(បន្ទាយមានជ័យ)៖ លោក ជា បូរ៉ា រដ្ឋលេខាធិការក្រសួងទេសចរណ៍ និងលោក សួន បរវអភិបាលខេត្តបន្ទាយមានជ័យ នាព្រឹកថ្ងៃទី២៥ ខែមិថុនា ឆ្នាំ២០១៨ ប្រកាសឲ្យចូលកាន់តំណែងលោក ឈឿន សេរីវុធ ជាប្រធានមន្ទីរទេសចរណ៍ថ្មីខេត្តជាផ្លូវការជំនួសលោក ជុង ឡឹម ដែលត្រូវចូលនិវត្តន៍។
ក្នុងនោះរដ្ឋលេខាធិការក្រសួងទេសចរណ៍ ក៏បានណែនាំឲ្យប្រធានមន្ទីរទេសចរណ៍ថ្មីរូបនេះ បង្កើនប្រសិទ្ធភាពការងារ និងលើកកម្ពស់គុណភាពសេវាកម្មទេសចរណ៍ ទេសចរណ៍ធម្មជាតិ ទេសចរណ៍កន្លែងបុរាណ រក្សាអោយបាននូវ វប្បធម៌ និងសាសនា។
លោក សួន បរវ បានលើកបង្ហាញពីសក្ដានុពលលើវិស័យទេសចរណ៍នៅខេត្ត ដែលកំពុងមានភាពទាក់ទាញភ្ញៀវទេសចរឱ្យមកទស្សនា ដូចជា៖ ប្រាសាទបន្ទាយទ័ព ប្រាសាទបន្ទាយឆ្មា តំបន់ទេសចេណ៍ធម្មជាតិជាដើម តម្រូវឲ្យមានការគ្រប់គ្រង និងអភិវឌ្ឍន៍ជាចាំបាច់ ក្នុងនោះលោក៏បានណែនាំឱ្យមន្ទីរទេសចរណ៍ខេត្ត បង្កើនការពង្រឹងអាជីវកម្មទេសចរណ៍ បន្ថែមការផ្សព្វផ្សាយពីតំបន់ទេសចរណ៍ដល់ភ្ញៀវទេសចរ។
លោក ជា បូរ៉ា ក៏បានជំរុញឱ្យរដ្ឋបាលខេត្ត និងមន្ទីរទេសចរណ៍ខេត្តបន្ទាយមានជ័យ ត្រូវចូលរួមចលនាប្រលងប្រណាំងទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អឱ្យបានផុសផុល ព្រោះចលនានេះក៏ជាការទាក់ទាញភ្ញៀវទេសចរ លើកស្ទួយការអភិវឌ្ឍក្នុងខេត្តផងដែរ។
លោករដ្ឋលេខាធិការក្រសួង បានបន្តណែនាំឱ្យប្រធានមន្ទីរទេសចរណ៍ ត្រូវយកចិត្តទុកដាក់អនុវត្តការងារគ្រប់គ្រងអាជីវកម្មទេសចរណ៍ និងការងាររមណីយដ្ឋានស្អាតឲ្យទទួលបានលទ្ធផលល្អ ស្របតាមស្ដង់ដារក្នុងប្រទេស និងក្នុងតំបន់។
លោកក៏បានអំពាវនាវ ដល់គ្រប់មន្ទីរទេសចរណ៍រាជធានី-ខេត្ត គ្រប់ម្ចាស់រមណីយដ្ឋានទេសចរណ៍ និងគ្រប់ប្រធានសហគមន៍ទេសចរណ៍ និងអេកូទេសចរណ៍នៅទូទាំងប្រទេស ត្រូវចូលរួមការប្រលងប្រណាំងរមណីយដ្ឋានទេសចរណ៍គំរូលើកទី២ ឆ្នាំ២០១៨ និងការប្រលងប្រណាំងសហគមន៍ទេសចរណ៍ និងអេកូទេសចរណ៍គំរូលើកទី១ ឆ្នាំ២០១៨ ឲ្យបានច្រើនកុះករ។
លោកក៏បានបន្ថែមអនុសាសន៍មួយទៀត គឺជំរុញឱ្យប្រធានមន្ទីរទេសចរណ៍ និងអាជ្ញាធរខេត្ត ត្រូវគិតគូររៀបចំកែលម្អវត្តអារាមឲ្យកាន់តែល្អ និងមានសោភ័ណភាពសាកសមជាទីសក្តារផង និងជាកន្លែងសម្រាប់ដំណើកម្សាន្តផង ដើម្បីទាក់ទាញភ្ញៀវទេសចរ ជាពិសេសសម្រាប់វត្តអារាមដែលមានលក្ខណៈជាប្រវត្តិសាស្ត្រ៕
