(ភ្នំពេញ)៖ លោក ជា ចាន់តូ អគ្គទេសាភិបាល ធនាគារជាតិនៃកម្ពុជា បានឲ្យដឹងថា បច្ចុប្បន្ននេះវិស័យមីក្រូហិរញ្ញវត្ថុ មានអ្នកដាក់ប្រាក់បញ្ញើចំនួន១.៩លាននាក់ និងទទួលបានទឹកប្រាក់បញ្ញើ២.៣ពាន់លានដុល្លារ ហើយវិស័យនេះបានផ្ដល់ឥណទានសរុបចំនួន ៤.៨ពាន់លានដុល្លារអាមេរិក ទៅកាន់អតិថិជនប្រមាណ១.៨លាននាក់។
ការលើកឡើងបែបនេះ របស់លោកអគ្គទេសាភិបាលធនាគារជាតិនៃកម្ពុជា ធ្វើឡើងក្នុងឱកាសដែលលោកអញ្ជើញ ជាអធិបតីភាពក្នុងពិធីចែកសញ្ញាបត្រ ថ្នាក់ប្រកាសនីយបត្រជាន់ខ្ពស់ បច្ចេកទេសធនាគារ ជំនាន់ទី២៤-២៥ ចំនួន១៦៥នាក់ ក្នុងសាលមហោស្របកោះពេជ្រ នាព្រឹកថ្ងៃទី០៥ ខែកក្កដា ឆ្នាំ២០១៨។
លោកអគ្គទេសាភិបាល ជា ចាន់តូ បានឲ្យដឹងថា បច្ចុប្បន្ននេះ វិស័យមីក្រូហិរញ្ញវត្ថុ មានទ្រព្យសកម្មចំនួន៥.៥ពាន់លានដុល្លារ និងបានផ្ដល់ឥណទានសរុបប្រមាណ៤.៨ពាន់លានដុល្លារ ទៅកាន់អតិថិជនសរុបប្រមាណ១.៨លាននាក់ និងបានប្រមូលប្រាក់បញ្ញើសរុបចំនួន២.៣ពាន់លានដុល្លារ ក្នុងនោះមានអ្នកដាក់ប្រាក់បញ្ញើសរុបចំនួន១.៩លាននាក់។
លោកបានបញ្ជាក់ទៀតថា ការផ្ដល់ឥណទាននេះ បានលើកម្ពស់ជីវភាពរស់នៅ របស់ពលរដ្ឋតាមរយៈការឆ្លើយតប ទៅនឹងតម្រូវការសេវាហិរញ្ញវត្ថុរបស់អតិថិជន ក្នុងការប្រកបអាជីវកម្មប្រចាំថ្ងៃ ហើយបច្ចុប្បន្ននេះ មានពលរដ្ឋពេញវ័យកំពុងប្រើប្រាស់សេវា ហិរញ្ញវត្ថុផ្លូវការបានកើនឡើងយ៉ាងឆាប់រហ័ស រហូតដល់៧៥ភាគរយ នៃប្រជាជនពេញវ័យសរុប ដែលកើនឡើងចំនួន៧ដងបើធៀបនឹងឆ្នាំ២០០៥។
សូមបញ្ជាក់ថា វិស័យធនាគារបានចូលរួមយ៉ាងសកម្ម តាមរយៈការផ្ដល់សេវាហិរញ្ញវត្ថុប្រកបដោយវិសាលភាព និងបរិយាប័ន្ន ដែលបានលើកស្ទួយជីវភាពរស់នៅ របស់ប្រជាពលរដ្ឋ និងកាត់បន្ថយភាពក្រីក្រនៅក្នុងប្រទេសកម្ពុជា។
ឆ្លៀតក្នុងឱកាសនោះ លោក ជា ចាន់តូ ក៏បានវាយតម្លៃខ្ពស់ ចំពោះជ័យលាភីរបស់សិស្សានុសិស្ស ដែលបានបញ្ចប់ការសិក្សាយ៉ាងជោគជ័យ លើមុខជំនាញធនាគារ ក្នុងមណ្ឌលសិក្សាបច្ចេកទេសធនាគារ។ ការទទួលបានសញ្ញាបត្រ ប្រកាសនីយបត្រជាន់ខ្ពស់បច្ចេកទេសធនាគារ នាពេលនេះ គឺជាជោគជ័យ និងមោទនភាពរួម ទាំងចំពោះក្មួយៗ មាតាបិតាអាណាព្យាបាល សាស្រ្ដាចារ្យ និងប្រទេសជាតិផងដែរ៕
