(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានធ្វើប្រទានកម្មដីធ្លីនៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ ជូនប្រជាពលរដ្ឋចំនួន៣៨០គ្រួសារ នៅពេលខាងមុខនេះ ដើម្បីឲ្យបងប្អូន ទទួលបានសិទ្ធិលំនៅដ្ឋានរស់នៅស្របច្បាប់ លែងមានការភិតភ័យចំពោះបាត់បង់ដីធ្លី។

អាជ្ញារាជធានីភ្នំពេញ មន្ទីររៀបចំដែនដី នគររូបនីយកម្ម សំណង់ និងសូរិយាដី និងខណ្ឌមានជ័យ សម្រេចប្រគល់ដីប្រទានកម្មពីសម្តេចតេជោ ហ៊ុន សែន ជូនប្រជាពលរដ្ឋ៣៨០គ្រួសារ រស់នៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ តាមការស្នើសុំរបស់ប្រជាពលរដ្ឋទាំងអស់នោះ។

ក្នុងពិធីប្រគល់ដីប្រទានកម្ម ពីសម្តេចតេជោ ហ៊ុន សែន ជូនប្រជាពលរដ្ឋចំនួន៣៨០គ្រួសារ រស់នៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ នៅព្រឹកថ្ងៃទី២៧ ខែមិថុនា ឆ្នាំ២០១៨ នៅសាលាខណ្ឌមានជ័យ, លោក ឃួង ស្រេង អភិបាលរាជធានីភ្នំពេញ បានលើកឡើងថា ការសម្រេចចិត្តរបស់អាជ្ញាធរប្រគល់ដីប្រទានកម្មជូនបងប្អូន ដែលរងផលប៉ះពាល់ ពីការអភិវឌ្ឍតំបន់បឹងជើងឯក នាពេលនេះ គឺអនុវត្តន៍ទៅតាមការណែនាំរបស់សម្តេចតេជោ ហ៊ុន សែន ដែលបងប្អូនបានស្នើសុំពីសម្តេចកន្លងមក។ លោកអភិបាល បន្តថា ដោយពិនិត្យឃើញពីភាពលំបាករបស់បងប្អូន សម្តេចក៏បានប្រគល់ដីប្រទានកម្មនេះ តាមរយៈរដ្ឋបាលសាលារាជធានីភ្នំពេញ ពីព្រោះបងប្អូនពិតជារស់នៅទីតាំងនេះជាយូរឆ្នាំមែន។

លោកអភិបាលបានបន្ថែមថា «ក្នុងមានគណៈអភិបាលរាជធានីភ្នំពេញ មានសេចក្តីរំភើបរីករាយមកផ្សព្វផ្សាយជូននេះ គឺថាសំណើររបស់បងប្អូន ទៅសម្តេចតេជោ ហ៊ុន សែន ត្រូវបានសម្តេចសម្រេច ចិត្តធ្វើប្រទានកម្ម ក្នុងនាមជាប្រមុខរាជរដ្ឋាភិបាលកម្ពុជា និងក្នុងនាមជាថ្នាក់ដឹកនាំ ដែលតែងតែយកចិត្តទុកដាក់ជីវភាពទៅលើការរស់នៅរហូតដល់ថ្ងៃនេះ ថា អាចបោះឆ្នោតហើយភ្លាម និងទទួលបានកម្មសិទ្ធិហើយ។ ការប្រគល់ដីប្រទានកម្មដីជូនបងប្អូននេះ គឺមានការចុះវាស់វែងពីមន្ត្រីជំនាញ និងអាជ្ញាធរ បានច្បាស់លាស់ ទើបឈានទៅដល់ការធ្វើប័ណ្ណកម្មសិទ្ធិ និងប្រគល់ប័ណ្ណកម្មសិទ្ធិស្របច្បាប់»។

ពួកគាត់ទន្ទឹងរង់ចាំប័ណ្ណមួយនេះ ជាយូរមកហើយ ព្រោះវាពិតជាមានសារសំខាន់ណាស់ សម្រាប់ពួកគាត់ អាចរស់នៅមានសិទ្ធិពេញលេញ ក្នុងការគ្រប់គ្រង អាចខ្ចី ឬបញ្ចាំជាមួយធនាគារ យកដើមទុនរកស៊ីបាន ហើយក៏អាចផ្ទេរមរតក ចែកកូនចៅទៅអនាគតបន្ថែមទៀត។

លោកថា «ការចែកវិញ្ញាបនបត្រសម្គាល់ម្ចាស់អចលនវត្ថុនេះ គឺមានផលប្រយោជន៍ពីរយ៉ាង គឺប្រជាពលរដ្ឋ ក៏បានផលប្រយោជន៍ ហើយរដ្ឋក៏ទទួលផលប្រយោជន៍ ព្រោះពេលប្រជាពលរដ្ឋ មានលំនឹងពិតប្រាកដ មានលំនៅដ្ឋាន ផ្ទះនៅស្របច្បាប់ អាចយកទៅដាក់ធនាគារ យកលុយមកប្រើប្រាស់បាន តាមតម្រូវការរស់នៅក្នុងជីវភាពប្រចាំថ្ងៃ»។ «សុំឱ្យបងប្អូនប្រើប្រាស់វា ជាប្រយោជន៍សម្រាប់ក្រុមគ្រួសារ រក្សាទុកឱ្យបានល្អ កុំឱ្យបាត់បង់ និងនាំគ្នាទៅបង់ពន្ធ ជូនរដ្ឋឱ្យបានគ្រប់ៗគ្នា តាមការកំណត់របស់រដ្ឋ ព្រោះវាជាកាតព្វកិច្ចរបស់ប្រជាពលរដ្ឋខ្មែរ។ ម៉្យាងទៀត សុំត្រៀមលក្ខណៈសម្បត្តិ និងឯកសារទុកជាមុនឱ្យបានរួចរាល់ សម្រាប់ការបោះឆ្នោត ជ្រើសរើសតំណារាស្រ្ត ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ឱ្យបានគ្រប់ៗគ្នា»។ នេះបើតាមលោកអភិបាល បានបញ្ជាក់បន្ថែមយ៉ាងដូច្នេះ៕