(ភ្នំពេញ)៖ ប្រជាពលរដ្ឋខ្មែរដែលកំពុងធ្វើការនៅក្នុងប្រទេសថៃ បានជម្រាបតំណាងរាស្រ្តមណ្ឌលខេត្តបាត់ដំបង លោក ឈាង វុន ថា ពួកគាត់នឹងមកចូលរួមការបោះឆ្នោតនៅថ្ងៃទី២៩ ខែកក្កដានេះមិនខានឡើយ ដើម្បីជ្រើសរើសមេដឹកនាំតាមបែបលទ្ធិប្រជាធិបតេយ្យ។
ពលករនៅប្រទេសថៃ បានបញ្ជាក់ទៀតថា នេះជាឱកាសនៅក្នុងការប្រើប្រាស់សិទ្ធិរបស់ពួកគាត់ យ៉ាងពេញលេញដោយមិនចាញ់ការអូសទាញ របស់ជនអគតិមួយចំនួន ដែលបានអំពាវនាវមិនឲ្យពលរដ្ឋ ទៅបោះឆ្នោតនោះឡើយ។
ការលើកឡើងរបស់ប្រជាពលករខ្មែរ បានធ្វើឡើងនៅក្នុងឱកាសលោក ឈាង វុន សមាជិករដ្ឋសភា និងជាតំណាងរាស្រ្តមណ្ឌលខេត្តបាត់ដំបង បានអញ្ជើញចុះទៅសួរសុខទុក្ខ ពលរដ្ឋខ្មែរដែលកំពុងធ្វើការនៅក្នុងប្រទេសថៃដោយផ្ទាល់ នៅចុងខែមិថុនា និងដើមខែកក្កដា ឆ្នាំ២០១៨នេះ និងបាននាំការផ្តាំផ្ញើការសាកសួរសុខទុក្ខ ពីថ្នាក់ដឹកនាំព្រឹទ្ធសភា រដ្ឋសភា រាជរដ្ឋាភិបាល ជាពិសេសសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន និងសម្តេចក្រឡាហោម ស ខេង ជូនចំពោះពលរដ្ឋខ្មែរទាំងអស់។
លោក ឈាង វុន បានគូសបញ្ជាក់ថា ថ្នាក់ដឹកនាំស្ថាប័ននីតិប្បញ្ញត្តិ និងនីតិប្រតិបត្តិ បានយកចិត្តទុកដាក់ និងគិតគូរជានិច្ចពីសុខទុក្ខពលរដ្ឋកម្ពុជានៅគ្រប់ទីកន្លែង ពិសេសពលករខ្មែរនៅក្នុងប្រទេសថៃនេះ។ រដ្ឋាភិបាលកម្ពុជា បានខិតខំជំរុញដល់រដ្ឋាភិបាលថៃ ក្នុងការថែរក្សា យកចិត្តទុកដាក់ដល់ពលករខ្មែរ ហើយប្រទេសទាំងពីរ បានកំពុងសហការគ្នាយ៉ាងល្អ ក្នុងការផ្តល់ភាពស្របច្បាប់ដល់ពលរដ្ឋខ្មែរ ដែលកំពុងធ្វើការងារនៅក្នុងប្រទេសថៃឲ្យស្របច្បាប់ ហើយទទួលបានអត្ថប្រយោជន៍នានាទៅតាមច្បាប់ការងាររបស់ប្រទេសថៃ។
សូមជម្រាបថា លោក ឈាង វុន ក្នុងនាមជាប្រធានក្រុមការងារពិសេសទំនាក់ទំនងផ្សារភ្ជាប់ពលករកម្ពុជានោះ បានដឹកនាំក្រុមការងារទៅជួបសំណេះសំណាល និងសួរសុខទុក្ខពលករកម្ពុជា ដែលបានទៅធ្វើការនៅប្រទេសថៃ ពីថ្ងៃទី២៩ និង៣០ ខែមិថុនា ដល់ថ្ងៃទី០១ ខែកក្កដា ឆ្នាំ២០១៨ ហើយក្រុមការងារ បានជួបប្រជាពលករខ្មែរ ចំនួន១៧៥០នាក់ នៅនឹងកន្លែងចំនួន៤ផ្សេងគ្នា នៅក្នុងខេត្តរ៉ាក់យ៉ង ប្រទេសថៃ ដែលចំនួន៨០% នៃចំនួនពលករទាំងនេះ បានចេញពីខេត្តបាត់ដំបង។
តំណាងពលករខ្មែរទាំងអស់នោះ បានថ្លែងអំណរគុណ ដល់តំណាងរាស្រ្តរបស់គណបក្សប្រជាជនកម្ពុជា ដែលបានចុះមកជួបពួកគាត់ផ្ទាល់ និងសង្កត់ធ្ងន់ថា នៅថ្ងៃបោះឆ្នោតខាងមុខនេះ ពួកគេប្រាកដជានឹងទៅបោះឆ្នោតជូនគណបក្សប្រជាជនកម្ពុជា ដើម្បីជ្រើសរើសតំណាងរាស្រ្តល្អ ដែលគិតគូរពីសុខទុក្ខពលករ ពិសេសជ្រើសរើសមេដឹកនាំ ដែលបានលះបង់កម្លាំងកាយចិត្ត ជីវិតក្នុងការរំដោះប្រទេសជាតិ កសាងការពារសុខសន្តិភាព និងការអភិវឌ្ឍប្រទេសជាតិ ឲ្យមានការរីកចម្រើនរហូតសព្វថ្ងៃនេះ។
ជាមួយគ្នានេះ លោក ឈាង វុន បានថ្លែងអំណរគុណយ៉ាងជ្រាលជ្រៅចំពោះការសម្រេចចិត្តដ៏ត្រឹមត្រូវរបស់ពលករខ្មែរ ដែលកំពុងធ្វើការនៅក្នុងប្រទេសថៃ ដែលមានឆន្ទៈខ្ពស់ក្នុងការចូលរួមលើកកម្ពស់លទ្ធិប្រជាធិបតេយ្យ នីតិរដ្ឋនៅកម្ពុជា។ លោកបញ្ជាក់ថា ការបោះឆ្នោតជាការជ្រើសរើសមេដឹកនាំ តាមច្បាប់អន្តរជាតិ បែបប្រជាធិបតេយ្យ មិនមែនដូចអតីតគណបក្សសង្រ្គោះជាតិ ដែលមានចេតនាផ្តួលរំលំរដ្ឋាភិបាលស្របច្បាប់ តាមគម្រោងបដិវត្តន៍ពណ៌ ដើម្បីចង់ឡើងកាន់អំណាចតាមបញ្ជារបស់បរទេសនោះឡើយ៕
