(កំពង់ធំ)៖ លោក សុខ លូ អភិបាលខេត្តកំពង់ធំ នៅព្រឹកថ្ងៃទី០៣ ខែកក្កដា ឆ្នាំ២០១៨ បានអំពាវនាវសូមបងប្អូនប្រជាពលរដ្ឋ អញ្ជើញទៅចូលរួមបោះឆ្នោតឲ្យបានគ្រប់ៗគ្នា ដើម្បីឲ្យប្រទេសជាតិ ទទួលបាននូវសុខសន្តិភាព ស្ថិរភាពនយោបាយ មានការអភិវឌ្ឍលើគ្រប់វិស័យ ដោយមិនត្រូវជឿតាមការញុះញង់របស់បុគ្គលមួយចំនួននោះឡើយ ដែលឃោសនាមិនឲ្យបងប្អូនទៅបោះឆ្នោត។
ក្នុងពិធីជួបសំណេះសំណាលជាមួយ បងប្អូនប្រជាពលរដ្ឋ ដែលជាមេគ្រួសារក្នុងសង្កាត់អាចារ្យលាក់ ក្រុងស្ទឹងសែន ប្រមាណជាង១ពាន់នាក់ លោក សុខ លូ អភិបាលខេត្តកំពង់ធំ បានបញ្ជាក់ថា នៅថ្ងៃទី២៩ ខែកក្កដា ឆ្នាំ២០១៨ខាងមុខនេះ សូមបងប្អូនប្រជាពលរដ្ឋចូលរួមបោះឆ្នោតឲ្យបានគ្រប់ៗគ្នា។
លោកបានបញ្ជាក់ទៀតថា សម្រាប់ដំណើរការអភិវឌ្ឍប្រទេសជាតិ ក្រោមការដឹងនាំរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ក្នុងរយៈពេលជាង២០ឆ្នាំ បន្ទាប់ពីប្រទេសជាតិ ត្រូវបានរំដោះចេញពីសង្រ្គាមស៊ីវិល មកជាប្រទេសមានសុខសន្តិភាព ស្ថេរភាព និងការអភិវឌ្ឍ លើគ្រប់វិស័យ ជីវភាពរបស់ប្រជាពលរដ្ឋមានភាពប្រសើរឡើងជាបន្តបន្ទាប់។
លោកបានបន្ថែមទៀតថា សម្តេចតេជោ ហ៊ុន សែន បានបញ្ចប់សង្រ្គាម និងបង្រួបង្រួមជាតិឡើងវិញ បានជោគជ័យ ដោយនយោបាយ ឈ្នះ! ឈ្នះ! ជាមួយនឹងការយកចិត្តទុកដាក់លើចំណុចសំខាន់ៗ ចំនួន៣ រួមមាន៖ ទី១៖ ធានាការពារអាយុជីវិតប្រជាពលរដ្ឋ ក្នុងពេលធ្វើសមាហរណកម្ម, ទី២៖ រក្សាអាជីព និងមុខរបរប្រជាពលរដ្ឋឲ្យនៅដដែល និងទី៣៖ រក្សានូវកម្មសិទ្ធិ រួមទាំងទ្រព្យសម្បត្តិទាំងឡាយ របស់ប្រជាពលរដ្ឋ ដោយគ្មានការរឹបអូស ហើយអាចឈរជើងរស់នៅ និងប្រកបការងារជាធម្មតានៅទីតាំងនោះបាន។
លោកបានបន្តថា « សម្រាប់លក្ខខណ្ឌទាំង៣នេះហើយ ដែលនាំឲ្យប្រទេសជាតិមានសុខសន្តិភាពមកទល់សព្វថ្ងៃ បានធ្វើការកសាងហេដ្ឋារចនាសម្ព័ន្ធ ឲ្យមានការរីកចម្រើន ដោយផ្តើមចេញពីយើងទាំងអស់គ្នា »។
ជាចុងក្រោយ លោក សុខ លូ បាននាំនូវការផ្តាំផ្ញើ នឹករលឹករបស់សម្តេចតេជោ ហ៊ុន សែន ចំពោះបងប្អូនប្រជាពលរដ្ឋទូទាំងខេត្តកំពង់ធំ ក៏ដូចជានៅសង្កាត់អាចារ្យលាក់ និងថ្លែងអំណរគុណ បងប្អូនប្រជាពលរដ្ឋទាំងអស់ ដែលបានគាំទ្រការដឹកនាំដ៏ត្រឹមត្រូវរបស់រាជរដ្ឋាភិបាល ហើយប្តេជ្ញាថែរក្សាសុខសន្តិភាពនេះឲ្យបានយូរអង្វែងតទៅទៀត និងបោះឆ្នោតជូនគណបក្សប្រជាជន មានលេខរៀងទី២០ ក្នុងសន្លឹកឆ្នោត ដើម្បីគាំទ្រសម្តេចតេជោ ហ៊ុន សែន បន្តដឹកនាំអភិវឌ្ឍន៍នាវាកម្ពុជា ឲ្យកាន់តែរីកចម្រើនឆាប់រហ័សបន្ថែមទៀត៕
