(កំពង់ចាម)៖ លោក លី សាម៉េត សមាជិកគណបក្សប្រជាជនកម្ពុជា និងលោកឧកញ៉ា ឌី ប៉ូ ព្រមទាំងក្រុមការងារ បានជួបសំណេះសំណាលជាមួយប្រជាពលរដ្ឋនៅស្រុកកងមាស ខេត្តកំពង់ចាមចំនួន ១៥៧៧គ្រួសារ កាលពីព្រឹកថ្ងៃទី១ ខែកក្កដា ឆ្នាំ២០១៨ ហើយបាននាំយកអំណោយ មួយចំនួនទៅចែកជូនផងដែរ។
លោក លី សាម៉េត ក៏បានអំពាវនាវដល់ប្រជាពលរដ្ឋនៅស្រុកកងមាស ជាពិសេសប្រជាពលរដ្ឋនៅទូទាំងប្រទេស សូមបំពេញកាតព្វកិច្ចជាពលរដ្ឋល្អ ចូលរួមបោះឆ្នោតឱ្យបានគ្រប់ៗគ្នានៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ដើម្បីជ្រើសរើសថ្នាក់ដឹកនាំប្រទេស ដែលបានជួយរំដោះអាយុជីវិតប្រជាជន និងជាតិមាតុភូមិ ចេញពីរបបប្រល័យពូជសាសន៍ ប៉ុល ពត។
លោកបន្តថា ពិសេសទៀតនោះគឺ មេដឹកនាំដែលដឹងសុខទុក្ខប្រជាពលរដ្ឋ, រក្សាបាននូវសុខសន្តិភាព និងអភិវឌ្ឍប្រទេសអោយមានការរីកចម្រើនឥតឈប់ឈរ។ លោកបានថ្លែងយ៉ាងច្បាស់ថា «មានតេជោសែន ប្រទេសកម្ពុជាមានសុខសន្តិភាពនិងបន្តអភិវឌ្ឍ រីកចម្រើនឥតឈប់ឈរនៅទូទាំងប្រទេស»។
លោកលី សាម៉េត ថ្លែងថា នេះជាលើកទី១ហើយ ដែលលោកបានមកជួបសំណេះសំណាលជាមួយបងប្អូនប្រជាពលរដ្ឋ នៅឃុំពាមជីកង ហើយលោក សង្កេតឃើញថា បងប្អូនប្រជាពលរដ្ឋដ៏ល្អ គោរពច្បាប់ គោរពព្រះពុទ្ធសាសនា គឺដោយសារប្រទេសមានសុខសន្តិភាព ដែលរកបានដោយសម្តេចតេជោ ហ៊ុន សែន និងគណបក្សប្រជាជនកម្ពុជាតែមួយគត់។
ទន្ទឹមនឺងនេះដែរ លោកឧកញ៉ា ឌី ប៉ូ ក៏មានប្រសាសន៍ រំលឹកឡើងវិញអំពីរបប៣ឆ្នាំ ៨ខែ ២០ថ្ងៃ ដែលប្រជាជនរស់នៅក្នុងរបបប៉ុល ពត ពួកវាបានកាប់ សម្លាប់ប្រជាជនស្លូតត្រង់អស់ ជាង៣លាននាក់ដោយមិនរើសមុខ បង្អត់បាយធ្វើទារុណកម្មយ៉ាងឃោរឃៅសាហាវព្រៃផ្សៃ។ ប៉ុន្តែដោយសារតែមានគុណដ៏ ធំធេងមិនអាចបំភ្លេចបានរបស់គណបក្សប្រជាជនកម្ពុជា និងមានសម្តេចតេជោហ៊ុន សែន បានរំដោះប្រជាជនចេញពីរបបប៉ុល ពត នៅថ្ងៃ៧មករា១៩៧៩ ហើយខំកសាងប្រទេសតាំងពីបាតដៃទទេរហូតអភិវឌ្ឍន៍មានអ្វីៗគ្រប់បែបយ៉ាងដូចសព្វថ្ងៃនេះ ពោរពេញដោយសុខសន្តិភាពពេញផ្ទៃប្រទេសឱ្យមានការរីក ចម្រើនជាលំដាប់។
ដូច្នេះសូមបងប្អូនប្រជាពលរដ្ឋខ្មែរទូទាំងប្រទេសកម្ពុជា កុំបំភ្លេចថ្ងៃកំណើតទី២របស់ខ្លួនគឺថ្ងៃ៧មករានេះ ដែលចារជាប្រវត្តិសាស្ត្រ។ លោកក៏បានអំពាវនាវផងដែរ សូមបងប្អូនប្រជាជនទាំងអស់ទៅបោះឆ្នោតនៅថ្ងៃទី២៩ ខែកក្កដា ខាងមុខនេះដើម្បីគាំទ្រសម្តេចតេជាធ្វើជានាយករដ្ឋ មន្ត្រីក្នុងអាណត្តិទី៦នេះ និងអាណត្តិក្រោយៗជាបន្តទៀត ដើម្បីឱ្យលោកបានរក្សាសុខសន្តិភាព និងអភិវឌ្ឍន៍ឱ្យមានការរីកចម្រើនឥតឈប់ឈរ ។
