(កំពង់ចាម)៖ ផ្សារបុសខ្នុរ និងផ្សារស្ពឺ ស្រុកចំការលើ ខេត្តកំពង់ចាម ដែលត្រូវបានដកពីអ្នកវិនិយោគ កន្លងទៅថ្មីៗនេះ ត្រូវបានមន្ត្រីអាជ្ញាធរខេត្ត និងអាជ្ញាធរស្រុកចំការលើ រួមជាមួយគណៈអាជីវករផ្សារទាំងពីរ បានប្រគល់ ទៅឲ្យអ្នកម៉ៅការភាស៊ីបន្ត។
ការសម្រេចនេះ បានធ្វើឡើងក្រោយ ពីបានប្រជុំពិភាក្សាជាមួយ គណៈអាជីវករផ្សារទាំងពីរ មានការចូលរួមពីលោក ពេជ្រ ហោះ នាយករងរដ្ឋបាលសាលាខេត្តកំពង់ចាម និង លោក ខ្លូត ចិន្តា អភិបាលស្រុកចំការលើ នារសៀលថ្ងៃទី១១ ខែកក្កដា ឆ្នា២០១៨ នៅសាលប្រជុំ សាលាស្រុកចំការលើ ខេត្តកំពង់ចាម។
ក្រុមគណៈអាជីវករផ្សារបុសខ្នុរ បានអះអាងថា ផ្សារនេះ អាចប្រមូលភាស៊ី បានប្រាក់ក្នុងមួយថ្ងៃ ចំនួន ២២១.០០០រៀល (ម្ភៃពីរម៉ឺនមួយពាន់រៀល) ហើយផ្សារនេះ អាជ្ញាធរ និង គណៈអាជីវករ បានសម្រេចប្រគល់អោយអ្នកស្រី លីម ម៉ាលីន ប្រមូលភាស៊ីសាកល្បង១ខែ ត្រូវបង់ចូលមកគណៈអាជីវករផ្សារនូវទឹកប្រាក់ចំនួន ៣,២០០.០០រៀល (បីលានពីរសែនរៀល)។
ដោយឡែក ផ្សារស្ពឺ ដែលក្រុមគណៈអាជីវករផ្សារ បានអះអាងថា ប្រមូលភាស៊ី ក្នុង១ថ្ងៃ បានចំនួន២៣ម៉ឺនរៀល ហើយផ្សារនេះ មានអ្នកម៉ៅការចំនួន៣នាក់ ចូលរួមក្នុងការដេញថ្លៃ ក្នុងនោះឈ្មោះ តេក គឹមហ័ង ហ៊ានបង់ឲ្យគណៈអាជីវករ ក្នុង១ខែ ៦លានកន្លះ ចំណែកលោក ចាន់ ទិត្យ ហ៊ានបង់១ខែ ៦,៥៨៥,៩០០រៀល ចំណែក លោក លី វេងហុក ហ៊ានខ្ពស់ជាងគេ ដោយបង់ក្នុង១ខែ ៧.៤៩៩.៩០០រៀល។
ក្រុមគណៈអាជីវករផ្សារ បានបញ្ជាក់ទៀតថា ដូច្នេះអាជ្ញាធរ និង គណៈអាជីវករផ្សារនេះ បានសម្រេចប្រគល់ឲ្យ លោក លី វេងហុក ប្រមូលភាស៊ីសាកល្បង៣ខែ។
ជាមួយគ្នានោះ លោក ពេជ្រ ហោះ នាយករងរដ្ឋបាលសាលាខេត្តកំពង់ចាម បានថ្លែងផ្តាំផ្ញើដល់អ្នកម៉ៅការ សូមឲ្យប្រមូលភាស៊ី ដោយអនុវត្តតាមសៀវភៅបន្ទុក និងថែរក្សាសណ្តាប់ធ្នាប់ និងអនាម័យ ក្នុងផ្សារឲ្យបានល្អ និងប្រើពាក្យសម្តី ឲ្យបានសមរម្យជាមួយអាជីករផងដែរ៕
