(ភ្នំពេញ)៖ នៅថ្ងៃទី១០ ខែកក្កដា ឆ្នាំ២០១៨នេះ ក្រុមប្រតិបត្តិការចម្រុះនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ សហកាជាមួយស្នងការដ្ឋាននគរបាលរាជធានីភ្នំពេញ ក្រោមការសម្របសម្រួលពីលោក សៀង សុខ ព្រះរាអាជ្ញារង នៃអយ្យការអមសាលាដំបូងរាជធានីភ្នំពេញ បានបន្តឃាត់ខ្លួនជនជាតិនីហ្សេរីយ៉ា និងជនជាតិវៀតណាមសរុប១៧នាក់ ក្នុងនោះមានស្រី៥នាក់ បន្ទាប់ពីរកឃើញថា ពួកគេបានរស់នៅ និងធ្វើការខុសច្បាប់ក្នុងខណ្ឌចំការមន និងខណ្ឌ៧មករា។

លោកឧត្តមសេនីយ៍ឯក អ៊ុក​ ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានប្រាប់អង្គភាពព័ត៌មាន Fresh News ថា ការចុះត្រួតពិនិត្យ និងមានការឃាត់ខ្លួននេះ បានធ្វើឡើងនៅចំណតរថយន្តក្រុង ចំនួន៣កន្លែង (មុខវត្តមហាមន្ត្រី) ស្ថិតនៅផ្លូវ២៧៤ (ព្រះសីហនុ) សង្កាត់វាលវង់ ខណ្ឌ៧មករា និងហាងគុយទាវ-កាហ្វេ ស្ថិតនៅផ្លូវលេខ២៧៦កែង១១៣ សង្កាត់ទូលទំពូង២ ខណ្ឌចំការមន រាជធានីភ្នំពេញ។

លោកឧត្តមសេនីយ៍បានបញ្ជាក់ទៀតថា ពេលចុះត្រួតពិនិត្យនោះ កម្លាំងចម្រុះបានឃាត់ជនជាតិវៀតណាម១៦នាក់ ស្រី៥នាក់ និងជនជាតិនីហ្សេរីយ៉ាម្នាក់ ដែលបានលួចស្នាក់នៅ ប្រកបរបរដោយខុសច្បាប់ គ្មានលិខិតឆ្លងដែន និងប្រើប្រាស់ឯកសារមិនត្រឹមត្រូវ។

ក្រោយការឃាត់ខ្លួន ក្រុមប្រតិបត្តិការបានបញ្ជូនជនបរទេសទាំងនេះ ទៅកាន់អគ្គនាយកដ្ឋានអន្តោប្រវេសន៍ ដើម្បីត្រួតពិនិត្យឯកសារ និងសាកសួរតាមនីតិវិធីច្បាប់៕