(កំពង់ធំ)៖ លោក សុខ លូ ប្រធានគណៈ​កម្មាធិកាសាខាកាកបាទក្រហមកម្ពុជា និងលោកស្រី ព្រមទាំងសហការី នារសៀលថ្ងៃ​ទី២៣ ខែមិថុនា ឆ្នាំ២០១៨នេះ បានប្រគល់ផ្ទះចំនួន​២ខ្នង និងចែកជំនួយមនុស្សធម៌ ដល់ប្រជាពលរដ្ឋទីទ័លក្រ ដែលកំពុងជួបការលំបាក ស្ថិតនៅឃុំតំាងក្រសំាង និងឃុំកកោះ ចំនួន​១០២គ្រួសារ នៅស្រុកសន្ទុក ខេត្តកំពង់ធំ។

លោក សុខ លូ ​បានលើកឡើងថា ដោយមានការយកចិត្តទុកដាក់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងពីរ តែងតែបានយកចិត្តទុកដាក់ គិតគូជានិច្ចនូវទុក្ខលំបាក់របស់បងប្អូនប្រជាពលរដ្ឋ នៅគ្រប់ទិសទី «ទីណាដែលបងប្អូនជួបនូវទុក្ខលំបាក ទីនោះសម្តេចតែងតែមានកាកបាទក្រហមកម្ពុជាជានិច្ច»។

បើតាមលោក សុខ លូ ​​ការចែកអំណោយមនុស្សធម៌របស់កាកបាទក្រហមកម្ពុជានេះ គឺមិនមានការប្រកាន់នូវនិន្នាការនយោបាយ ពណ៌សប្បុរ ឬសាសនានោះឡើយ និងបានផ្តាំផ្ញើ​​ប្រជាពលរដ្ឋទាំងអស់ សូមមានការប្រុងប្រយ័ត្នខ្ពស់បំផុតក្នុងការថែរក្សាសុខភាព ហើយកត្តាដែលសំខាន់នោះ គឺការរស់នៅត្រូវប្រកាន់យកនៅចំណុចបីល្អគឺ រស់នៅស្អាត ផឹកស្អាត ហូបស្អាត និងឆ្លើយទេចំពោះគ្រឿងញៀន ជាពិសេគោរពច្បាប់ចរាចរណ៍​ឲ្យបានខ្ចប់ខ្ចួន។

សូមបញ្ជាក់ថា ការប្រគល់ផ្ទះនេះ គឺជាផ្ទះទី៥៩ ដែលមានទំហំ ៤ម៉ែត្រ គុណ៦ម៉ែត្រ ធ្វើអំពីឈើប្រក់សង្ក័សី ជញ្ជាំងក្តាមុខ​១ជ្រុង ជញ្ជាំងសង្ក័សី៣ជ្រុង ប្រគល់ជូនគ្រួសារទីទ័លក្រ ប្តីឈ្មោះ ឈិន ទិន ​អាយុ៥០​ឆ្នាំ និងប្រពន្ធឈ្មោះ ប្រាក់ ពៅ អាយុ ៥៣ឆ្នាំ។

ចំណែកឯ ផ្ទះទី៦០ ប្រគល់ជូនគ្រួសារទីទ័លក្រ ប្តីឈ្មោះ ពៅ ណាត អាយុ៣៩​ឆ្នាំ ប្រពន្ធឈ្មោះ ឯម សំអាត អាយុ​៣៦ឆ្នាំ មានកូន៥នាក់ ផ្ទះទាំងពីរនេះ​ឃុំតាំងក្រសាំង និងឃុំកកោះ ស្រុកសន្ទុក ខេត្តកំពង់ធំ និងចែកអំណោយមនុស្សធម៌ ចំនួន​១០២គ្រួសារ ដោយមួយគ្រួសារទទួលបាន អង្ករ​២៥គីឡូ, ត្រីខ​១០កំប៉ុង, មី​១កេស, មុង​១, ភួយ​១, សារ៉ុង​១, ក្រម៉ា​១ និងរទេះសម្រាប់ជនពិការ​៣​គ្រឿង៕