(កូរ៉េ)៖ លោក ឡុង ឌីម៉ង់ ឯកងគ្គរាជទូតកម្ពុជា ប្រចាំសាធារណរដ្ឋកូរ៉េ ​និងក្រុមការងារទីប្រឹក្សាការងារទទួលបន្ទុកពលករ នៅថ្ងៃទី១៧ ខែកក្កដា ឆ្នាំ២០១៨ បានសហការជាមួយ មជ្ឈមណ្ឌលប្រឹក្សាយោបល់ជនបរទេសនាទីក្រុងអានសាន បានចុះទស្សនកិច្ច និងសួរសុខទុក្ខ​ពលករខ្មែរ​ នៅរោងចក្រ Changdae Metal (រោងចក្រផលិតតួម៉ាស៊ីនរបស់រថយន្ដ) នាតំបន់អានសាន។​

ថ្លែងក្នុងឱកាសនោះ លោក ឡុង ឌីម៉ង់ បានថ្លែង​អំណរគុណជាអនេក ដល់សាលាក្រុងអានសាន និងមជ្ឈមណ្ឌលប្រឹក្សាយោបល់ជនបរទេសនាទីក្រុងអានសាន ដែលតែងតែសហការបង្កលក្ខណៈដល់ស្ថានទូតកម្ពុជា ក្នុងការជួយដោះស្រាយបញ្ហានានារបស់ប្រជាពលរដ្ឋខ្មែរ នៅទីក្រុងអានសាន។

បន្ថែមពីនេះ លោកក៏បាន​​​អំណរគុណដល់ម្ចាស់រោងចក្រ Changdae Metal លោក ស៊ុង ក្វាងស៊ង ដែលបានស្រលាញ់ថែទាំពលករកម្ពុជាទាំង១០នាក់ ដែលកំពុងបម្រើការងារនៅរោងចក្ររបស់លោក និងស្នើដល់លោកថៅកែ សូមបន្ដជ្រើសរើសពលករកម្ពុជាបន្ថែមទៀត នៅពេលដែលពង្រីករោងចក្រ ហើយសូមលើកទឹកចិត្តឲ្យមកបណ្ដាក់ទុនបើករោងចក្រនៅកម្ពុជា ដើម្បីជ្រើសរើសអតីតពលករ ដែលបានចប់អាណត្តិធ្វើការ ដើម្បីបន្ដជំនាញវិជ្ជាជីវៈរបស់ពួកគេ៕