(ភ្នំពេញ)៖ បើទោះបីប្រទេសកម្ពុជា ស្ថិតក្នុងស្ថានភាពកំពុងបោះឆ្នោតក្ដី ក៏មានវិនិយោគិនបរទេសជាច្រើន ដូចជាវិនិយោគិនចិនជាដើម បានមើលឃើញពីឱកាស និងសក្ដានុពលក្នុងការវិនិយោគនៅកម្ពុជា ដោយសារតែវិនិយោគិនទាំងនោះ ជឿជាក់ថា កម្ពុជាជាប្រទេសដែលមានស្ថិរភាពល្អ។

ជាក់ស្ដែង នៅព្រឹកថ្ងៃទី១៨ ខែកក្កដា ឆ្នាំ២០១៨នេះ វិនិយោគិនចិន បានចាប់ដៃគូជាមួយវិនិយោគិនកម្ពុជា បើកក្រុមហ៊ុនសម្ពោធថ្មីមួយនៅកម្ពុជា ដើម្បីបម្រើដល់វិស័យសុខាភិបាល។

លោក Zhang Yi ប្រធានក្រុមហ៊ុន Anderson Biotech & Royal OncoCare Grand ដែលទើបសម្ពោធថ្មីបានលើកឡើងថា «ខ្ញុំមានជំនឿចិត្តក្នុងការវិនិយោគ នៅក្នុង​ប្រទេសកម្ពុជា ទោះបីស្ថិតក្នុងឆ្នាំបោះឆ្នោតក្ដី ដូចអ្នកទាំងអស់គ្នាឃើញស្រាប់ហើយថា ប្រទេសកម្ពុជា បច្ចុប្បន្នកំពុងតែមានស្ថិរភាព ដូច្នេះវាមិនមែន​ជាបញ្ហាចោទ ឬកត្តាហានិភ័យណាមួយ ក្នុងការបង្កើតក្រុមហ៊ុននៅកម្ពុជាឡើយ»។

លោកថា ក្រុមហ៊ុនថ្មីនេះផ្ដោតខ្លាំងទៅលើផ្នែកសុខាភិបាល ពិសេសការព្យាបាលជំងឺមហារីក។

លោក Yi បញ្ជាក់ទៀតថា «ការសម្រេចចិត្តបើកក្រុមហ៊ុននេះ នៅក្នុងប្រទេសកម្ពុជា ដោយសម្លឹងឃើញ ពីភាពរីកចម្រើនបំផុតរបស់កម្ពុជាក្នុងប្រទេសអាស៊ី ហើយខ្ញុំសង្ឃឹមថា ថ្នាំព្យាបាលជំងឺមហារីករបស់ក្រុមហ៊ុ នឹងជួយព្យាបាលជំងឺមហារីក ដល់ប្រជាជនកម្ពុជា ព្រមទាំងរីកដុសដាលពេស​ពេញប្រទេសតំបន់អាស៊ីថែមទៀតផង»។

វិនិយោគិនកម្ពុជា លោក កូយ ឡេប៉ូ ដែលជាអគ្គនាយក្រុមហ៊ុន K-Link International បានថ្លែងថា ដោយសារភាពជឿជាក់លើស្ថិរភាពនយោបាយនៅកម្ពុជា ទើបវិនិយោគិនប្រទេសនានា ពិសេសចិនសម្រុកមកវិនិយោគ និងបើកក្រុមហ៊ុននៅកម្ពុជា មិនខ្វល់ឡើងពេលវេលាមុន ឬក្រោយបោះឆ្នោតឡើយ។ លោកថា បង្ហាញនូវក្រុមថ្មីដែលទើបបើកសម្ពោធនេះ នឹងរីកចម្រើន និងទទួលបានជោគ​ជ័យ​។

លោក ហេង ប៊ុនគៀត ប្រធាននាយកដ្ឋានឱសថ ចំណីអាហារ ​និងបរិក្ខារពេទ្យ និងគ្រឿងសំអាងនៃក្រសួងសុខាភិបាល បានថ្លែងឲ្យដឹងថា បង្ហាញនូវក្តីរីករាយចំពោះវិនិយោគិនចិន ដែលបោះទុនវិនិយោគនៅកម្ពុជា ពិសេសក្នុងវិស័យសុខាភិបាល។ ក្រុមហ៊ុននេះ នឹងជួយព្យាបាលជំងឺហារីក ដែលជាជំងឺកាចសាហាវគ្មានថ្នាំ​ព្យាបាល ព្រមទាំងផ្ដល់ការងារដល់ពលរដ្ឋកម្ពុជា​ផងដែរ៕