(កំពង់ធំ)៖ លោក សុខ លូ អភិបាលខេត្តកំពង់ធំ បានចុះជួបសំណេះសំណាលជាមួយបងប្អូនកម្មករ និយោជិត របស់ក្រុមហ៊ុនចំការកៅស៊ូ កុល វាសនា ប្រមាណជិត ៤០០នាក់ នៅស្រុកប្រាសាទបល័្លង្ក ខេត្តកំពង់ធំ។

ថ្លែងក្នុងពិធីនេះរៀបចំឡើងនៅថ្ងៃទី០៥ ខែកក្កដា ឆ្នាំ២០១៨ លោក សុខ លូ បានមានមតិសំណេះសំណាល និងបាននាំនូវការផ្តាំផ្ញើ នឹករលឹករបស់សម្តេចតេជោ ហ៊ុន សែន ចំពោះបងប្អូនកម្មករទាំងអស់ក្នុងខេត្តកំពង់ធំ ក៏ដូចជាក្នុងស្រុកប្រាសាទបល្ល័ង្ក ដែលបន្ដគាំទ្រគណបក្សប្រជាជនកន្លងមក។

លោកបន្តទៀតថា បច្ចុប្បន្ននេះខេត្តកំពង់ធំ ផ្នែកវិស័យកសិកម្ម មានសន្ទុះកើនឡើងខ្ពស់ជាពិសេស ដំណាំកៅស៊ូ ស្វាយចន្ទី ដំឡូងមីជាដើម ម្យ៉ាងវិញទៀត ផ្នែកហេដ្ឋារចនាសម្ព័ន្ធ ក៏មានការកសាង សាលារៀន មន្ទីរពេទ្យ វត្តអារ៉ាម ផ្លូវថ្នល់ ក៏មានការកសាងជាបន្តបន្ទាប់ ធ្វើឲ្យការដឹកជញ្ជូនមានលក្ខណៈងាយស្រួលទៀតផង ដូច្នេះសូមបងប្អូនប្រជាពលរដ្ឋទាំងអស់ ចូលរួមថែរក្សាសន្តិភាព ស្ថេរភាពនយោបាយ ព្រោះសន្តិភាពនេះ មានតម្លៃណាស់ បើគ្មានសន្តិភាព គឺមិនមានការអភិវឌ្ឍនោះឡើយ និងសូមបងប្អូនថែរក្សាសុខភាពឲ្យបានល្អ និងត្រៀមឯកសារឲ្យបានគ្រប់គ្រាន់ ដើម្បីត្រៀមលក្ខណៈចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៦ ឲ្យបានគ្រប់ៗគ្នា ដែលនឹងចូលមកដល់ នៅថ្ងៃទី២៩ ខែកក្កដា ឆ្នាំ២០១៨ខាងមុខនេះ។

បន្ថែមពីនេះទៀត លោក ក៏បានសូមការអភ័យទោសពីការខ្វះខាត របស់មន្ត្រីរាជការនៅមូលដ្ឋាន ដែលបម្រើសេវាជូនប្រជាពលរដ្ឋមិនបានល្អ និងរាល់អំពើឆ្គាំឆ្គងទាំងឡាយណាដោយអចេតនា ព្រមទាំងបានណែនាំមន្ត្រីឲ្យចុះជាប់ ជាមួយមូលដ្ឋាន ខិតខំបម្រើប្រជាពលរដ្ឋឲ្យបានល្អ និងទាន់ពេលវេលា។

លោកបន្ថែមទៀតថា ការរំលាយគណបក្សសង្រ្គោះជាតិចោល ដោយតុលាការកំពូល មិនមែនមកពីអ្នកណានោះទេ គឺមកពីមេបក្សសង្រ្គោះជាតិខ្លួនឯង ដែលមានគំនិតក្បត់ជាតិ ក្បត់រដ្ឋធម្មនុញ្ញ ក្បត់ពាក្យសម្បថដែលបានស្បថមុខព្រះមហាក្សត្រ និងមុខព្រះស្វេត្រឆត្រ័ ឃុបឃិតជាមួយបរទេសចង់បង្កើតបដិវត្តន៍ពណ៍ ផ្តួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោត៕