(ភ្នំពេញ)៖ លោកឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានអំពាវនាវគ្រប់បណ្ដា ក្រុមហ៊ុនសន្ដិសុខឯកជនទាំងអស់ ដែលបានដកយកអត្ដសញ្ញាណប័ណ្ណបុគ្គលិក ពេលចូលធ្វើការ ត្រូវប្រគល់ជូនបុគ្គលិកវិញសិន ដើម្បីឲ្យបុគ្គលិកអាចយកអត្ដសញ្ញាណប័ណ្ណ ទៅប្រើប្រាស់ចូលរួមការបោះឆ្នោតជ្រើសតាំងតំណាងរាស្ដ្រ នៅចុងខែកក្កដាខាងមុខនេះ។
លោកឧត្តមសេនីយ៍ឯក លឹម សុខារស្មី ក៏បានអំពាវនាវដល់ភ្នាក់ងារសន្ដិសុខឯកជនទាំងអស់ ត្រូវទៅចូលរួមបោះឆ្នោតជ្រើសតាំងតំណាងរាស្ដ្រ នីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ដើម្បីជ្រើសរើសប្រមុខរាជរដ្ឋាភិបាល ក្នុងការដឹកនាំប្រទេសឲ្យមានការអភិវឌ្ឍគ្រប់វិស័យ និងរក្សាសន្ដិសុខជូនប្រជាពលរដ្ឋនៅទូទាំងប្រទេស។
ការអំពាវនាវរបស់លោកឧត្តមសេនីយ៍ ប្រធាននាយកដ្ឋានគ្រប់គ្រងសន្ដិសុខឯកជន ត្រូវបានធ្វើឡើងនៅព្រឹកថ្ងៃទី២៧ ខែមិថុនា ឆ្នាំ២០១៨នេះ ក្នុងឱកាសអញ្ជើញបើកវគ្គបំប៉នជំនាញភ្នាក់ងារសន្ដិសុខឯកជន លើកទី៥ ដែលមានការចូលរួមពី តំណាងក្រុមហ៊ុនសន្តិសុខឯក ជិត២០០នាក់។
ជាមួយគ្នានោះ លោកឧត្តមសេនីយ៍ លឹម សុខារស្មី ក៏បានគូសបញ្ជាក់ថា ភ្នាក់ងារសន្ដិសុខឯកជន ទទួលបៀវត្សពីក្រុមហ៊ុនឯកជន តែពួកគេមានកាតព្វកិច្ចជាពលរដ្ឋល្អ ដែលមានតួនាទីមិនត្រឹមតែជាអ្នកការពារទ្រព្យសម្បត្តិឯកជន ឬសហគ្រាស គ្រឹះស្ថានឯកជនប៉ុណ្ណោះទេ តែក៏មានកាតព្វកិច្ចជួយការពារទ្រព្យសម្បត្តិសាធារណៈ សណ្ដាប់ធ្នាប់សង្គមផងដែរ។
បើតាមលោកឧត្តមសេនីយ៍ប្រធាននាយកដ្ឋាន ក្រសួងមហាផ្ទៃ តែងតែយកចិត្តទុកដាក់ជំរុញ និងលើកទឹកចិត្តដល់វិស័យសន្តិសុខឯកជន នៅក្នុងប្រទេសកម្ពុជា ឲ្យទទួលបានទំនុកចិត្តក្នុងការប្រកបអាជីវកម្មរបស់ខ្លួន ដោយសុខស្ថិរភាព និងនិត្យានុកូលភាព។ ជាក់ស្តែករាជរដ្ឋាភិបាលកម្ពុជា បានសម្រេចបង្កើត នាយកដ្ឋានគ្រប់គ្រងសន្តិសុខឯកជន កាលពីឆ្នាំ២០១៦កន្លងទៅនេះ គឺដើម្បីគ្រប់គ្រង គាំពារសហការ និងផ្តល់និត្យានុកូលភាពដល់ក្រុមហ៊ុនផ្តល់សេវា សន្តិសុខឯកជន និងសហគ្រាសគ្រឹះស្ថាន ដែលប្រើប្រាស់សន្តិសុខឯកជនទូទាំងប្រទេសកម្ពុជា។
បន្ថែមពីនេះ លោកឧត្តមសេនីយ៍ឯក លឹម សុខារស្មី បានណែនាំ និងជំរុញឲ្យបណ្ដាក្រុមហ៊ុនសន្ដិសុខឯកជនទាំងអស់ គួរតែបញ្ជូនភ្នាក់ងាររបស់ខ្លួន ឲ្យមកចូលរួមក្នុងវគ្គបណ្ដុះបណ្ដាលបំប៉នជំនាញភ្នាក់ងារសន្តិសុខឯកជន ដើម្បីឲ្យភ្នាក់ងាររបស់ខ្លួនទទួលបាននូវបទពិសោធន៍ និងចំណេះផ្សេងៗ ដើម្បីបង្កើនសមត្ថកិច្ចបន្ថែមទៀត។
យ៉ាងណាមិញ ក្នុងពិធីនៅព្រឹកមិញនេះ លោកប្រធាននាយកដ្ឋាន សង្ឃឹមយ៉ាងមុតមាំថា សិក្ខាកាមទាំងអស់នឹងខិតខំប្រឹងប្រែង យកចិត្តទុកដាក់ ត្រង់ត្រាប់ស្ដាប់វាឃ្មិនដែលបានពន្យល់ ហើយត្រូវក្រេបយកចំណេះដឹងទាំងនេះ ទៅបំពេញតួនាទីរបស់ខ្លួនក្នុងផ្លូវវិជ្ជមាន ប្រកបដោយប្រសិទ្ធភាពខ្ពស់ ដើម្បីការពារផលប្រយោជន៍ឯកជន សាធារណៈ និងសង្គមជាតិទាំងមូល៕
