(កំពង់ស្ពឺ)៖ ប្រធានគណបក្សប្រជាជនកម្ពុជា (CPP) ខេត្តកំពង់ស្ពឺ បានចាត់ទុកការមករួមរស់ជាមួយគ្នាក្នុងដំណាក់កាលជិតបោះឆ្នោត របស់សកម្មជនអតីតគណបក្សសង្គ្រោះជាតិ ជាឆន្ទៈតែមួយ ដើម្បីបោះឆ្នោតជូនគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន ឲ្យដឹកនាំប្រទេសជាតិបន្តទៀត ក្រោមការអភិវឌ្ឍ និងសន្តិភាព។

ការលើកឡើងនេះ ធ្វើឡើងគ្រាដែលលោក វ៉ី សំណាង ប្រធានគណបក្សប្រជាជនកម្ពុជា (CPP) ខេត្តកំពង់ស្ពឺ បានធ្វើជាអធិបតីក្នុងពិធីទទួលសកម្មជនអតីតគណបក្សសង្គ្រោះជាតិ ៦៤៤នាក់ ដែលវិលមកចូលរួមជីវភាពនយោបាយ ជាមួយគណបក្សប្រជាជនកម្ពុជា ក្នុងឃុំសំបូរ ស្រុកសំរោងទង ខេត្តកំពង់ស្ពឺ នាព្រឹកថ្ងៃទី១៥ ខែកក្កដា ឆ្នាំ២០១៨នេះ។

ប្រធានគណបក្សប្រជាជនកម្ពុជាខេត្តកំពង់ស្ពឺរូបនេះ បានថ្លែងបញ្ជាក់ថា «ថ្ងៃនេះ ម៉ោងនេះ យើងបានក្លាយជាមនុស្សនៃគណបក្សនយោបាយតែមួយ និងរួមរស់ជាមួយគ្នា រួមគ្នាបោះឆ្នោតជូនគណបក្សប្រជាជនតែមួយ ហើយរួមគ្នាកសាងប្រទេសជាតិជាមួយគណបក្សប្រជាជនកម្ពុជា»។

លោក​ វ៉ី សំណាង បានបន្តថា ទាំងសមាជិកថ្មី និងសមាជិកចាស់ ត្រូវរួមគ្នាមើលថែប្រជាពលរដ្ឋក្នុងមូលដ្ឋាន ចូលរួមផ្តល់ព័ត៌មានពីសុខទុក្ខឲ្យគ្នា ចៀសវាងប្រកាន់និន្នាការនយោបាយ។ លោកក៏បានផ្តាំសកម្មជនទាំងអស់ ត្រូវឈប់ជឿលើក្រុមជ្រុលនិយមផ្កាប់មុខ ដែលធ្វើឲ្យបរទេសដឹកមុខ មានបំណងបំផ្លាញប្រទេសខ្លួនឯងដោយបដិវត្តន៍ពណ៌។

សូមបញ្ជាក់ថា អតីតសមាជិកគណបក្សសង្គ្រោះជាតិ ដែលមករួមរស់លើកនេះមានចំនួន ៦៤៤នាក់នោះ មានស្រី្ត ៣៤០នាក់ ដែលម្នាក់ៗទទួលបានអាវ និងមួក រួមទាំងលិខិតបញ្ជាក់របស់គណបក្សប្រជាជនផងដែរ៕