(ម៉ូស្គូ)៖​ ក្រុមបាល់ទាត់ជម្រើសជាតិអ៊ុយរ៉ាហ្គាយ​ បានយកឈ្នះម្ចាស់ផ្ទះរុស្ស៊ី​ ៣-០​ ស្របពេលអេហ្ស៊ីប​បានចាញ់អារ៉ាប៊ីសាអូឌីត​ ២-១​ បញ្ចប់វគ្គសន្សំពិន្ទុនៃពូល​ A នៅ​ World Cup 2018។ ការទទួលបាន៣ពិន្ទុបន្ថែមនេះ​ បានធ្វើឲ្យក្រុមពីតំបន់អាមេរិកឡាទីន​ អ៊ុយរ៉ាហ្គាយ​ បញ្ចប់ទៅដោយចំណាត់ថ្នាក់លេខ១​ នៃពូល​ A ដោយមាន៧ពិន្ទុ​ ត្រូវប្រកួតនឹងក្រុមលេខ២​ នៃពូល​ B ស្របពលក្រុមលេខ២​ ម្ចាស់ផ្ទះរុស្ស៊ី​ ត្រូវជួបក្រុមលេខ១​ ក្នុងពូល​ B។

៣គ្រាប់របស់អ៊ុយរ៉ាហ្គាយ​ កើតឡើងនៅនាទីទី១០​ ពីការទាត់បាល់​ Free kick របស់​ Luis Suarez មុនពេល​ មុនពេល​ Denis Cheryshev ធ្វេសប្រហែសចូលទីខ្លួនឯង នៅនាទីទី២៣​ និងគ្រាប់ទី៣​ ដោយកីឡាករ​ Edison Cavani នៅនាទីទី៩០។

សម្រាប់១ប្រកួតទៀតនៅក្នុងពូលនេះដែរ​ អេហ្ស៊ីប​ បានចាញ់អារ៉ាប៊ីសាអូឌីត​ ២-១​ ចុងម៉ោងជាមួយនឹង​ Mohamed Salah ជាអ្នកស៊ុតគ្រាប់នាំមុខអោយអេហ្ស៊ីបនៅនាទីទី២២​ មុនពេលអារ៉ាប៊ីសាអូឌីត​ តាមស្មើវិញនៅនាទីទី៤៥​ ដោយបាល់ប៉េណាល់ទី​ ១១ម៉ែត្រ​ និងគ្រាប់ជ័យជម្នះនៅនាទីទី៩០+២។

ចំណែកការប្រកួតម៉ោង១យប់, ក្រុមបាល់ទាត់ជម្រើសជាតិ ព័រទុយហ្គាល់​ បានទម្លាក់ក្រុមអាស៊ី​ អ៊ីរ៉ង់ចេញពី​ World Cup 2018 តាមរយៈយកស្មើ ១-១​ ខណៈអេស្ប៉ាញ​ បានស្មើម៉ារ៉ុក​ ២-២​ ដែរនោះ។

ការរកបានតែ១គ្រាប់របស់កីឡាករ​ Recardo Quaresma នៅនាទីទី៤៥​ ចុងម៉ោងនៃវគ្គទី១​ បានធ្វើឲ្យព័រទុយហ្គាល់ បន្តឈរនៅលេខ២​ ប្រចាំពូល​ B ដែលត្រូវជួបក្រុមលេខ១​ អ៊ុយរ៉ាហ្គាយ នៃពូល​ A ក្នុងវគ្គ១៦ក្រុមចុងក្រោយ​ ស្របពេលអេស្ប៉ាញ​ ត្រូវប៉ះម្ចាស់ផ្ទះរុស្ស៊ី។

សូមបញ្ជាក់ផងដែរថា​ ការប្រកួតវគ្គសន្សំពិន្ទុនៃពូល​ A និងពូល​ B ត្រូវបានបញ្ចប់ជាផ្លូវការ ហើយដែលបានរកឃើញ៤ក្រុមឡើងទៅវគ្គ១៦ក្រុមចុងក្រោយដែរ៕

ទស្សនាវិដេអូ Highlight នៃការប្រកួត World Cup ចំនួន៤គូយប់មិញ តាមរយៈ Fresh News TV ផ្សាយរៀងរាល់ម៉ោង៩៖៣០នាទី, ១០៖៣០នាទី, ១១៖៣០នាទី។

លទ្ធផលបញ្ចប់ការប្រកួត៖ ព័រទុយហ្គាល់ 1 - 1 អ៉ីរ៉ង់ | អេស្ប៉ាញ 2 - 2 ម៉ារ៉ុក