(តាកែវ)៖ ប្រធានក្រុមការងារគណបក្សប្រជាជនកម្ពុជាចុះជួយឃុំភ្នំដិន ស្រុកគីរីវង់ ខេត្តតាកែវ លោក សុខ សំណាង នៅព្រឹកថ្ងៃទី១៣ ខែកក្ដដា ឆ្នាំ២០១៨នេះ បានអញ្ជើញទៅប្រកាសបញ្ចូលសមាជិកថ្មី របស់គណបក្សប្រជាជនកម្ពុជាឃុំភ្នំដិន ចំនួន១៦៨នាក់ នៅទីស្នាក់ការគណបក្សប្រជាជនឃុំភ្នំដិន។
ថ្លែងចំពោះសមាជិកបក្សលោក សុខ សំណាង បានធ្វើការអំពាវនាវឲ្យសមាជិកគណបក្សប្រជាជន នៅក្នុងឃុំភ្នំដិនទាំងអស់ ត្រូវអញ្ជើញទៅបោះឆ្នោតដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ខាងមុខនេះឲ្យបានគ្រប់គ្នា ដោយនាំគ្នាបោះឆ្នោតជូនគណបក្សប្រជាជនកម្ពុជា ដែលមានលេខរៀងទី២០ ដើម្បីឲ្យគណបក្សបន្តការដឹកនាំប្រទេសកម្ពុជា ឈានឆ្ពោះទៅរកការអភិវឌ្ឍជឿនលឿនថែមទៀត។
បន្ថែមពីនេះ លោក សុខ សំណាង ក៏បានធ្វើការណែនាំដល់ក្រុមការងារគណបក្ស ក៏ដូចសមាជិកគណបក្សប្រជាជនកម្ពុជាទាំងអស់ ត្រូវចុះជួបផ្ទាល់ជាមួយប្រជាពលរដ្ឋដល់ខ្នងផ្ទះ ហើយត្រូវផ្សព្វផ្សាយ អំពីគោលនយោបាយអាទិភាព របស់គណបក្សប្រជាជន ដែលសម្តេចតេជោ ហ៊ុន សែន ជាប្រធានគណបក្សប្រជាជនកម្ពុជា បានថ្លែងនៅក្នុងថ្ងៃបើកយុទ្ធនាការឃោសនាបោះឆ្នោត ជ្រើសតាំងតំណាងរាស្រ្ត អាណត្តិទី៦ កាលពីថ្ងៃ ទី០៧ ខែកក្កដា ឆ្នាំ២០១៨កន្លងមកដើម្បីឲ្យប្រជាពលរដ្ឋបានជ្រាបកាន់តែច្បាស់។
លោក សុខ សំណាង បានសង្កត់ធ្ងន់ថា គណបក្សប្រជាជនកម្ពុជាឈ្នះមានន័យថា ប្រជាជនជាអ្នកឈ្នះទាំងអស់គ្នា ដូច្នោះសូមសមាជិកបក្ស និងប្រជាពលរដ្ឋទាំងអស់ត្រូវតែជឿជាក់ និងនាំគ្នាបោះឆ្នោតជូនគណបក្សប្រជាជនកម្ពុជា ដែលមានលេខរៀងទី២០ ដើម្បីរក្សាសន្តិភាព និងភាពរីកចម្រើនរបស់ប្រទេសជាតិកាន់តែខ្លាំងក្លាថែមទៀត៕
