(ក្រចេះ)៖ កម្លាំងនគរបាលការិយាល័យប្រឆាំងគ្រឿងញៀន សហការជាមួយនគរបាលក្រុងក្រចេះ បើកប្រតិបត្តិការបង្ក្រាបគ្រឿងញៀន ដោយឃាត់ខ្លួនជនសង្ស័យ៦នាក់ រួមទាំងដកហូតបានគ្រឿងញៀនជាច្រើនកញ្ចប់ និងវត្ថុតាងមួយចំនួននៅចំណុចផ្ទះជួលក្រោយវត្តប៉ាឆា ស្ថិតក្នុងភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ កាលពីយប់ថ្ងៃទី១៣ ខែកក្កដា ឆ្នាំ២០១៨នេះ។
ប្រតិបត្តិការនេះដឹកនាំកម្លាំងដោយ លោក ស៊ាន សុភ័ក្រ នាយរងការិយាល័យប្រឆាំងគ្រឿងញៀន និងសម្របសម្រួលដោយលោក ជា សុភ័ក្រ្ត ព្រះរាជអាជ្ញារងសាលាដំបូងខេត្ត បានឃាត់ខ្លួនជនសង្ស័យប្រុសស្រីចំនួន០៦នាក់ជាមួយគ្រឿងញៀន០៤កញ្ចប់។
យោងតាមនគរបានឲ្យដឹងថា ជនសង្ស័យទាំង០៦នាក់ (ស្រី៣នាក់ )ដែលបានឃាត់ខ្លួន រួមមានឈ្មោះ៖
១៖ ឈ្មោះ ទិន មិនា (ហៅពេជ្រ) ភេទប្រុស អាយុ៣៣ឆ្នាំ ជនជាតិខ្មែរ មុខរបររត់ម៉ូតូឌុប មានទីលំនៅជួលផ្ទះ ភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ
២៖ ឈ្មោះ តេង ស្រីណា (ហៅខ្នា) ភេទស្រី អាយុ២៦ឆ្នាំ ជនជាតិខ្មែរ មុខរបរមេផ្ទះ (ប្រពន្ធរបស់ឈ្មោះ ទិន មិនា) មានទីលំនៅជួលផ្ទះភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ
៣៖ ឈ្មោះ តេង ញ៉ ភេទស្រី អាយុ ៣៨ឆ្នាំ ជនជាតិខ្មែរ មុខរបរមេផ្ទះ មានទីលំនៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ
៤៖ ឈ្មោះ ថេង គឹមឈុន ភេទប្រុស អាយុ ៣៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិមានជ័យ ឃុំទឹកថ្លា ស្រុកស្វាយអន្ទរ ខេត្តព្រៃវែង ។
៥៖ ឈ្មោះ ទិន កញ្ញា ភេទស្រីអាយុ៣០ឆ្នាំ ជនជាតិខ្មែរ មុខរបរមេផ្ទះ មានទីលំនៅភូមិរវៀង ឃុំអន្លង់រាជ ស្រុកវាលវែង ខេត្តពោធិ៍សាត់
៦៖ ឈ្មោះ រស់ សាលី ភេទប្រុស អាយុ៣៣ឆ្នាំ ជនជាតិខ្មែរ មុខរបរជាងឈើ (ប្តីរបស់ឈ្មោះ ទិន កញ្ញា) មានទីលំនៅភូមិរវៀង ឃុំអន្លង់រាជ ស្រុកវាលវែង ខេត្តពោធិសាត់ ។
នគរបាលបានឱ្យដឹងថា ក្នុងប្រតិបត្តិការនេះបានដកហូតបានវត្ថុតាងរួមមាន៖ ម្សៅក្រាមពណ៌សចំនួន០៤កញ្ចប់ (តូច០២ ធំ០២) ជញ្ជីងសំរាប់ថ្លឹងគ្រឿងញៀន០១ថង់សំរាប់ច្រករំលែកគ្រឿងញៀនមួយចំនួនធំ សំភារសំរាប់ជក់គ្រឿងញៀនមួយចំនួន ទូរសព្ទ័ចំនួន៤គ្រឿង ប្រាក់រៀលចំនួន៥០ម៉ឺនរៀល ម៉ូតូចំនួន០២គ្រឿង (ម៉ាកស៊ីរូស១គ្រឿង និងម៉ាកWave Rsx ចំនួន១គ្រឿង) និងរថយន្តម៉ាកCamery បាឡែនពណ៌ទឹកមាស ពាក់ស្លាកលេខ ភ្នំពេញ 2J 3352 ចំនួន១គ្រឿង។
បច្ចុប្បន្នជនសង្ស័យទាំង០៦នាក់ រួមនិងវត្ថុតាងទាំងអស់ កំពុងឃាត់ខ្លួន និងរក្សាទុកបណ្តោះអាសន្ននៅការិយាល័យប្រឆាំងគ្រឿងញៀន ដើម្បីធ្វើការសាកសួរ និងកសាងសំណុំរឿងតាមនីតិវិធីច្បាប់៕
