(ភ្នំពេញ)៖ បន្ទាប់ពីបញ្ចេញរឿង «ផ្ទះចិញ្ចឹមខ្មោច» កាលពីខែមិនាកន្លងទៅ ​ដែលជាវណ្ណកម្មរឿងប្រភេទខ្មោចបែបកំប្លែងរួចមក ផលិតកម្ម​ ​«Wonderfilm​​​» បានបញ្ចេញនូវរឿង​ បែបរន្ធត់ថ្មី​មួយទៀត ដែលមានចំណងជើងថា «ស្នូរជើងអ្នកណា» ក្រោមការដឹកនាំរបស់លោក សែម វិសាល និងចែកចាយផ្សព្វផ្សាយ ដោយពូព្រហ្ម អេនធើធេនម៉ិន ដើម្បីធ្វើការប្រកួតប្រជែង ក្នុងទីផ្សារភាពយន្ត ក្នុងប្រទេសកម្ពុជា ដែលកំពុងតែហ៊ុព័ទ្ធដោយភាពយន្តបរទេស វាយយ៉ាងខ្លាំងក្លា ជាពិសេសតាមបណ្ដារោងភាពយន្ត​ទំនើបនានា។

លោក សែម វិសាល ម្ចាស់ផលិតកម្ម​ ​«Wonderfilm​​​»​ បានបង្ហើបឲ្យដឹង​​រថា លោកមានគំរោងបញ្ចេញ​ រឿងបែបរន្ធត់តក់ស្លុតវិញ្ញាណ ជាបន្តបន្ទាប់ទៀត ដើម្បីឈានជើងចូលប្រកួតប្រជែងទីផ្សារ នៅកម្ពុជា ដែលកំពុងញាំញីដោយភាពយន្ត ខ្នាតយក្សបែបហូលីវូដ និងរឿងរន្ធត់បែបសាហាវៗក្នុងតំបន់។ លោកនិយាយថា «ខ្ញុំគិតថា ដើម្បីប្រកួត​​​ប្រជែងជាមួយរឿងខ្នាតយក្ស របស់បរទេស ផលិតករខ្មែរត្រូវតែពង្រឹងគុណភាព និងស្វែងរកចំណុចពិសេស របស់ភាពយន្តខ្មែរយើង​»

ដោយឡែកលោក ព្រំ សិលា ​អ្នកចាត់ការទូទៅក្រុមហ៊ុន ពូព្រហ្មអិនធឺធេនមែន បានថ្លែងថា​ «សម្រាប់ការប្រមើមើលលទ្ធភាព ភាពយន្តខ្មែរ ក្នុងថ្ងៃខាងមុខ ភាគច្រើន​ជារឿង​បែបរន្ធត់សុទ្ធ ហើយមានកំប្លែងបន្តិចបន្តួច ជាពិសេសរំលេចយកលក្ខណៈ​ ពិសេសនៃជំនឿ បែបខ្មែរ ទើបអាចប្រកួតប្រជែង ជាមួយភាពយន្តបរទេសបាន»។ លោកក៏បានបង្ហាញពីសុទិដ្ឋិនិយម ចំពោះ​វិស័យភាពយន្តខ្មែរ ទោះត្រូវឆ្លងកាត់ឧបសគ្គធំៗ នាថ្ងៃខាងមុខជាច្រើនទៀត ក៏ដោយ។

លោក​បន្ថែមថា ទីផ្សារឿងបែបរន្ធត់ កំពុងតែកក្រើក និងទទួលការគាំទ្រក្នុងរង្វង់ អ្នកទស្សនាមិនដាច់ តាមរោងភាពយន្ត តួរយ៉ាងដូចជារឿង «ធ្មប់» ចែកចាយដោយក្រុមហ៊ុន ពូព្រហ្ម កាលពីដើមឆ្នាំនេះជាដើម។

សូមបញ្ជាក់ថា រឿង«ស្នូរជើងអ្នកណា» នឹងដាក់បញ្ចាំង​នៅថ្ងៃទី ១៩ ខែកក្កដានេះតទៅ នៅគ្រប់រោងភាពយន្ត​ ក្នុងប្រទេស។ រឿងថ្មីមួយនេះ ត្រូវបានកំណត់យកទីតាំងថត នៅផ្ទះវីឡាគេបោះបង់ចោលមួយ នៅជាយក្រុងតាខ្មៅ។ ​ ដោយឡែកការនិពន្វ ទាំងសមតួរផ្ទាល់ ធ្វើនៅផ្ទះវីឡាបែបបុរាណកាត់សម័យនេះតែម្តង ពោលដើម្បីស្វែង​រកអារម្មណ៍ និងភាពភ័យរន្ធត់បែបថ្មីមួយ​ ដល់ទស្សនិកជនតាមរោងកុនទស្សនា។ នេះបើតាមការបង្ហើបរ បស់ផលិតករភាពយន្ត។ ថ្វីត្បិតតែរឿងថ្មីរបស់ផលិតកម្ម​ «WonderFilm» មួយនេះជាប្រភេទបែបរន្ធត់ច្រើន តែក៏មានបង្កប់នៅឈុតអស់សំណើច បែបថ្មីរវាងមនុស្ស និង វិញ្ញាណខ្មោចផ្ទាល់​​​ផងដែរ៕