(ប៊ែរឡាំង)៖ អធិការបតីអាល្លឺម៉ង់ លោកស្រី អាន់ជែលឡា មឺគែល នៅថ្ងៃអង្គារ៍ ទី២៦ ខែមិថុនាឆ្នាំ២០១៨ បាននិយាយថា លោកស្រីមិនអាចទៅចូលរួម ទស្សនាដោយផ្ទាល់ការប្រកួតបាល់ទាត់ World Cup​ របស់ក្រុមកីឡាករជម្រើសជាតិអាល្លឺម៉ង់ ជាមួយនឹងកូរ៉េខាងត្បូង នៅឯទីក្រុង Kazan ប្រទេសរុស្ស៊ី នៅថ្ងៃពុធនេះបានទេ។​ នេះបើតាមការចេញផ្សាយដោយសារព័ត៌មាន Sputnik នៅថ្ងៃអង្គារ ទី២៦ ខែមិថុនា ឆ្នាំ២០១៨។

លោកស្រីមឺគែល បានគូសបញ្ជាក់ដូច្នេះថា« ដោយសារតែជាប់ប្រជុំសភា ខ្ញុំនឹងមិនទៅចូលរួមទស្សនាការប្រកួតក្នុងទីក្រុង Kazan ឡើយ ប៉ុន្តែខ្ញុំសង្ឃឹមថាក្រុមកីឡាករជម្រើសជាតិអាល្លឺម៉ង់ នឹងអាចឆ្លងផុតវគ្គចែកពូល»។

គួររំលឹកថា កាលពីថ្ងៃទី១០ ខែមិថុនា លោកស្រីអធិការបតីអាល្លឺម៉ង់ ធ្លាប់បានឱ្យដឹងថាលោកស្រី នឹងទៅចូលរួមទស្សនាការប្រកួតរវាងអាល្លឺម៉ង់ និងកូរ៉េខាងត្បូង បើសិនជាកាលវិភាគទំនេរ។

សូមជម្រាបថា បច្ចុប្បន្ន ក្រុមការពារដំណែងជើងឯកអាល្លឺម៉ង់កំពុងឈរនៅលេខរៀងទី០២នៅក្នុងពូល F តាមក្រោយមិចស៊ីកូ ដែល នឹងត្រូវប្រកួតជាមួយស៊ុយអែត នៅថ្ងៃពុធស្អែកនេះ។ ការប្រកួតបាល់ទាត់ពិភពលោក World Cup បានចាប់ផ្ដើមកាលពីថ្ងៃទី១៤ ខែមិថុនា ហើយនឹងបន្តរហូតដល់ថ្ងៃទី១៥ ខែកក្កដា ដោយការប្រកួតទាំងអស់នឹងត្រូវប្រព្រឹត្តទៅនៅតាមពហុកីឡដ្ឋាបាល់ទាត់ក្នុង ទីក្រុងចំនួន១១ ទូទាំងប្រទេសរុស្ស៊ី៕