(រតនគិរី)៖ កម្លាំងនគរបា​លព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តរតនគិរី សហការជាមួយកម្លាំងនគរបាលក្រុងបានលុង និងកម្លាំងនគរបាលប៉ុស្តិ៍សង្កាត់​ឡាបានសៀក ក្រោមការសម្របសម្រួលនី​តិវិធីពីលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្ត នៅថ្ងៃទី៣ ខែកក្កដា ឆ្នាំ២០១៨ បានឃាត់ខ្លួនជនសង្ស័យម្នាក់ ពីបទលួច ព្រះបដិមាករ នៅចំណុចភូមិ៧មករា សង្កាត់ឡាបានសៀក។

មន្ត្រីនគ​របាល ដែលចុះប្រតិបត្តិការ បានប្រាប់ឲ្យដឹងថា ជនសង្ស័យនេះមានឈ្មោះឡៃ ស៊ីវន្ថា អាយុ៣៣ឆ្នាំ ពាក់ព័ន្ធនឹងករណីចោរកម្ម «លួចបដិមាករព្រះ» កាលពីថ្ងៃទី១៧ ខែមិថុនា ឆ្នាំ២០១៨កន្លងទៅ នៅវត្តហាត់ប៉ក់ស្រុកវ៉ើនសៃ។​

​​ក្រោយឆែកឆេរនៅបន្ទប់ជនសង្ស័យរួច កម្លាំងនគរបាលបានរកឃើញ និងដកហូតបានរួមមាន៖ ព្រះប្រក់នាគក្បាល៧ចំនួន១អង្គធំ, រូបព្រះចំនួន២អង្គតូច, គងស្ពាន់តូច-ធំចំនួន៨, ចង្ក្រងស្ពាន់ចំនួន៦, រូបក្របីស្ពាន់១, ឆ្នាំងស្ពាន់១, កូនជញ្ជីងស្ពាន់២, រូបមាន់ស្ពាន់៣, តុំដាក់កំបោរស្ពាន់២, ផ្តិលស្ពាន់១, លោហៈធាតុប្រាក់២ផ្ទាំង, រូបព្រះថ្មកែវ១ និងម៉ូតូMSXចិនពណ៍ស១គ្រឿង(សេរីចាស់)។

បច្ចុប្បន្នជនស​ង្ស័យ និងវត្ថុតាងត្រូវបានឃាត់ខ្លួនរក្សាទុក នៅការិល័យកំរិតស្រាល នៃស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនទៅសាលាដំបូងខេត្ត រតនគិរី ដើម្បីផ្តន្ទាទោសតាមច្បាប់៕