(ភ្នំពេញ)៖ ក្រសួងឧស្សាហកម្ម និងសិប្បកម្ម បានរៀបចំពិធីប្រគល់ថវិកា ដែលបានមកពីការចូលរួមបរិច្ចាគពីសំណាក់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃក្រសួងឧស្សាហកម្ម និងសិប្បកម្ម និងសប្បុរសជននានា ក្នុងស្មារតីសាមគ្គីធម៌ និងមនុស្សធម៌ ជូនដល់មូលនិធិគន្ធបុប្ផាកម្ពុជា ក្រោមអធិបតីភាព លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ និងតំណាងមន្ទីរពេទ្យគន្ធបុប្ផា នៅទីស្តីការក្រសួងឧស្សាហកម្ម និងសិប្បកម្ម នៅព្រឹកថ្ងៃទី១៦ ខែកក្កដា ឆ្នាំ២០១៨ នេះ។

ថវិកាដែលត្រូវបានប្រគល់ជូន មូលនិធិគន្ធបុប្ផាកម្ពុជា នាព្រឹកនេះ គឺមានចំនួនជិត ២០០លានរៀល ដែលក្នុងនោះរួមមាន៖
-ប្រាក់រៀល​៖​ ១០៧ ៩៩៥ ៤០០៛ និង
-ប្រាក់ដុល្លារ​៖​ ២២ ៤៧៨$
​ថវិកាខាងលើនេះ ទទួលបានពីសុទ្ធាជ្រះថ្លា បរិសុទ្ធរបស់លោកកិត្តិសេដ្ឋាបណ្ឌិត ចម ប្រសិទ្ធ និងលោកជំទាវ ទេព បុប្ផាប្រសិទ្ធ ចំនួន ២០ ០០០​ ដុល្លារអាមេរិក និងក្រៅពី​នេះ​ទទួលពីសប្បុរសជន ដែលជាថ្នាក់ដឹកនាំ ​មន្ត្រី​រាជការនៅទីស្តីការក្រសួងឧស្សាហកម្ម និងសិប្បកម្ម តាមបណ្តាមន្ទីរឧស្សាហកម្ម និង​សិប្ប​ក​ម្ម​ រាជធានី-ខេត្ត អង្គភាពរដ្ឋាករទឹកស្វ័​យ​ត និងអាជីវករនៅតាមបណ្តារាជធានី-ខេត្ត រួមទាំង អនិកជនខ្មែរ​រស់នៅ​សហរដ្ឋអាមេរិក។

ថ្លែងក្នុងពិធីនេះ លោកកិត្តិសេដ្ឋាបណ្ឌិត បានលើកឡើងពីប្រវត្តិនៃការបង្កើតមន្ទីរពេទ្យគន្ធបុប្ផា ឡើង ជាពិសេសគឺការបង្កើតឡើងនូវមន្ទីរគន្ធបុប្ផា នៅទីរួមខេត្តសៀមរាប ហើយនឹងវីរៈភាព របស់​លោក​សាស្ត្រា​ចារ្យ​វេជ្ជ​បណ្ឌិត BEAT RICHNER។ លោកកិត្តិសេដ្ឋាបណ្ឌិត ក៏បានលើកឡើងពីការជួយជ្រោមជ្រែង របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ក្នុងការរួមចំណែកផ្តល់នូវថវិកា រាប់សិបលានដុល្លារ ជារៀងរាល់ឆ្នាំ ដើម្បីជួយដល់មន្ទីរពេទ្យគន្ធបុប្ផា ហើយនៅរយៈពេលចុងក្រោយនេះ ក្រោមគំនិតផ្តួចដ៏ថ្លៃថ្លា របស់សម្តេចតេជោ និងសម្តេចកិត្តិព្រឹទ្ធបណ្ឌិត «មូលនិធិគន្ធបុប្ផាកម្ពុជា» ត្រូវបានបង្កើតឡើង ដែលយើងចាត់ទុកជា ប្រវត្តិសាស្ត្រមួយថ្មីបញ្ជាក់ថា កុមារកម្ពុជា នឹងបន្តទទួលបានការធានា នូវការគាំពារផ្នែកសុខភាព ប្រកបដោយគុណភាព និងឥតគិតថ្លៃ សម្រាប់ការព្យាបាលនៅមន្ទីរពេទ្យគន្ធបុប្ផា ទាំងនៅរាជធានីភ្នំពេញ និងនៅខេត្តសៀមរាប។

ជាមួយគ្នានេះ លោកកិត្តិសេដ្ឋាបណ្ឌិត ក៏បានប្រកាសផងដែរថា រូបលោកផ្ទាល់ និងលោកស្រី នឹងបន្តចូលរួមបរិច្ចាគថវិកាផ្ទាល់ខ្លួនចំនួន ២០ ០០០ ដុល្លារជារៀងរាល់ឆ្នាំ ជូនដល់មូលនិធិគន្ធបុប្ផាកម្ពុជា និងបានអំពាវនាវដល់សប្បុរសជននានា បន្តចូលរួមឧបត្ថម្ភគាំទ្រ ដល់មូលនិធិគន្ធបុប្ផាកម្ពុជា ទៅតាមលទ្ធភាពរៀងៗខ្លួន ដើម្បីធ្វើយ៉ាងណាឲ្យមន្ទីរពេទ្យគន្ធបុប្ផា អាចបន្តប្រតិបត្តិការរបស់ខ្លួន ប្រកបដោយចីរភាព៕