(រតនគិរី)៖ នៅថ្ងៃទី៧ ខែកក្កដា ឆ្នាំ២០១៨ គឺជាថ្ងៃដំបូង នៃយុទ្ធនាការឃោសនារកសម្លេងឆ្នោត សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦។ សម្រាប់ខេត្តរតនគិរី ក៏ខុសពីបណ្តាខេត្ត នានា ទូទាំងព្រះរាជាណាចក្រកម្ពុជានោះដែរ, នៅថ្ងៃដំបូងនេះ គណបក្សប្រជាជនកម្ពុជាខេត្តរតនគិរី ក៏បានរៀបចំយុទ្ធនាការទ្រង់ទ្រាយធំ ដោយមានសមាជិក សមាជិកា អ្នកគាំទ្រជាង១ម៉ឺននាក់ អមដោយមធ្យោបាយជារថយន្ត៣៥០គ្រឿង និងម៉ូតូ១២០០គ្រឿង។
លោក ប៉ែន ឈុនឌី ប្រធានគណៈកម្មាការរៀបចំការបោះឆ្នោតខេត្តរតនគិរី បានថ្លែងប្រាប់អ្នកសារព័ត៌មានថា សម្រាប់ខេត្តរតនគិរី មានគណបក្សនយោបាយចំនួន១១ ដែលមកពីគណបក្សផ្សេងៗគ្នា នឹងចូលខ្លួនចូលរួមឃោសនារកសម្លេងឆ្នោត ក្នុងឱកាសយុទ្ធនាការឃោសនារកសម្លេងឆ្នោត ជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨នេះ។
លោក ប៉ែន ឈុនឌី បានបញ្ជាក់ថា គណបក្សនយោបាយទាំង១១ ដែលចូលរួមឃោសនារកសម្លេងឆ្នោតនៅក្នុងខេត្តរតនគិរីនេះរួមមាន៖ ទី១៖ គណបក្សខ្មែររួបរួមជាតិ, ទី២៖ គណបក្សសញ្ជាតិកម្ពុជា, ទី៣៖ គណបក្សសំបុកឃ្មុំសង្គមប្រជាធិបតេយ្យ, ទី៤៖ គណបក្សខ្មែរឈប់ក្រ, ទី៥៖ គណបក្សប្រជាធិបតេយ្យមូលដ្ឋាន, ទី៦៖ គណបក្សសាធារណៈរដ្ឋប្រជាធិបតេយ្យ, ទី៧៖ គណបក្សសម្ព័ន្ធដើម្បី ប្រជាធិបតេយ្យ, ទី៨៖ គណបក្សហ្វុនស៊ីនប៉ិច, ទី៩៖ គណបក្សឆន្ទៈខ្មែរ, ទី១០៖ គណបក្សជនជាតិដើមប្រជាធិបតេយ្យកម្ពុជា និងទី១១៖ គណបក្សប្រជាជនកម្ពុជា ។
ប្រធានគណៈកម្មាការរៀបចំការបោះឆ្នោតខេត្តរតនគិរីរូបនេះ បានឲ្យទៀតថា ក្នុងចំណោមគណបក្សនយោបាយទាំង១១នេះ នឹងធ្វើការឃោសនានៅថ្ងៃផ្សេងៗពីគ្នា ជាក់ស្តែង គណបក្សប្រជាជនកម្ពុជា ចាប់ផ្តើមធ្វើការឃោសនារកសម្លេងឆ្នោតចំនួន២លើក ដោយលើកទី១ នឹងធ្វើឡើងនៅថ្ងៃទី៧ ខែកក្កដានេះ និងថ្ងៃបញ្ចប់នឹងធ្វើឡើងនៅថ្ងៃទី២៧ ខែកក្កដាខាងមុខនេះ ដោយគ្រោងមានសមាជិកចូលរួមសរុបជាង១,២ម៉ឺននាក់ ដោយប្រើប្រាស់រថយន្តចំនួន៣៥០គ្រឿង និងទោចក្រយានយន្តចំនួន១.២០០គ្រឿង។
ជាមួយគ្នានឹងការបើកយុទ្ធនាការឃោសនាបោះឆ្នោតថ្ងៃទីដំបូង សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានប្រកាសជូនជនរួមជាតិ និងសុំការគាំទ្រពីជនរួមជាតិលើ «កម្មវិធីនយោបាយ សម្រាប់ការកសាង និងការពារមាតុភូមិ ឆ្នាំ២០១៨-២០២៣» ដែលជាត្រីវិស័យសម្រាប់ទម្រង់ទិសសកម្មភាពរបស់គណបក្ស ក្នុងការបន្តបំពេញភារកិច្ចចបម្រើជាតិ និងប្រជាជន រយៈពេល៥ឆ្នាំទៅមុខ។ កម្មវិធីនយោបាយនេះ បានកំណត់គោលដៅធំៗ ជាយុទ្ធសាស្ត្រ ដូចខាងក្រោម៖
ទី១៖ គោរព និងការពាររដ្ឋធម្មនុញ្ញ នៃព្រះរាជាណាចក្រកម្ពុជា ការពាររបបរាជានិយម និងរាល់សមិទ្ធផលរបស់ជាតិឱ្យបានគង់វង្សស្ថិតស្ថិរជានិរន្តរ៍ លើកកម្ពស់លទ្ធិប្រជាធិបតេយ្យ សេរីពហុបក្ស និងការគោរពសិទ្ធិមនុស្ស។
