(កំពង់ចាម)៖ កន្លែងធ្លាប់តែទទួលអាស្រ័យផលទឹក តាមរយៈត្រពាំង បឹងបួរ ជាយូណាស់មកហើយ តែពេលនេះប្រជាពលរដ្ឋជាង៣០០គ្រួសារ ស្ថិតនៅក្នុងឃុំស្រក ស្រុកកំពង់សៀម ខេត្តកំពង់ចាម បានផ្លាស់ប្តូរមកប្រើប្រាស់អណ្តូងទឹកស្នប់ជំនួសវិញ ដែលអន្នង់ទឹកទាំងនេះ ជាអំណោយរបស់លោកតា ហ៊ុន នាង និងលោកយាយ ឌី ប៉ុក ដែលជាឪពុកម្តាយ សម្តេចតេជោ ហ៊ុន សែន ចំនួន ១០អណ្តូង កាលពីថ្ងៃទី៦ ខែកក្កដា ឆ្នាំ២០១៨។
លោកស្រី ពេជ ចន្ទមុនី្ន ហ៊ុនម៉ាណែត ប្រធានមូលនិធិអណ្តូងទឹកស្អាតរបស់លោកតា ហ៊ុន នាង និងលោកយាយ ឌឺ ប៉ុក បានឲ្យដឹងថា ដោយមើលឃើញពីការលំបាក និងតម្រូវការទឹកស្អាត របស់ប្រជាពលរដ្ឋនៅក្នុងភូមិឃុំនេះ គ្មានទឹកស្អាតប្រើប្រាស់គ្រប់គ្រាន់នៅរដូវប្រាំង សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានចាត់ក្រុមការងារធ្វើជូនពួកគាត់តាមតម្រូវការ។
ថ្លែងនៅចំពោះមុខប្រជាពលរដ្ឋ លោកស្រី បានបញ្ជាក់ទៀតថា សម្ដេចទាំងពីរ លោកតែងតែគិតពីសុខទុក្ខប្រជាពលរដ្ឋគ្រប់ទីកន្លែង។ ជាក់ស្តែង ក្នុងឱកាសនេះ ទោះបីជាលោកមិនបានមកជួប ផ្ទាល់ក៏ដោយ ក៏លោកបានផ្តាំផ្ញើ សួរសុខទុក្ខប្រជាពលរដ្ឋ ពីចម្ងាយ តាមរយៈលោកស្រីដែលជាបុត្រ ប្រសារផងដែរ។
ប្រជាពលរដ្ឋដែលបានទទួលអាស្រ័យផល នៃអណ្តូងទឹកទាំងអស់ បានសម្តែងការដឹងគុណយ៉ាងជ្រាវជ្រៅចំពោះម្ចាស់អណ្តូង ជាពិសេសសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលតែងតែគិតគូដល់ប្រជាពលរដ្ឋគ្រប់ច្រកល្ហក ដោយមិនគិតពីនិន្នាការនយោបាយអ្វីឡើយ។
លោកស្រីប្រធាន បន្តថាអណ្តូងទឹកស្អាតទាំងអស់ ដែលជាអំណោយអណ្តូងទឹករបស់ឪពុកម្តាយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ត្រូវធ្វើជូនប្រជាពលរដ្ឋគ្រប់ ២៥រាជធានីខេត្ត ដែលរស់នៅឆ្ងាយពីប្រភពទឹកស្អាត តំបន់ដាច់ស្រយាល ពិសេសនៅរដូវប្រាំងចំនួន ១០០០អណ្តូង។
ឆ្លៀតក្នុងឱកាសនេះដែរ លោកស្រីក៏បានដឹកនាំសមាគមគ្រូពេទ្យស្ម័គ្រចិត្តយុវជនសម្ដេចតេជោ មកពិនិត្យសុខភាព សម្រាប់ពលរដ្ឋដែលមានបញ្ហាសុខភាព និងទទួលបានការពិគ្រោះ ជំងឺជាមួយគ្រូពេទ្យជំនាញ និងផ្តល់ថ្នាំព្យាបាលជំងឺស្រាលៗ ដោយមិនគិតថ្លៃ។ លើសពីនោះ ប្រជាពលរដ្ឋដែលមានសភាពជំងឺធ្ងន់ធ្ងរ ត្រូវបានបញ្ជូនមកព្យាបាលនៅភ្នំពេញ ក្រោមការឧបត្ថម្ភទាំងស្រុងពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផងដែរ៕
