(ភ្នំពេញ)៖ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានណែនាំឲ្យមន្ទីរសុខាភិបាលរាជធានី-ខេត្តទាំងអស់ ត្រៀមលក្ខណ:ទុកជាមុន ដោយមានផែនការត្រឹមត្រូវ សម្រាប់អន្តរាគមន៍ និងផ្តល់សេវាសុខភាព ជូនប្រជាពលរដ្ឋ ប្រសិនបើមានគ្រោះមហន្តរាយទឹកជំនន់ ក្នុងរដូវភ្លៀងដែលកំពុងតែធ្លាក់មកជាបន្តបន្ទាប់នេះ ។
រដូវភ្លៀងបានមកដល់ហើយ ក៏កំពុងតែបង្អោរធ្លាក់មកយ៉ាងខ្លាំង នៅតាមតំបន់មួយចំនួន ដែលនឹងអាចមានទឹកជំនន់កើតមានឡើងនៅក្នុងឆ្នាំនេះ បើយោងតាមការព្យាករណ៍ឧតុនិយម លើអាកាសធាតុ និងយោងតាមបទពិសោធន៍ពីគ្រោះមហន្តរាយ ដោយសារទឹកជំនន់នាឆ្នាំមុនៗ ហើយដើម្បីត្រៀមលក្ខណៈទុកជាមុន លោកសាស្ត្រាចារ្រ ម៉ម ប៊ុនហេង រដ្ឋមន្ត្រីក្រសួងសុខាភិបាល បានផ្តាំផ្ញើណែនាំ ឲ្យមន្ទីរសុខាភិបាលរាជធានី-ខេត្តទាំងអស់ រៀបចំផែនការត្រឹមត្រូវ សម្រាប់គ្រប់គ្រងកាត់បន្ថយនូវហានិភ័យដោយសារទឹកជំនន់ និងជួយអន្តរាគមន៍ ផ្តល់សេវាសុខភាព ជូនប្រជាពលរដ្ឋ ឲ្យបានទាន់ពេលវេលា ប្រសិនបើមានគ្រោះមហន្តរាយទឹកជំនន់កើតមានឡើង ក្នុងរដូវភ្លៀងដែលកំពុងតែធ្លាក់មក ជាបន្តបន្ទាប់នៅក្នុងឆ្នាំនេះ។
នេះបើយោងតាមការលើកឡើង របស់អ្នកនាំពាក្យក្រសួងសុខាភិបាល និងជាអគ្គនាយកបច្ចេកទេសសុខាភិបាល លោកស្រីវេជ្ជបណ្ឱិត ឱ វណ្ណឌីន ដែលបានពាំនាំនូវអនុសាសន៍ណែនាំរបស់រដ្ឋមន្ត្រី ម៉ម ប៊ុនហេង ជូនថ្នាក់ដឹកនាំ និងមន្ត្រីទទួលបន្ទុកការងារគ្រោះមហន្តរាយនៃមន្ទីរសុខាភិបាលរាជធានី-ខេត្តទាំងអស់ នៅក្នុងឱកាសអញ្ជើញចូលរួមជាអធិបតី ក្នុងពិធីបើកសិក្ខាសាលាពង្រឹងសមត្ថភាពសហគមន៍ ស្តីពី ការកាត់បន្ថយផលប៉ះពាល់សុខភាព ដោយសាការប្រែប្រួលអាកាសធាតុ តាមរយៈការគ្រប់គ្រង និងការកាត់បន្ថយហានិភ័យគ្រោះមហន្តរាយ នៅថ្ងៃទី០៤ ខែកក្កដា ឆ្នាំ២០១៨ នៅសណ្ឋាគារហូលីដេ ទីរួមខេត្តបាត់ដំបង។
លោកស្រី បានគូសបញ្ជាក់ និងពន្យល់ណែនាំផងដែរថា ដើម្បីផ្តល់ចំណេះដឹង និងពង្រឹងសមត្ថភាពបន្ថែមទៀត ដល់មន្រ្តីសុខាភិបាល លើការគ្រប់គ្រងហានិភ័យគ្រោះមហន្តរាយ ព្រមទាំងការត្រៀមរៀបចំផែនការពាក់ព័ន្ធនឹងការជួយអន្តរាគមន៍សុខភាពនៅពេលមានទឹកជំនន់ ហើយការប្រែប្រួលអាកាសធាតុ ជាបាតុភូតឌីណាមិកផង និងបាតុភូតប្រព្រឹត្តកម្ម ដោយសារមនុស្សផង ហើយសូម្បីតែមនុស្ស ក៏មានការប្រែប្រួលខ្លួនពីទារក ទៅកុមារ ទៅពេញវ័យ ទៅវ័យចាស់ជរា ។ដូចគ្នានេះដែរ កត្តាធម្មជាតិក៏មានការប្រែប្រួលផងដែរ ប៉ុន្តែវាមានលំនាំផ្សេងៗគ្នា មានកត្តាធម្មជាតិ និងកត្តាមនុស្សកត្តាធម្មជាតិ ដូចជាទឹកជំនន់ គ្រោះរាំងស្ងួត និងខ្យល់កន្រ្តាក់ រន្ទះបាញ់ជាដើម ។