ទី២៖ ការពារឯករាជ្យ អធិបតេយ្យ បូរណភាពទឹកដី និងសន្តិភាពយ៉ាយរឹងមាំ មិនឱ្យកម្លាំងណាមួយមករំលោភបំពាន និងបំផ្លាញបានឡើយ ប្រឆាំងដាច់ខាតការជ្រៀតជ្រែករបស់បរទេស ចូលកិច្ចការផ្ទៃក្នុងរបស់កម្ពុជា។
ទី៣៖ កសាងព្រះរាជាណាចក្រកម្ពុជា ជារដ្ឋដ៏រឹងមាំ និងជឿលឿនដោយផ្អែកលើច្បាប់ ធានាការអនុវត្តច្បាប់ដោយស្មើភាពសម្រាប់ពលរដ្ឋគ្រប់រូប ពលរដ្ឋម្នាក់ៗ មានសិទ្ធិពេញលេញ និងមានភារកិច្ចចូលរួមយ៉ាងសកម្មក្នុងការកសាង និងការពារមាតុភូមិ។
ទី៤៖ បន្តអភិវឌ្ឍសេដ្ឋកិច្ច-សង្គម ឱ្យកាន់តែរីកចម្រើនខ្លាំងក្លា និងកាន់តែមានមូលដ្ឋានរឹងមាំ ដែលធានាឱ្យប្រជាជនមានជីវភាពរស់នៅយ៉ាងសមរម្យ ថ្លៃថ្នូរ ដោយចាកផុតពីភាពក្រីក្រ, ពីគ្រោះអវិជ្ជា, ពីជំងឺតម្កាត់នានា, ពីការកេងប្រវ័ញ្ច និងអំពើហិង្សាគ្រប់រូបភាព។
ទី៥៖ ពង្រឹងពង្រីកចំណងមិត្តភាព និងកិច្ចសហប្រតិបបត្តិការល្អប្រសើរ រវាងព្រះរាជាណាចក្រកម្ពុជា ជាមួយគ្រប់ប្រទេស និងអង្គការអន្តរជាតិនានា ដើម្បីជមរុញការអភិវឌ្ឍប្រទេស និងបង្កើនការចូលរួមយ៉ាងសកម្មរបស់កម្ពុជា ក្នុងបុព្វហេតុសន្តិភាព សន្តិសុខ ស្ថិរភាព និងវិបុលភាពនៅក្នុងតំបន់ និងភពលោក។
សូមបញ្ជាក់ថា យុទ្ធនាការឃោសនារកសំឡេងឆ្នោតនេះ មានរយៈពេល២០ថ្ងៃ ដែលចាប់ផ្តើមពីថ្ងៃនេះ រហូតដល់ថ្ងៃទី២៧ ខែកក្កដា។ ក្រៅពីការបើកយុទ្ធនាការឃោសនា រកសំឡេងឆ្នោត គណបក្សប្រជាជនកម្ពុជា នៅថ្ងៃនេះ ក៏នឹងធ្វើពិធីអបអរសាទរខួប៦៧ ថ្ងៃកំណើតរបស់ខ្លួនផងដែរ។ គណបក្សប្រជាជនកម្ពុជា មានឈ្មោះដើមថា «បក្សប្រជាជនបដិវត្ដន៍ខ្មែរ» បានបដិសន្ធិឡើងនៅថ្ងៃទី២៨ ខែមិថុនា ឆ្នាំ១៩៥១ ដោយមានប្រភពពីចលនាតស៊ូរបស់ប្រជាជនកម្ពុជា ប្រឆាំងពួកអាណានិគមនិយមដើម្បីឯករាជ្យជាតិ។
ចាប់តាំងពីថ្ងៃបដិសន្ធិមកគណបក្សប្រជាជនកម្ពុជា បានប្រកាន់ខ្ជាប់ជានិច្ចនូវគោលបំណង និងឧត្តមគតិរបស់ខ្លួន គឺឈរនៅខាងប្រជាជនផ្សារភ្ជាប់រួមសុខទុក្ខជាមួយប្រជាជន ពុះពារជម្នះគ្រប់ឧបសគ្គ ហ៊ានធ្វើពលិកម្មឥតរុញរា ដើម្បីកម្ពុជា ឯករាជ្យ សន្ដិភាព សេរីភាព ប្រជាធិបតេយ្យ អព្យាក្រឹត្យ និងវឌ្ឍនភាពសង្គម។
ក្នុងកាលៈទេសៈដែលប្រទេសជាតិត្រូវធ្លាក់ក្នុងគ្រោះមហន្ដរាយប្រល័យពូជសាសន៍ ដែលរបបកម្ពុជាប្រជាធិបតេយ្យ បានបង្កឡើងចាប់ពីខែមេសា ឆ្នាំ១៩៧៥ គណបក្សប្រជាជនកម្ពុជា គឺជាកម្លាំងនយោបាយតែមួយគត់ ដែលបានក្រោកឈរតស៊ូ ហើយបានប្រមូលផ្ដុំរាល់កម្លាំងស្នេហាជាតិ បង្កើតឡើងរណសិរ្សសាមគ្គីសង្គ្រោះជាតិកម្ពុជា ដើម្បីបំផុស និងដឹកនាំចលនាប្រជាជននៅទូទាំងប្រទេស វាយផ្ដូលរំលំរបបដ៏យង់ឃ្នងនេះ៕
