៊ុន ម៉ានី អ្នកតំណាងរាស្រ្តមណ្ឌលកំពង់ស្ពឺ នៅសប្តាហ៍នេះ បានអញ្ជើញចុះពិនិត្យស្ថានភាពទឹកជំនន់ និងសួរសុខទុក្ខបងប្អូនប្រជាពលរដ្ឋដែលរងគ្រោះដោយជំនន់ទឹកភ្លៀង ក្នុងភូមិសាស្រ្តស្រុកភ្នំស្រួច ខេត្តកំពង់ស្ពឺ។
នៅក្នុងឱកាសនោះ លោកតំណាងរាស្រ្ត សូមចូលរួមសោកស្តាយចំពោះការខូចខាត និងប៉ះពាល់ជីវភាពប្រចាំថ្ងៃរបស់បងប្អូនប្រជាពលរដ្ឋ មិនថា តែនៅខេត្តកំពង់ស្ពឺផ្ទាល់ ឬតាមបណ្តាខេត្តនានានោះទេ។
ស្ថិតក្នុងកាលៈទេសៈដែលកម្ពស់ទឹកកំពុងតែឡើងនេះ លោកសូមសំណូមពរឲ្យអាជ្ញាធរបង្កើនការប្រុងប្រយ័ត្នខ្ពស់ ដើម្បីត្រៀមខ្លួនគ្រប់គ្រង ក៏ដូចជា បញ្ចៀសហានិភ័យនានាដែលអាចបង្កនូវផលលំបាកដល់បងប្អូនប្រជាពលរដ្ឋឱ្យអស់ពីសមត្ថភាព។
លោក ហ៊ុន ម៉ានី បានថ្លែងកោតសរសើរ និងគាំទ្រការរក្សាបានសុខសុវត្ថិភាពរបស់ប្រជាជន ស្របតាមចំណាត់ការចេញពីការណែនាំរបស់សម្តេចតេជោ ហ៊ុន សែន ដើម្បីជម្លៀសបងប្អូន មកកាន់ទីទួលសុវត្ថិភាពបានទាន់ពេលវេលា។
គូសបញ្ជាក់ផងដែរថា ថ្មីៗនេះដោយសារតែមានភ្លៀងធ្លាក់ជាបន្តបន្ទាប់ នៅក្នុងស្រុកភ្នំស្រួចទាំងមូល ដែលជាហេតុបង្កឲ្យមានទឹកជំនន់ ក្នុងឃុំចំនួន៧ ក្នុងស្រុកភ្នំស្រួច (ក្រាំងដីវ៉ាយ , ត្រែងត្រយឹង, តាំងស្យា, ដំបូករូង, តាំងសំរោង, ព្រៃរំដួល និងចំបក់) ស្មើនឹង២៣ភូមិ ក្នុងនោះបណ្តាលឲ្យលិចផ្ទះរបស់ប្រជាពលរដ្ឋចំនួន៨ភូមិ និងបណ្តាលឲ្យមានផលប៉ះពាល់ដូចខាងក្រោម៖
*លិចដំណាំស្រូវសរុបចំនួន៤៩០.៥ហិកតា
*ចំការស្វាយសរុបចំនួន២៥២ហិកតា
*ដំណាំរួមផ្សំសរុបចំនួន១៥ហិកតា
*ច្រោះផ្លូវសរុបចំនួន១៤កន្លែង ស្មើនឹង១៣៣៥មែត្រ
*ដាច់ផ្លូវ១៣កន្លែង ស្មើនឹង៧០ម៉ែត្រ
*បាត់គោ៧ក្បាល៕
