(កំពត)៖ សកម្មជនគណបក្សប្រជាជនកម្ពុជា និងតំណាងសហគមន៍ខ្មែរឥស្លាម នៅស្រុកទឹកឈូ ខេត្តកំពត បានធ្វើការប្តេជ្ញាថា នៅតែរក្សាគោលជំហរ ដោយឥតងាករេ ក្នុងការបោះឆ្នោត ជូនគណបក្សប្រជាជនកម្ពុជា ដើម្បីជាការតបស្នងសងគុណនូវគុណបំណាច់ដែលមិនអាចកាត់ថ្លៃបាន របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា។
ពួកគេប្តេជ្ញាយ៉ាងអហង្កាកាថា គឺសូមបន្តរួមរស់ផ្ញើវាសនារបស់ខ្លួនទាំងស្រុង ជាមួយគណបក្សប្រជាជនកម្ពុជា ជាគណបក្សដែលបានសាងគុណ ស្នាដៃជូនជាតិមាតុភូមិពិតប្រាកដ ហើយក៏ជាគណបក្សដែលរំដោះប្រទេសជាតិ ចេញពីថ្លុកសង្គ្រាមរ៉ាំរ៉ៃ ជាគណបក្សដែលនាំអាយុជីវិតប្រជានុរាស្ត្រកម្ពុជា ឲ្យរស់រានឡើងវិញតាំងពី ថ្ងៃ៧ មករា ១៩៧៩ ក្រោមការប្រោសប្រទានពរជ័យពីព្រះជាម្ចាស់ បើគ្មានគណបក្សប្រជាជនកម្ពុជា ក៏គ្មានថ្ងៃ៧មករាដែរ។
ការប្តេជ្ញាបែបនេះ ធ្វើឡើងនៅព្រឹកថ្ងៃទី១៧ ខែកក្កដា ឆ្នាំ២០១៨នេះ នៅភូមិព្រៃថ្នង ឃុំព្រៃថ្នង និងភូមិកំពង់កែស ឃុំ ត្រពាំងសង្កែ ក្នុងយុទ្ធនាការសំណេះសំណាល និងឃោសនាទូទាំងប្រទេសរបស់គណៈចលនាសាសនិកឥស្លាម ដើម្បីរកសំឡេងឆ្នោតជូនគណបក្សប្រជាជនកម្ពុជា ដឹកនាំដោយលោក អូស្មាន ហាស្សាន់ ប្រធានគណៈចលនាសាសនិកឥស្លាមរបស់គណបក្សប្រជាជនកម្ពុជា និងថ្នាក់ដឹកនាំគណៈចលនាសាសនិកឥស្លាម របស់គណបក្សប្រជាជនកម្ពុជា។
លោក អូស្មាន ហាស្សាន់ បានផ្តល់កម្លាំងចិត្ត និងជំរុញដល់សហគមន៍ខ្មែរឥស្លាមរបស់លោក ឲ្យបន្តគាំទ្រគណបក្សប្រជាជនកម្ពុជា កាន់តែច្រើនឡើងថែមទៀត ទោះបីកន្លងមកសំឡេងគាំទ្ររបស់ខ្មែរឥស្លាម គឺបានគាំទ្រដល់គណបក្សកាន់អំណាចក្នុងកម្រិតភាគរយយ៉ាងខ្ពស់បំផុតក្តី៕
