(កំពង់ឆ្នាំង)៖ លោក អូស្មាន ហាស្សាន់ សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានគណៈចលនាសាសនិកឥស្លាម លើកឡើងថា ការចូលរួមការពារសុខសន្តិភាពជូនខ្លួនឯង និងប្រជាជាតិកម្ពុជា ដោយសារតែការសម្រេចចិត្តដ៏ត្រឹមត្រូវក្នុងការបោះឆ្នោតជូនគណបក្សប្រជាជនកម្ពុជា។
ការថ្លែងរបស់លោក អូស្មាន ហាស្សាន់ ត្រូវបានធ្វើឡើងនៅព្រឹកថ្ងៃទី១៣ ខែកក្កដា ឆ្នាំ២០១៨នេះ ក្នុងជំនួបសំណេះសំណាល និងឃោសនារកសំឡេងឆ្នោត ជូនគណបក្សប្រជាជនកម្ពុជា ជាមួយសកម្មជនគណបក្សប្រជាជនកម្ពុជា និងខ្មែរឥស្លាមនៅភូមិផ្សារត្រាច ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។
លោកបន្តថា អាស្រ័យហេតុនេះ ក្នុងនាមថ្នាក់ដឹកនាំគណបក្សប្រជាជនកម្ពុជា នៅតែសង្ឃឹមយ៉ាងមុតមាំថា សំឡេងឆ្នោតគាំទ្រគណបក្សប្រជាជនកម្ពុជា របស់បងប្អូនជនរួមជាតិ ជាពិសេសខ្មែរឥស្លាម នៅតែរក្សាគោលជំហរយ៉ាងមុតមាំ ការសម្រេចិត្តឈរលើឆន្ទៈដ៏ត្រឹមត្រូវ ក្នុងការបោះឆ្នោតជូនគណបក្សប្រជាជនកម្ពុជា នៅថ្ងៃទី២៩ ខែកក្កដា ឆ្នាំ២០១៨នេះ ដែលឈរលំដាប់លេខរៀងចុងក្រោយគេ គឺលេខរៀងទី២០ ដើម្បីបានសម្តេចតេជោ ហ៊ុន សែន បន្តនៅជានាយករដ្ឋមន្រ្តី និងនៅជាម្លប់ដ៏កក់ក្តៅដល់យើងទាំងអស់គ្នា។
លោក អូស្មាន ហាស្សាន់ ក៏បានលើកឡើង ពីសមិទ្ធផលជាច្រើន ត្រូវបានបង្កើតឡើង និងមានការរីកចម្រើនជាបន្តបន្ទាប់ រួមជាមួយគោលនយោបាយល្អៗនានា ដែលបានផ្តល់ជូន និងលះបង់តស៊ូ ក្រោមការដឹកនាំរបស់គណបក្សប្រជាជនកម្ពុជា៕