លោកមឿន ផា ប្រធានគណបក្សប្រជាជនស្រុកកងមាសបានឱ្យដឹងថា ស្រុកកងមាស ជាស្រុកមួយក្នុងចំណោមស្រុកទាំង១០របស់ខេត្តកំពង់ចាម មានចម្ងាយប្រមាណ២៥គីឡូម៉ែត្រភាគខាងលិចទីរួមខេត្ត។ស្រុកកងមាស មាន១១ឃុំ និង៩៣ភូមិ មានផ្ទៃដីទំហំ៣៨០៩,៨០គីឡូម៉ែត្រការេ មានប្រជាពលរដ្ឋ ចំនួន៥៤៧៨៥គ្រួសារ និងមានប្រជាពលរដ្ឋសរុប ចំនួន១០៨.៧៥៤នាក់ ដង់ស៊ីតេប្រជាជនមាន២៨១នាក់ក្នុងមួយគីឡូម៉ែត្រការេ។
លោកបន្តថា ស្រុកកងមាសត្រូវបានអភិវឌ្ឍន៍លើគ្រប់វិស័យ ហើយថ្មីៗបានទទួលជោគជ័យជាបន្តបន្ទាប់ដូចជា ប្រព័ន្ធធារាសាស្ត្រ ទំនប់ ប្រឡាយ ស្រោច ស្រពតូចធំ បណ្តាញអគ្គិសនី ផ្លូវក្រាលគ្រួសក្រហម ជាពិសេសស្រុកបានទទួលផ្លូវក្រាលកៅស៊ូមានផ្លូវលេខជាតិលេខ៧០ប្រវែង១៣គីឡូម៉ែត្រនិងផ្លូវខេត្ត លេខ២៧០ ប្រវែង១៧គីឡូម៉ែត្រ, ស្ថាបនាស្ពានភូមិថ្មី, ស្ពានពាមជីកង, ស្ពានពាមក្នុង, ស្ពានអូរកណ្តោល, ស្ពានរកាគយ, ស្ពានព្រែកលីវ, ស្ពានព្រែកតូច, ស្ពានព្រែកប៉ារាយ, ស្ពានអូរស្វាយ, ស្ពានគោហ៊េ, ស្ពានកងជ័យនិងស្ពានថ្នាលដាច់ ។
លោកបន្តទៀតថា ឆ្នាំ២០១៧កន្លងទៅ សម្តេចតេជោហ៊ុន សែន បានឱ្យកាដូនូវផ្លូវចំនួន២ខ្សែ ជូនប្រជាពលរដ្ឋស្រុកកងមាស គឺខ្សែទី១ផ្លូវបេតុងប្រវែង៥គីឡូម៉ែត្រ (ទទឹង៥ម៉ែត្រ)ស្ពានបេតុងមួយប្រវែង៣៦ម៉ែត្រ នៅឃុំព្រែកក្របៅ និងខ្សែទី២ ផ្លូវក្រាលកៅស៊ូប្រវែង១៧គីឡូម៉ែត្រ(ទទឹង៦ម៉ែត្រ)នៅឃុំរាយប៉ាយ និងឃុំព្រែកកុយ មានស្ពានឆ្លងព្រែកស្ទឹងឆ្វេងជាដើម ។
នៅថ្ងៃនោះដែរលោកលី សាម៉េត និង លោកឧកញ៉ាឌី ប៉ូ បានចំណាយធនធានផ្ទាល់ខ្លួនចែករំលែកជូនដល់បងប្អូនប្រជាពលរដ្ឋ១៥៧៧គ្រួសាររួមមាន សារុង១ អាវ.មួក និងថវិកា២ម៉ឺនរៀល សរុបអស់ថវិកា៧៥លាន៦សែនរៀល។ ឧបត្ថម្ភជូនគណបក្សឃុំពាមជីកង១លានរៀល, គណបក្សស្រុកកងមាស២លានរៀល, គណបក្ស ឃុំគរ ស្រុកព្រៃឈរ១លានរៀល និងកងកម្លាំងប្រដាប់អាវុធ១លានរៀល, សរុប ៧លានរៀល។ ដោះស្រាយសំណើរួមមាន គណបក្សស្រុកកងមាស អាវ-មួកចំនួន៥០០, គណបក្សឃុំពាមជីកង អាវ-មួកចំនួន១០០០,សាខាភូមិដំណាក់ជ្រៃ អាវមួកចំនួន៥០០,គណបក្សស្រុកព្រៃឈរអាវមួកចំនួន៥០០និងគណបក្សឃុំគរ ស្រុកព្រៃឈរចំនួន ៥០០ សរុបអស់២៤លានរៀល។ សរុបរួមអស់១០៦លាន៦០០ពាន់រៀលស្មើនឹង២៦,៦៥០ដុល្លារ៕
