(បាត់ដំបង)៖ នារសៀលថ្ងៃទី២៧ ខែមិថុនា ឆ្នាំ២០១៨ លោក ច័ន្ទ សុផល ទីប្រឹក្សារាជរដ្ឋាភិបាលកម្ពុជា ប្រធានគណៈកម្មាធិការបក្សប្រជាជនកម្ពុជាខេត្តបាត់ដំបង បាននាំអំណោយសមាគមសិស្ស និស្សិត បញ្ញវ័ន ក្មេងវត្ត ចុះសួរសុខទុក្ខប្រគេនព្រះសង្ឃ និងចែកជូនក្មេងវត្ត តាជី យាយជី ចំនួនជាង១០០នាក់ ក្នុងឱកាសមុនថ្ងៃបុណ្យចូលព្រះវស្សាប្រពៃណីជាតិនៅវត្តពោធិ៍វាល ក្រុងបាត់ដំបង និងដោយមានការចូលរួមពីលោក ហេង ជំនិត ប្រធានសាខាសមាគមសិស្ស និស្សិត បញ្ញវ័ន ក្មេងវត្ត ប្រចាំខេត្តបាត់ដំបង និងថ្នាក់ដឹកនាំមន្រ្តីរាជការ អតីតក្មេងវត្តក្នុងក្រុងបាត់ដំបងចូលរួមជាច្រើនរូបផងដែរ។
ថ្លែងក្នុងឱកាសនោះលោក ហេង ជំនិត ប្រធានសាខាសមាគមសិស្ស និស្សិត បញ្ញវ័នក្មេងវត្ត ប្រចាំខេត្តបាត់ដំបង បានឱ្យដឹងថា សមាគមសិស្ស និស្សិត បញ្ញវ័នក្មេងវត្តនេះ បង្កើតឡើងដោយសម្តេចតេជោនាយកមន្រ្តី ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តាំងពីឆ្នាំ១៩៩៩ មកទល់បច្ចុប្បន្ន។
លោក ហេង ជំនិត បានបន្តថានៅថ្ងៃនេះសមាគមយើងបានចុះសួរសុខទុក្ខ និងនាំអំណោយយកទៅប្រគេន និងចែកជូនអតីតក្មេងវត្តចំនួនជាង១០០នាក់ ក្នុងចំណោម៣៦៣នាក់ ក្នុងនោះមានតាជី យាយជីមួយចំនួន មកពី វត្តនានាក្នុងក្រុងបាត់ដំបង ហើយអំណោយដែលត្រូវបានប្រគេន និងចែកជូននោះមាន វត្តពោធិ៍វាល បានអង្ករ៦ការ៉ុងបច្ច័យ១០ម៉ឺនរៀល ចំណែកវត្ត៩ផ្សេងទៀតក្នុង១វត្តបានទទួលអង្ករ២ការ៉ុង ទឹកត្រី១យួរ ទឹកស៊ីអ៊ីវ១យួរ បច្ច័យ១០ម៉ឺនរៀល ដោយឡែកតាជី យាជី និងក្មេងវត្តទាំងជាង១០០នាក់ម្នាក់ៗទទួលបានក្រមា១ ថវិកា១ម៉ឺនរៀលផងដែរ។
ក្នុងឱកាសនោះ លោក ច័ន្ទ សុផល បានថ្លែងអំណរគុណ និងវាយតម្លៃខ្ពស់ចំពោះថ្នាក់ដឹកនាំក្រុមការងារសមាគមប្រចាំខេត្តបាត់ដំបង ដែលបានចូលរួមធ្វើ កិច្ចការសង្គម ជាច្រើន ពិសេសការងារមនុស្សធម៌នេះ បានល្អប្រសើរកន្លងមក ទោះជាអំណោយនេះមានតិចតួចក្តី តែវាជាកាយវិការមួយដ៏ល្អ ចេះជួយគ្នាក្នុងគ្រា មានការ ខ្វះខាត មួយរយៈដែរ ហើយបានលើកស្ទួយដល់ជីវភាពរស់នៅរបស់ក្មេងវត្តទូទៅស្នាក់នៅរៀនសូត្រ ក៏ដូចជាបានចូលរួមចំណែកជួយបង្កើតធនធាន មនុស្សតាម រយៈសកម្មភាពសមាគម បានជួយដល់សិស្ស និស្សិតកំពុងស្នាក់នៅក្នុងវត្តដើម្បីរៀនសូត្រក្រេបយកចំណេះដឹង សម្រាប់យកទៅបម្រើប្រទេសជាតិទៅថ្ងៃក្រោយ។
លោក ច័ន្ទ សុផល បានក្រើនរំលឹកដល់យុវជនទាំងអស់ដែលជាសមាជិកសមាគមសិស្ស និស្សិត បញ្ញវ័នក្មេងវត្ត ត្រូវខិតខំតស៊ូរៀនសូត្រយកចំណេះដឹង ដើម្បីអនាគត់ របស់ខ្លួន ជាបន្តវេណក្រុមគ្រួសារ និងសង្គមជាតិយើងទាំងអស់គ្នាឆ្ពោះទៅរកការរីកចម្រើន។ លោកបានបញ្ជាក់ថា បើប្រទេសជាតិមានសង្រ្គាម យើងគ្មានពេល មកអភិវឌ្ឍន៍ជាតិនោះទេ ប្អូនជាយុវជនក៏គ្មានពេលបានមករៀនសូត្រដោយស្រួលនោះដែរ តែបើប្រទេសជាតិយើងសន្តិភាពវិញយើងទាំងអស់គ្នា មានលទ្ធភាពច្រើន កសាងធនធានមនុស្ស មានពេលអភិវឌ្ឍន៍ជាតិបានយ៉ាងឆាប់រហ័ស យើងរស់នៅបានសុខសាន្តតកូនតចៅ ដូច្នេះហើយយើងទាំងអស់គ្នាត្រូវនាំគ្នាការពារ រក្សាសន្តិភាពឲ្យបានគង់វង្សយូរអង្វែង។
លោក ច័ន្ទ សុផល បានអំពាវនាវដល់យុវជន និងលោកតា លោកយាយ ប្រជាពលរដ្ឋទាំងអស់នាំគ្នាទៅបោះឆ្នោតឲ្យបានគ្រប់ៗគ្នា ដើម្បីរើសថ្នាក់ដឹកនាំប្រទេស៥ឆ្នាំម្តង ប្រកបដោយឆ្លាតវៃសម្រេចជោគវាសនាប្រទេសជាតិពោពេញទៅដោយសន្តិភាពនិងការអភិវឌ្ឍន៍។
ជាថ្មីម្តងទៀតលោក ច័ន្ទ សុផល បានធ្វើការផ្តាំផ្ញើសាកសួរសុខទុក្ខពីសម្តេចទាំង២ ដល់អតីតក្មេងទាំងអស់ក្នុងឱកាសបុណ្យ ចូលព្រះវស្សាតាមប្រពៃណីជាតិ នឹងឈានចូលមកដល់ខាងមុខនេះ សូមជួបតែសុខសប្បាយ សម្រេចការងារអ្វីសូមឲ្យបានសម្រេចដូចបំណងប្រាថ្នា រួចគណអធិបតីបានចែកអំណោយដល់ អតីតក្មេងវត្តតាជី យាយជី និងថតរូបជាអនុស្សាវរីយ៍ផងដែរ៕
