(បន្ទាយមានជ័យ)៖ នៅថ្ងៃទី២ ខែកក្កដា ឆ្នាំ២០១៨ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ប្រធានក្រុមការងារថ្នាក់កណ្ដាល ចុះជួយខេត្តបន្ទាយមានជ័យ និងជាប្រធានកិត្តិយសសមាគមមូលនិធិមនុស្សចាស់ ខេត្តបន្ទាយមានជ័យ និងជាអនុប្រធានសមាគមអតីតយុទ្ធជនកម្ពុជា និងលោកស្រី ម៉ៅ ម៉ាល័យ កែ គឹមយ៉ាន អមដំណើរដោយក្រុមការងារថ្នាក់ជាតិ ខេត្ត ក្រុង ស្រុក និងមូលដ្ឋានបានអញ្ជើញចូលជាអធិបតី បញ្ចុះបឋមសិលាសាងសង់អគារបឋមសិក្សា១ខ្នង ២ជាន់ ស្មើនឹង១០បន្ទប់និងបន្តជួបសំណេះសំណាលជាមួយប្រជាពលរដ្ឋចំនួនជិត៥០០០នាក់ នៅសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្នុងឱកាសនោះ នាយឧត្តមសេនីយ៍ កែ គឹមយ៉ាន បានមានមតិសំណេះសំណាល និងពាំនាំការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំកំពូលរបស់ជាតិ និងបក្សរួមមាន៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្ស. សម្ដេចពញាចក្រី ហេង សំរិន ប្រធានរដ្ឋសភា និងប្រធានកិត្តិយសគណបក្ស។
ក្នុងឱកាសនោះដែរ នាយឧត្តមសេនីយ៍ កែ គឹមយ៉ាន ក្រោមយុទ្ធសាស្ត្រឈ្នះឈ្នះ និងពលិកម្មរបស់សម្តេចតេជោ ហ៊ុន សែន អតីតតំបន់វាយប្រយុទ្ធបង្ហូរឈាមខ្មែរ និងខ្មែរត្រូវបានប្រែក្លាយទៅជាតំបន់សន្តិសុខ និងអភិវឌ្ឍមានហេដ្ឋារចនាសម្ព័ន្ធ ផ្លូវ ថ្នល់ ស្ពាន សាលារៀន អគ្គិសនី។ល។ សម្រាប់ជួយសម្រួលដល់ការរស់នៅ និងទាក់ទាញវិនិយោគឲ្យមកបណ្តាក់ទុនស៊ី ផ្តល់ការងារជូនប្រជាពលរដ្ឋកាត់បន្ថយភាពក្រីក្រទន្ទឹម នឹងតម្រូវការទីផ្សារការងារ ការបណ្តុះបណ្តាលផលិតធនធានមនុស្សសម្រាប់ផ្គត់ផ្គង់ទីផ្សារការងារនោះជារឿងចាំបាច់បំផុត ដូចនេះហើយ ទើបសម្តេចតេជោ ហ៊ុន សែន ដាក់ពង្រាយសាលារៀន ដល់ជិតផ្ទះប្រជាពលរដ្ឋតែម្តងដើម្បីសម្រួលជូនកូនចៅយើងរឹតតែងាយស្រួលទៅសិក្សាក្រេបវិជ្ជាបន្ថែមទៀត។
ជាមួយគ្នានេះ នាយឧត្តមសេនីយ៍ កែ គឹមយ៉ាន បានថ្លែងអំណរគុណដល់បងប្អូនប្រជាពលរដ្ឋប៉ៅយប៉ែត ព្រមទាំងជនរួមជាតិដែលបោះឆ្នោតគាំទ្រគណបក្សប្រជាជន និងសូមបន្តទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ឲ្យបានគ្រប់គ្នា លេខរៀងទី២០ ងាយចាំ ងាយគិត ស្រួល់គូសដើម្បីសម្តេចតេជោ ហ៊ុន សែន មានឱកាសបន្តអភិវឌ្ឍន៍ប្រទេសជាតិយើង ឲ្យរីកចម្រើននិងមានសាលារៀន មន្ទីរពេទ្យកាន់តែច្រើនបន្ថែមទៀត ។
ជាវប្បធម៌ចែករំលែក និងគិតគូរពីសុខទុក្ខ នាយឧត្តមសេនីយ៍ កែ គឹមយ៉ាន បាននាំយកអំណោយ ថវិកា សម្ភារ ចែកជូនរួមមាន៖
ទី១៖ ជូនប្រជាពលរដ្ឋចំនួន៤០០០នាក់ ក្នុងម្នាក់ៗ ទទួលបានសារ៉ុង១ស្បែកជើង១គូ
ទី២៖ ជូនមនុស្សចាស់ពីអាយុ៧០ឆ្នាំឡើង នៅសង្កាត់ប៉ោយប៉ែតចំនួន២៥០នាក់ក្នុងម្នាក់ៗ ទទួលបាន៖ ថវិកា២ម៉ឺនរៀល សារ៉ុង១ ក្រម៉ា១ បំពង់ទឹកក្ដៅ ១ ទឹកដោះគោ ប្រេងកូឡ ស្ករស អំបិលអ៊ីយ៉ូត ប្រេងសណ្ដែក កៅអៀក
ទី៣៖ លោកគ្រូ អ្នកគ្រូ ៣៧០នាក់ ម្នាក់ទទួលបានថវិកា២ម៉ឺន សារ៉ុង១ ស្បែកជើង១គូ
ទី៤៖ យុវជនកាយរិទ្ធ កាកបាទក្រហម សសយក ចំនួន១៥០នាក់ ម្នាក់ៗទទួលបានថវិកា៥០០០រៀល ស្បែកជើង១គូ សារ៉ុង១
ទី៥៖ សិស្សានុសិស្ស៥២៧នាក់ម្នាក់ៗ សៀវភៅ ប៊ិច ខ្មៅដៃ និងថវិកា៣០០០រៀល
ទី៦៖ ជូនគណៈកម្មាធិការបក្សសង្កាត់ប៉ោយប៉ែត ថវិកា១លានរៀល
ទី៧៖ ជូនមណ្ឌលសុខភាពប៉ោយប៉ែតថវិកា៥០ម៉ឺនរៀល
ទី៨៖ ប្រគេនបច្ច័យកសាងវត្តបាលិលេយ្យ ចំនួន១លានរៀល៕
