(ភ្នំពេញ)៖ ប្រមុខរាជរដ្ឋាភិបាលកម្ពុជាដែលកំពុងបាញ់ឆ្ពោះអភិវឌ្ឍវិស័យឧស្សាហកម្មសម្តេចតេជោ ហ៊ុន សែន នៅព្រឹកថ្ងៃព្រហស្បតិ៍ ១រោច ខែបឋមាសាឍ ព.ស២៥៦២ ត្រូវនឹងថ្ងៃទី២៨ ខែមិថុនា ឆ្នាំ២០១៨ស្អែកនេះ នឹងអញ្ជើញជួបសំណេះសំណាលជាមួយបងប្អូនកម្មករ កម្មការិនីសរុប ២១,៤៦៥នាក់ មកពីរោងចក្រចំនួន១៤ ស្ថិតនៅស្រុកសាមគ្គីមានជ័យ ខេត្តកំពង់ឆ្នាំង។

ជំនួបរបស់សម្តេចតេជោ ហ៊ុន សែន ជាមួយបងប្អូនកម្មករ កម្មការិនីនៅក្នុងខេត្តកំពង់ឆ្នាំនាថ្ងៃស្អែកនេះ គឺជាជំនួបលើកទី៤៧ហើយ គិតចាប់តាំងពីថ្ងៃទី២០ ខែសីហា ឆ្នាំ២០១៧មក។ ជំនួបទាំង ៤៧លើកនេះ មានកម្មករ កម្មការិនីសរុប ៦២៦,៦៧៧នាក់ ដែលបានចូលរួមសំណេះសំណាលដោយផ្ទាល់ជាមួយសម្តេចតេជោ ហ៊ុន សែន។

ខេត្តកំពង់ឆ្នាំ គឺជាខេត្តទី៧ ហើយ ដែលសម្តេចតេជោ ហ៊ុន សែន បានអញ្ជើញចុះជួបសំណេះសំណាលជាមួយបងប្អូនកម្មករ កម្មការិនី បន្ទាប់ពីខេត្តកំពង់ចាម កំពង់ស្ពឺ កណ្តាល ស្វាយរៀង ព្រះសីហនុ និងតាកែវ។ លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានប្រាប់អង្គភាពព័ត៌មាន Fresh News ថា រោងចក្រសហគ្រាសទាំង១៤ ដែលអនុញ្ញាតឲ្យកម្មករ កម្មការិនីអញ្ជើញជួបសំណេះសំណាលជាមួយសម្តេចតេជោនេះ មកពីរោងចក្រក្នុងក្រុងកំពង់ឆ្នាំងចំនួន២ រោងចក្រក្នុងស្រុកកំពង់ត្រឡាចចំនួន៩ រោងចក្រក្នុងស្រុកសាមគ្គីមានជ័យចំនួន២ និងស្រុករលាប្អៀរចំនួន១។ រោងចក្រទាំង១៤នេះ មានរោងចក្រកាត់ដេរសម្លៀកបំពាក់ចំនួន៧, រោងចក្រផលិតស្បែកជើងចំនួន១, រោងចក្រផលិតកាបូបចំនួន២, រោងចក្រផលិតស្រាបៀរ និងភេសជ្ជៈចំនួន២ និងម៉ាស៊ីនកិនស្រូវចំនួន២។ ផលិតផលផលិតចេញពីរោងចក្រទាំងនេះ ត្រូវបាននាំចេញទៅកាន់ទីផ្សារអន្តរជាតិ និងផ្គត់ផ្គង់ទីផ្សារក្នុងប្រទេស។

ខេត្តកំពង់ឆ្នាំង ក៏ជាតំបន់សមរភូមិប្រយុទ្ធដ៏ស្រួចស្រាវមួយផងដែរកាលពីអតីតកាល តែក្រោយពេលសង្គ្រាមត្រូវបានបញ្ចប់ក្រោមនយោបាយឈ្នះឈ្នះរបស់សម្តេចតេជោ ហ៊ុន សែន បច្ចុប្បន្នខេត្តនេះ បានក្លាយជាតំបន់ដែលមានការអភិវឌ្ឍខាងវិស័យឧស្សាហកម្ម និងកសិកម្មឈានមុខមួយផងដែរ។

លោក អ៉ិត សំហេង បានឲ្យដឹងថា មកដល់ពេលបច្ចុប្បន្នខេត្តកំពង់ឆ្នាំង មានសហគ្រាស គ្រឹះស្ថានចំនួន១៥២ មានកម្មករ និយោជិត ៤៣,៧៧២នាក់ ក្នុងនោះរោងចក្រកាត់ដេរសម្លៀកបំពាក់ និងផលិតស្បែកជើងមានចំនួន១៨ មានកម្មករ និយោជិតចំនួន ៤២,១២៦នាក់ ដែលមានប្រាក់ឈ្នួលសរុបជាង ៩៤លានដុល្លារអាមេរិកក្នុងមួយឆ្នាំ។

លោករដ្ឋមន្ត្រី បានគូសបញ្ជាក់ថា ការអភិវឌ្ឍតំបន់នេះ គឺជាជោគជ័យនៃគោលនយោបាយទាក់ទាញវិនិយោគ បង្កើតការងារជូនកម្មករ និយោជិតរបស់រាជរដ្ឋាភិបាល និងជាជោគជ័យក្នុងការអនុវត្តគោលនយោបាយជាតិស្តីពីមុខរបរ និងការងារ, គោលនយោបាយអភិវឌ្ឍន៍វិស័យឧស្សាហកម្មកម្ពុជា, គោលនយោបាយស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិគាំពារសង្គម ដែលបាននឹងកំពុងប្រែក្លាយខេត្តកំពង់ឆ្នាំង ទៅជាខេត្តដែលមានការអភិវឌ្ឍសេដ្ឋកិច្ចដូចបណ្តាខេត្តនានាផងដែរ៕