(ស្ទឹងត្រែង)៖ កម្លាំងជំនាញនៃស្នងការដ្ឋាននគរបាលខេត្តក្រចេះ សហការជាមួយកម្លាំងជំនាញ នៃស្នងការនគរបាលខេត្តស្ទឹងត្រែង បានធ្វើការឃាត់ខ្លួនបុរសម្នាក់ ពីបទជួញដូរគ្រឿងញៀន ខុសច្បាប់ នៅល្ងាចថ្ងៃទី៦ ខែកក្កដា ឆ្នាំ២០១៨ នៅចំណុចភូមិព្រែកតាអាំ ឃុំបុសលាវ ស្រុកចិត្រ្តបូរី ខេត្តក្រចេះ ដោយសមត្ថកិច្ចបានដកហូតថ្នាំញៀន១គីឡូក្រាម។
នគរបាលជំនាញបានឲ្យដឹងថា ជនសង្ស័យដែលបានឃាត់ខ្លួននោះមានឈ្មោះ ភីន រិទ្ធ ភេទប្រុស ជនជាតិខ្មែរ មុខរបរ មិនពិតប្រាកដ មានអាយុ៤១ឆ្នាំ សព្វថ្ងៃរស់នៅភូមិថ្មី ឃុំខ្សាច់អណ្តែត ស្រុកឆ្លូង ខេត្តក្រចេះ។ ប្រតិបត្តិការខាងលើនេះ បានធ្វើឡើងក្រោមការបញ្ជាផ្ទាល់ពីលោកឧត្តមសេនីយ៍ទោ លន់ សុផាត ស្នងការនគរបាលខេត្តក្រចេះ និងលោកឧត្តមសេនីយ៍ទោ ម៉ៅ តារា ស្នងការនគរបាលខេត្តស្ទឹងត្រែង ក្រោមការសម្របសម្រួលពីតំណាងអយ្យការខេត្តទាំង២ផងដែរ។
នគរបាលបានបញ្ជាក់ទៀតថា ក្នុងប្រតិបត្តិការបង្ក្រាបនេះ បានដកហូតវត្ថុតាងថ្នាំញៀនប្រភេទមេតំហ្វេតាមីនICE ០១កញ្ចប់ធំ មិនទាន់ថ្លឹង(ប្រហែល01kg)។
នគរបាលបានឲ្យដឹងទៀតថា បច្ចុប្បន្នជនសង្ស័យ និងវត្ថុតាង បាននាំយករក្សាទុកនៅស្នងការដ្ឋាននគរបាលខេត្តដើម្បីកសាងសុំណុំឯកសារ តាមនិតិវិធីបញ្ជូនទៅសាលាដំបូងខេត្ត ដើម្បីធ្វើការវិនិច្ឆ័យទោសតាមច្បាប់៕
