(ក្រចេះ)៖ ហេតុការណ៍គ្រោះថ្នាក់ចរាចរណ៍មួយ បានកើតឡើងដោយរថយន្ដសាំយ៉ុង ដឹកឈើមួយគ្រឿង បើកលឿនបែកកង់ក្រោយ បណ្ដាលឲ្យក្រឡាប់ផ្ងារជើង ហើយអ្នកបើកបរ និងអ្នករួមដំណើររងរបួសជាទម្ងន់។ ហេតុការណ៍នេះ នៅល្ងាចថ្ងៃទី១៨ ខែកក្កដា ឆ្នាំ២០១៨ នៅលើផ្លូវជាតិលេខ៧ ចំណុចថ្មបាំង ឃុំគោលាប់ ស្រុកចិត្របុរី ខេត្តក្រចេះ។
មន្ដ្រីនគរបាលចរាចរណ៍ បានឲ្យដឹងថា រថយន្តដឹកឈើមួយគ្រឿងនោះ បើកក្នុងល្បឿនយ៉ាងលឿន ហើយបែកកង់ក្រោយខាងស្ដាំ ក្រឡាប់ធ្លាក់ពីលើផ្លូវ បណ្ដាលឲ្យមនុស្ស២នាក់រងរបួសជាទម្ងន់។ ជនរងគ្រោះទី១៖ ឈ្មោះ ជា ជាតិ អាយុ៣៩ឆ្នាំ មានទីលំនៅ ភូមិទី ២ឃុំស្រែអង្គ្រង ត្រកួនមុំ ខេត្តរតនគីរី (រងរបួសធ្ងន់) ជាអ្នកបើកបររថយន្ថ។ ទី២៖ឈ្មោះ ម៉ៅ ស្រី ភេទស្រី អាយុ២៨ឆ្នាំ ត្រូវជាប្រពន្ធអ្នកបើកបររថយន្ត អ្នកទាំងពីររងរបួសធ្ងន់ បញ្ជូនទៅសង្រ្គោះ នៅមន្ទីពេទ្យបង្អែកខេត្តក្រចេះ ចំណែករថយន្ដត្រូវកម្លាំងនគរបាលយកទៅរក្សាទុកនៅអធិការដ្ឋាននគរបាល ស្រុកចិត្របុរី។
សូមបញ្ជាក់ថា ករណីគ្រោះថ្នាក់ចរាចរណ៍ បានកើតឡើងនៅខេត្តក្រចេះច្រើនករណី ដែលភាគច្រើនបណ្ដាលមកពីរថយន្ដសាំងដឹកឈើ ដោយពួកគេបើកបរក្នុងល្បឿនយ៉ាងលឿន ហើយរ៉េបិទគ្នាទៅវិញទៅមកបណ្ដាលគ្រោះថ្នាក់កើតឡើងជាញឹកញប់។
ជាក់ស្ដែងកាលពីថ្ងៃទី១៥ ខែកក្កដា ឆ្នាំ២០១៨ប៉ុន្មានថ្ងៃមុននេះ រថយន្ដសាំងដឹកឈើជាច្រើនគ្រឿង បើកបិទគ្នាទៅវិញទៅមកដល់ចំណុចភូមិរការកណ្ដាល សង្កាត់រការកណ្ដាល ក្រុងចេះ ស្រាប់តែបុកម៉ូតូមួយគ្រឿង ក្នុងទិសទៅបញ្ច្រាសទិសគ្នាបណ្ដាលអ្នកជិះម៉ូតូស្លាប់យ៉ាងអណោចអធ័ម៕
