(ភ្នំពេញ)៖ លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា បានលើកឡើងថា ដរាបណាស្ថានភាពនយោបាយ​នៅតែរក្សាលំនឹងល្អ វិស័យដីធ្លីគ្មានថ្ងៃជាប់គាំងឡើយ មានតែបន្ដឡើងថ្លៃជារៀងរហូត ហើយអ្វីដែលធ្វើឲ្យពលរដ្ឋខ្លាចនោះ គឺការផ្លាស់ប្ដូរនយោបាយ ដែលធ្វើឲ្យវិស័យនេះជួបបញ្ហា។

ការលើកឡើងបែបនេះ របស់លោកបណ្ឌិត គីម ហ៊ាង ធ្វើឡើងក្នុងឱកាសដែលលោកអញ្ជើញចូលរួមក្នុងវេទិកាស្ដីពី «ការធ្វើអាជីវកម្មអចលទ្រព្យ ក្នុង​ប្រទេសកម្ពុជាក្នុងថ្ងៃអនាគត» នាព្រឹកថ្ងៃទី០៤ ខែកក្កដា ឆ្នាំ២០១៨ ក្នុងមជ្ឈមណ្ឌលសហប្រតិបត្តិការកម្ពុជា-កូរ៉េ។

លោកបណ្ឌិតបានលើកឡើងថា ក្នុងប្រទេសដែលរីកចម្រើនមាន GDP (ចំណូលប្រចាំឆ្នាំសម្រាប់មនុស្សម្នាក់) លើសពី២ម៉ឺនដុល្លារឡើងទៅ មានប្រជាជន៩៥% បញ្ចប់មហាវិទ្យាល័យ ចាត់ទុកថាជាប្រទេសអភិវឌ្ឍន៍ ដែលសេដ្ឋកិច្ចដឹកនាំនយោបាយ ហើយក្នុងប្រទេសដែលកំពុងអភិវឌ្ឍន៍ជា ប្រទេសដែលនយោបាយ ដឹកនាំ​សេដ្ឋកិច្ច​ ជាស្ដែង​ដូចក្នុងប្រទេសកម្ពុជា ប្រសិនបើមានការផ្លាស់ប្ដូរនយោបាយ ទើបជារឿងមួយដែលគួរឲ្យបារម្ភ តែប្រទេសកម្ពុជាជាប្រទេស ដែលមានស្ថេរភាពនយោបាយរឹងមាំល្អ....ជាក់ស្ដែងដូចឆ្នាំនេះ ជានីតិកាលទី៦ នៃការបោះឆ្នោត តែគ្មានចំណុចណាមួយ ដែលគួរឲ្យព្រួយរម្ភលើវិស័យអចលវត្ថុនោះឡើយ។

លោកបានបន្ដទៀតថា «លំនឹងនយោបាយល្អនេះហើយ ដែលធ្វើឲ្យបរទេសនាំគ្នា មកវិនិយោគក្នុងប្រទេសកម្ពុជា ព្រោះប្រទេសណា ដែលមានលំនឹង​នយោបាយល្អ នោះគេនឹងមកវិនិយោគច្រើនឡើងៗ»។

សូមបញ្ជាក់ថា កន្លងទៅមានមតិព្រួយបារម្ភជាច្រើនពាក់ព័ន្ធ នឹងការធ្លាក់ចុះ ឬជាប់គាំលើវិស័យដីធ្លី ព្រោះថា ឆ្នាំនេះជាឆ្នាំបោះឆ្នោតជ្រើសតាំង​តំណាងរាស្រ្ដ ក្នុងនោះដែរ លោកឧកញ៉ា ចេង ខេង ប្រធានក្រុមប្រឹក្សា​ភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ធ្លាប់បានឲ្យដឹងនាពេលកន្លងថា រហូតមកដល់ពេលនេះ មិនមានសញ្ញាណាមួយបង្ហាញពី ​ការប្រែ​ប្រួលទៅលើ​តម្លៃ នៃអចលវត្ថុនោះឡើយ ទោះបីការបោះឆ្នោតជ្រើសរើសតំណាងរាស្រ្ដ នីតិកាលទី៦ នឹងឈានចូលមកដល់នាពេលឆាប់ៗក៏ដោយ៕