(ឧត្តរមានជ័យ)៖ នៅព្រលប់ថ្ងៃទី២៦ ខែមិថុនា ឆ្នាំ២០១៨នេះ មានករណីគ្រោះធម្មជាតិ ខ្យល់លាយលំជាមួយទឹកភ្លៀង១មេធំ បង្កឱ្យមានរន្ទះបាញ់សម្លាប់មនុស្ស២នាក់ និងសន្លប់ម្នាក់ ខណៈពេលអ្នកទាំងបីនាក់កំពុងដេញគោមក ពីឃ្វាលនៅព្រៃចំណុចវាលស្រែ ស្ថិតនៅចំណុចគោកច្រឹកលិច ភូមិព្រៃធំ ឃុំចុងកាល់ ស្រុកចុងកាល់ ខេត្តឧត្តរមានជ័យ។

នគរបាលស្រុកចុងកាល់ បានប្រាប់អង្គភាព Fresh News ថា ករណីគ្រោះធម្មជាតិខាងលើនេះ បណ្តាយឱ្យមនុស្សស្លាប់ ២នាក់ ទី១៖ ឈ្មោះ ច្រុច ហ៊ីង ភេទស្រី អាយុ៤៩ឆ្នាំ ស្លាប់នឹងកន្លែង, ទី២៖ ឈ្មោ ម៉ា សឿម ភេទស្រី អាយុ៦៧ឆ្នាំ ស្លាប់កន្លែកើតហេតុ សពទាំង២នាក់នេះរស់នៅភូមិឃុំខាងលើនេះ និង៣៖ ឈ្មោះ ហ៊ា សាវុធ ហៅ ប៉ាក់ ភេទប្រុស អាយុ៥៣ឆ្នាំ រស់នៅភូមិ ក ឃុំចុងកាល់ ស្រុកចុងកាល់ ខេត្តឧត្តរមានជ័យ (សន្លប់)។

សមត្ថកិច្ចបានបញ្ជាក់ថា ករណីខាងលើនេះ មូលហេតុដោយសារតែ ជនរងគ្រោះទាំងបីនាក់បានដេញគោមក ពីឃ្វាលនៅព្រៃ មកដល់ចំណុចប្រឡាយ ខាងលិចភូមិឃុំកើតហេតុខាងលើនេះ មានភ្លៀងធ្លាក់រន្ទះបាញ់តែម្តង។ ចំណែកសពត្រូវបានសាច់ញាតិ យកធ្វើបុណ្យតាមប្រពៃណី ហើយអ្នកដែសន្លប់បានដឹងខ្លួនហើយ៕