(កំពង់ធំ)៖ លក្ខណៈពិសេសមួយ ក្នុងចំណោមលក្ខណៈពិសេសជាច្រើនរបស់រាជធានីឥសានបុរៈ (តំបន់ប្រាសាទសំបូរព្រៃគុក) ត្រូវបានបញ្ជាក់ប្រាប់គណៈកម្មការនៃអង្គការយូណេស្កូ ដើម្បីសុំចុះបញ្ជីជាសម្បត្តិបេតិកភណ្ឌពិភពលោក នោះគឺប្រាង្គប្រាសាទមានរាង៨ជ្រុង ព្រោះក្នុងសម័យដូចគ្នានោះ គ្មានបរទេសណាក្នុងតំបន់អាស៊ីអាគ្នេយ៍នេះ ធ្វើដូចបុព្វបុរសខ្មែរសម័យចេនឡាននោះឡើយ។

ក្នុងកិច្ចសម្ភាសជាមួយអង្គភាពព័ត៌មាន Fresh News នាថ្ងៃទី១០ ខែកក្កដានេះ លោក ផាន់ ណាឌី អគ្គនាយកអាជ្ញាធរជាតិសំបូរព្រៃគុក បានឱ្យដឹងថា ស្ថាបត្យកម្ម និងការរៀបចំរចនាសម្ព័ន្ធរាជធានីនៅតំបន់ប្រាសាទសំបូរព្រៃគុក មានភាពល្អឯកដាច់គេ ដោយលោកបានលើកឡើងពីលក្ខណៈមួយចំនួន ដែលមាននៅក្នុងតំបន់ប្រាសាទសំបូរព្រៃគុកនេះ ហើយចំណុចដែលប្រាសាទមានរាង៨ជ្រុង (អដ្ឋកោណ) ក៏ជាចំណុចពិសេសមួយដ៏សំខាន់ផងដែរ។

លោក ផាន់ ណាឌី បញ្ជាក់ថា គ្មានប្រាសាទណាមួយមានប្រាសាទរាង៨ជ្រុង ដូចប្រាសាទនៅតំបន់ប្រាសាទសំបូរព្រៃគុករបស់ខ្មែរឡើយ ក្នុងតំបន់អាស៊ីអាគ្នេយ៍នេះ បើគិតក្នុងសម័យកាលតំណាលគ្នា។ នៅអតីតក្រុងវិជ័យរបស់នគរចាម្ប៉ាបុរាណ (សព្វថ្ងៃស្ថិតក្នុងប្រទេសវៀតណាម) ក៏មានប្រាសាទរាង៨ជ្រុងនេះដែរ តែគ្រាន់តែប្រាសាទទាំងនោះ ត្រូវបានកសាងឡើងក្រោយប្រាសាទនៅតំបន់ប្រាសាទសំបូរព្រៃគុករបស់ខ្មែរ។

លោកអគ្គនាយកបានបន្តថា ក្នុងចំណោមប្រាសាទប្រមាណជិត៣០០ប្រាង្គ នៅក្នុងតំបន់ប្រាសាទសំបូរព្រៃគុក ប្រាសាទដែលមានរាងអដ្ឋកោណមានប្រមាណ ១០ប្រាង្គផងដែរ ដែលប្រាង្គមួយចំនួនមានសភាពបាក់បែកដំបូល ជញ្ជាំង ប៉ុន្តែប្រាង្គមួយចំនួនក៏នៅមានសភាពល្អនៅឡើយ។

សូមជម្រាបថា តំបន់ប្រាសាទសំបូរព្រៃគុក ត្រូវបានអង្គការយូណេស្កូ សម្រេចចុះក្នុងបញ្ជីសម្បត្តិបេតិកភណ្ឌពិភពលោក នាថ្ងៃទី០៨ ខែកក្កដា ឆ្នាំ២០១៧ នៅទីក្រុងក្រាខូវ ប្រទេសប៉ូឡូញ។

ប្រមុខរាជរដ្ឋាភិបាលកម្ពុជា​ សម្ដេចតេជោ ហ៊ុន សែន ក៏បានប្រកាសរួចរាល់ហើយ អំពីការកំណត់យកថ្ងៃទី១០ ខែកក្កដារៀងរាល់ឆ្នាំ ជាទិវាចងចាំការដាក់តំបន់ប្រាសាទសំបូរព្រៃគុក និងប្រាសាទព្រះវិហារ ជាសម្បត្តិបេតិកភណ្ឌពិភពលោក។

នាថ្ងៃទី១៥ ខែកក្កដា ខាងមុខនេះ រាជរដ្ឋាភិបាលកម្ពុជា ក៏នឹងប្រារព្ធពិធីរំឭកខួបអនុស្សាវរីយ៍នៃការចុះបញ្ជីប្រាសាទព្រះវិហារ និងតំបន់ប្រាសាទសំបូរព្រៃគុក ជាសមប្បត្តិបេតិកភណ្ឌពិភពលោក នៅពហុកីឡដ្ឋានជាតិអូឡាំពិកកម្ពុជាផងដែរ ដែលពិធីដ៏អធឹកអធ័មនេះនឹងប្រព្រឹត្តទៅក្រោមអធិបតីភាព សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត៕