កត្តាមនុស្ស ដូចជាការអភិវឌ្ឍន៍ឆាប់រហ័ស លើឧស្សាហកម្ម ដែលអាចមានការបច្ចេញនូវឧស្ម័នបំពុលបរិស្ថាន និងឧស្ម័នដែលអាចធ្វើឲ្យឡើងកំដៅផែនដី ការសាងសង់អាគារធំៗ ដែលអាចនឹងមានការទុកដាក់កាកសំណល់ និងការបង្ហូរទឹកស្អុយ ពុំបានត្រឹមត្រូវ និងខ្វះការ ប្រុងប្រយ័ត្នធ្វើឱ្យប៉ះពាល់ដល់បរិស្ថាន និងសុខភាពជាដើម ។ទន្ទឹមនឹងនោះ ត្រូវយកចិត្តទុកដាក់ទៅលើគ្រោះទឹកជំនន់ ព្រោះរដូវនេះ ជារដូវវស្សាអាចនឹងទទួលរងនូវទឹកជំនន់ ហើយនៅពេលដែលមានទឹកជំនន់ ធ្វើឱ្សមានបញ្ហាសុខភាពដូចជា ជំងឺបង្ករឡើងដោយសារទឹកមិនស្អាត ការពុលចំណីអាហារ ជំងឺរាគ អាសន្នរោគ ជំងឺដែលបង្ករឡើងដោយភ្នាក់ងារចម្លងមាន គ្រុនចាញ់ គ្រុនឈាម និងជំងឺរមាស់ ភ្នែកក្រហម រលាកផ្លូវដង្ហើម របួសដោយសារការប៉ះទង្គិចនឹងវត្ថុផ្សេងៗ ពស់ចឹក លង់ទឹក និងវិបត្តិផ្លូវចិត្តផងដែរ ។
លោកស្រីវេជ្ជបណ្ឌិតថ្លែងបន្ដថា អ្នកដែលងាយរងគ្រោះជាងគេ គឺ ស្រ្តីមានផ្ទៃពោះ កុមារ មនុស្សចាស់ និងជនពិការ ដូច្នេះ គ្រប់មន្ដ្រីទាំងអស់ ត្រូវយកចិត្តទុកដាក់រៀបចំផែនការត្រៀមឆ្លើយតប រួមមាន ទីទួលសុវត្ថភាព ទឹកស្អាត ក្រុមគ្រូពេទ្យ សម្ភារៈបរិក្ខា ថ្នាំពេទ្យ សម្រាប់ជួយសង្គ្រោះជនរងគ្រោះដោយ សារទឹកជំនន់ជាពិសេស ការអប់រំ សុខភាព និងសុវត្ថិភាពចំណីអាហារ និងសុខភាពផ្លូវចិត្ត ។
លើសពីនេះ ត្រូវផ្តល់នូវសេវាសុខភាព ជូនប្រជាពលរដ្ឋរងគ្រោះ ប្រសិនបើទោះជាមានទឹកជំនន់កើតមានឡើងក៏ដោយ ព្រោះប្រជាពលរដ្ឋនឹងអាចមានបម្លាស់ទី ទៅនៅតាមទីទួលសុវត្ថិភាព ដូច្នេះសេវាពិនិត្យផ្ទៃពោះ និងចាក់ថ្នាំបង្ការដល់កុមារ គឺត្រូវតែធ្វើជាចាំបាច់ ដោយក្រុមគ្រូពេទ្យចល័តទៅដល់ទីស្នាក់នៅរបស់ពួកគាត់ ។
សូមជម្រាបថា សិក្ខាសិលានេះ មានការអញ្ជើញចូលរួមពីតំណាងគណកម្មការគ្រប់គ្រងគ្រោះមហន្តរាយ តំណាងសម្ព័ន្ធភាពប្រែប្រួលអាកាសធាតុ នៃក្រសួងបរិស្ថាន ថ្នាក់ដឹកនាំ និងមន្ត្រីទទួលបន្ទុកការងារគ្រប់គ្រងគ្រោះមហន្តរាយនៃនាយកដ្ឋានការពារសុខភាព របស់ក្រសួងសុខាភិបាល បុគ្គលិកមន្ត្រីសុខាភិបាលមកពីខេត្តចំនួន១៥ និងតំណាងអង្គការសុខភាពពិភពលោកផងដែរ ៕
